سینیٹ کی11نشستوں کیلئے پختونخوا اسمبلی میں21جولائی کو الیکشن ،شیڈول جاری
اسلام آباد (وقائع نگار)الیکشن کمیشن نے سینیٹ میں خیبر پختونخوا کی 7جنرل ، 2خواتین اور 2 ٹیکنو کریٹ،علماء کی نشستوں پر انتخاب کا شیڈول جاری کردیا ،پولنگ 21 جولائی 2025کو خیبر پختونخوا اسمبلی میں ہوگی۔
تفصیلات کے مطابق الیکشن کمیشن نے 2 اپریل 2024 کو مذکورہ بالا انتخابات سپیکر کی طرف سے مخصوص نشستوں پرمنتخب ممبران صوبائی اسمبلی سے حلف نہ لینے اور الیکٹورل کالج نامکمل ہونے کی وجہ سے ملتوی کئے تھے ۔ تحریک انصاف کی ثانیہ نشتر کی سینیٹ سے خالی کردہ نشست پر انتخابا ت کیلئے الیکشن پروگرام جاری کیا ہے ۔ پبلک نوٹس 9 جولائی 2025 ،کاغذات نامزدگی جمع کروانے کی تاریخ 10 اور 11جولائی ، کاغذات نامزدگی کی جانچ پڑتال 16 جولائی اور پولنگ 31 جولائی کو ہوگی۔مرحوم ساجد میر کی سینیٹ سے خالی کردہ نشست پرالیکشن کے مختلف مراحل جوکہ الیکٹورل کالج نا مکمل ہونے کی وجہ سے ملتوی کئے گئے تھے اس کا نوٹیفکیشن بھی جاری کیا گیا ہے ۔ جس میں ریٹرننگ آفیسر امیدواروں کی نظرثانی شدہ فہرست 15 جولائی 2025 کو جاری کرے گااور کاغذات نامزدگی 16 جولائی 2025 تک واپس لئے جاسکیں گے ۔پولنگ 21 جولائی 2025 کو پنجاب اسمبلی میں ہوگی۔
قومی اسمبلی میں خیبر پختونخوا صوبہ سے مسلم لیگ ن کی خواتین کی مخصوص 2 خالی نشستوں پر بھی الیکشن پروگرام جاری کیا گیا ہے ۔پبلک نوٹس 8 جولائی 2025 کو ریٹرننگ آفیسر جاری کرے گا۔کاغذات نامزدگی 9 اور 10 جولائی 2025کو جمع کروائے جا سکیں گے ، کاغذات نامزدگی کی جانچ پڑتال 14 جولائی اور امیدواروں کی حتمی لسٹ 24 جولائی 2025 کو جاری کی جائے گی۔مسلم لیگ ن کی ترجیحی فہرست ختم ہوچکی ہے لہذا اسے 10 جولائی تک ترجیحی فہرست ریڑننگ آفیسر کے پاس جمع کروانی ہوگی۔الیکشن کمیشن نے 2جولائی 2025 کو مخصوص نشستوں پر جن ممبران قومی و صوبائی اسمبلی کا نوٹیفکیشن جاری کیا تھا ان کی حلف برداری کیلئے بھی سپیکر قومی و صوبائی اسمبلیوں کو خط ارسال کر دیئے ہیں تاکہ وہ اپنی ذمہ داریاں سنبھال سکیں اور خیبر پختونخوا اور پنجاب کے سینیٹ الیکشن میں ووٹ کاسٹ کر سکیں۔
