لاہور تا رائیونڈ صرف16کلومیٹرتک موٹروے بنانے کا منصوبہ:قائمہ کمیٹی میں انکشاف
اسلام آباد(نیوز ایجنسیاں )سینیٹ کی قائمہ کمیٹی برائے منصوبہ بندی کے اجلاس میں این ایچ اے حکام نے انکشاف کیا کہ لاہور سے رائیونڈ تک صرف 16 کلومیٹر طویل موٹروے تعمیر کی جائے گی جس پر چیئرپرسن کمیٹی قرا ۃ العین مری نے سوال اٹھایا کیا آپ صرف ایک گھر کے لیے موٹروے بنا رہے ہیں؟ این ایچ اے حکام نے بتایا کہ اس منصوبے کی لاگت صوبائی حکومت برداشت کرے گی۔
جبکہ فی الحال این ایچ اے زمین کا سروے کر رہا ہے ۔چیئرپرسن کمیٹی نے کہا کہ پنجاب میں نئی موٹروے کی تعمیر تب تک نہیں ہونی چاہیے جب تک دیگر صوبوں میں زیر تعمیر موٹروے مکمل نہ ہو جائیں۔چیئرپرسن قر اۃالعین مری کی زیرصدارت ہونے والے اس اجلاس میں ترقیاتی منصوبوں کی تفصیلات پر غور کیا گیا۔وزارت منصوبہ بندی کے حکام نے بتایا کہ گزشتہ مالی سال میں پبلک سیکٹر ڈیویلپمنٹ پروگرام (پی ایس ڈی پی) کے تحت ایک ہزار ارب روپے کے اخراجات کیے گئے تھے ۔ رواں مالی سال کے پی ایس ڈی پی میں 55 غیر منظور شدہ منصوبے شامل کیے گئے جن کے لیے منصوبہ بندی کمیشن مکمل جائزے کے بعد این او سی جاری کرے گا۔اجلاس میں بتایا گیا کہ بلوچستان میں این 5 ہائی وے کے لیے 100 ارب روپے مختص کیے گئے جبکہ ہائی وے کے سات منصوبوں کے لیے غیر ملکی امداد دستیاب ہے ۔ موٹروے ایم 6 کی تعمیر کے لیے اسلامی ترقیاتی بینک تین سیکشنز کے لیے مالی معاونت فراہم کرے گا، جبکہ مزید دو سیکشنز پبلک پرائیویٹ پارٹنرشپ کے تحت بنائے جائیں گے ۔حیدرآباد-سکھر موٹروے کے علاوہ اس راستے پر موجود جی ٹی روڈ کو بھی اپ گریڈ کیا جائے گا۔ سعدیہ عباسی نے اسلام آباد کی سرکاری لائبریری میں کتابوں کو دیمک لگنے کے مسئلے پر تشویش کا اظہار کیا ۔ترقیاتی فنڈز کا درست استعمال کیا جانا چاہیے ۔ سینیٹر منظور کاکڑ نے یارک-ژوب روڈ(این 50 )کو ترجیحی بنیادوں پر مکمل کرنے پر زور دیا۔
