نامزد سفرا اقتصادی، تجارتی ،ثقافتی تعلقات کے فروغ کیلئے کردار ادا کریں ، صدر
اسلام آباد(سٹاف رپورٹر)صدر مملکت آصف علی زرداری نے جمہوریہ چیک کے ساتھ تجارت، سرمایہ کاری اور عوامی روابط کو فروغ دینے کی ضرورت پر زور دیتے ہوئے کہا ہے کہ جمہوریہ چیک یورپ میں پاکستان کا اہم شراکت دار ہے ۔
ایوانِ صدر کے پریس وِنگ کے مطابق صدر مملکت نے ان خیالات کا اظہار جمہوریہ چیک کے لئے پاکستان کے نامزد سفیر شہریار اکبر خان سے ملاقات کے دوران کیا جنہوں نے یہاں ایوان صدر میں ان سے ملاقات کی۔ صدر مملکت نے دونوں ممالک کے درمیان پارلیمانی اور ثقافتی وفود کے تبادلوں کے فروغ پر بھی زور دیا، صدر نے شہریار اکبر خان کو نئی تقرری پر مبارکباد دی اور ان کے لئے نیک تمناؤں کا اظہار کیا۔ صدر سے یوکرین کے لئے نامزد سفیر میجر جنرل ریٹائرڈ کنور عدنان احمد خان نے بھی ملاقات کی۔ اس موقع پر صدر مملکت نے کہا کہ پاکستان یوکرین کے ساتھ باہمی مفاد پر مبنی تعاون کو مزید وسعت دینا چاہتا ہے ۔ انہوں نے نامزد سفیر کو ہدایت کی کہ وہ اقتصادی، تجارتی اور ثقافتی تعلقات کو فروغ دینے کے لئے کردار ادا کریں، صدر نے میجر جنرل ریٹائرڈ کنور عدنان احمد خان کو نئی ذمہ داری پر مبارک باد اور ان کے لئے نیک خواہشات کا اظہار کیا۔
