سیشن جج ناصر جاوید کو کام سے روکنے کی درخواست قابل سماعت ہونے پر فیصلہ محفوظ
اسلام آباد(اپنے نامہ نگار سے)اسلام آباد ہائیکورٹ کے چیف جسٹس سردارمحمد سرفراز ڈوگر کی عدالت نے 190 ملین پاؤنڈ کیس کا فیصلہ سنانے والے سیشن جج ناصر جاوید رانا کو کام سے روکنے سے متعلق درخواست قابل سماعت ہونے پر فیصلہ محفوظ کر لیا۔
گزشتہ روزشہری اسامہ ریاض کی درخواست پر سماعت کے دوران وکیل ریاض حنیف راہی عدالت میں پیش ہوئے ۔ سماعت کے دوران چیف جسٹس نے ریمارکس دئیے کہ بائیس سال پہلے کا آرڈر ہے تو پہلے آپ کہاں تھے ؟ بائیس سال بعد آپ کو یاد آئی کہ سپریم کورٹ کے حکم پر عمل درآمد نہیں ہوا؟ چیف جسٹس نے مزید کہا کہ بائیس سال بعد معاملہ عدالت لانے سے آپ کی بدنیتی ظاہر ہوتی ہے ۔ وکیل درخواست گزار ریاض حنیف راہی نے مؤقف اپنایا کہ معاملہ اکتوبر 2025 میں میڈیا پر ہائی لائٹ ہوا اور سپریم کورٹ کے 2004 کے فیصلے کی روشنی میں متعلقہ جج کے خلاف کارروائی ہونی چاہیے ۔ چیف جسٹس سرفراز ڈوگر نے کہا کہ چلیں دیکھ لیتے ہیں ، آپ کو سن لیا ہے ، ہم اس پر آرڈر جاری کریں گے ۔
