ڈیڈ لائن گزر گئی ،نصف نجی میڈیکل کالجز نے فیس تفصیل جمع نہ کرائی
پاکستان میڈیکل اینڈ ڈینٹل کونسل تاحال ان کالجز کیخلاف کوئی کارروائی نہ کر سکی نجی میڈیکل و ڈینٹل کالجز میں طلبہ کے لیے سالانہ فیس 18لاکھ روپے مقرر ہے
اسلام آباد (ایس ایم زمان) پاکستان میڈیکل اینڈ ڈینٹل کونسل (پی ایم ڈی سی) کی مقررہ تاریخ تک ملک بھر کے صرف 50 کے قریب نجی میڈیکل و ڈینٹل کالجز نے طلبہ سے وصول کی گئی فیس اور اکاؤنٹس کی تفصیل جمع کرائی ہے ۔ پی ایم ڈی سی کے منظور شدہ 90 نجی میڈیکل و ڈینٹل کالجز میں سے نصف سے زائد نے تاحال مطلوبہ ریکارڈ فراہم نہیں کیا تاہم کونسل نے ان کے خلاف اب تک کسی کارروائی کا فیصلہ نہیں کیا۔پی ایم ڈی سی نے نجی میڈیکل و ڈینٹل کالجز کو مراسلے کے ذریعے ہدایت کی تھی کہ وہ 15 جنوری تک فیس اور اکاؤنٹس کی مکمل تفصیل جمع کرائیں مگر مقررہ تاریخ گزرنے کے باوجود صرف 50 کالجز نے ریکارڈ فراہم کیا ہے ۔پی ایم ڈی سی کے مطابق نجی میڈیکل و ڈینٹل کالجز میں طلبہ کے لیے سالانہ فیس 18 لاکھ روپے مقرر ہے ۔
کونسل کے مطابق نائب وزیراعظم اسحاق ڈار کی سربراہی میں قائم کمیٹی کے پہلے اجلاس میں فیصلہ کیا گیا کہ کوئی بھی نجی میڈیکل و ڈینٹل کالج 18 لاکھ روپے سے زائد فیس وصول نہیں کرے گا۔ اس فیصلے پر عملدرآمد کے لیے کالجز کو طلبہ سے وصول کی گئی فیس اور اکاؤنٹس کی تفصیل فراہم کرنے کی ہدایت دی گئی ہے ۔پی ایم ڈی سی نے یہ بھی واضح کیا ہے کہ اگر کسی نجی میڈیکل یا ڈینٹل کالج نے 18 لاکھ روپے سے زائد فیس وصول کی ہے تو اضافی رقم طلبہ کو واپس کی جائے ۔ اکاؤنٹس اور فیس کی تفصیل جمع نہ کرانے والے کالجز کے خلاف ممکنہ کارروائی سے متعلق سوال پر صدر پاکستان میڈیکل اینڈ ڈینٹل کونسل ڈاکٹر رضوان تاج اور ترجمان نے دنیا نیوز کو کوئی جواب نہیں دیا۔
