پراپرٹی ایکٹ 2025،ترمیمی مسودہ پنجاب کابینہ میں منظور
غیرقانونی قابض کو 10سال قید،ایک کروڑجرمانہ ،غلط کیس پربھی سزالاگو
لاہور(کرائم رپورٹر)پنجاب حکومت نے پراپرٹی ایکٹ 2025 میں ترامیم کیلئے مسودہ تیار کر لیا ، جسے صوبائی کابینہ نے منظوری بھی دے دی ہے ۔ نئی ترامیم کے تحت غیر قانونی قبضے کے خلاف کارروائی مزید سخت اور تیز ہو جائے گی جبکہ پراپرٹی ٹربیونل کے قیام سے پراپرٹی تنازعات کا حل جلد ممکن ہو گا۔نئے قوانین کے مطابق پراپرٹی ٹربیونل میں کیسز براہِ راست دائر ہوں گے اور ٹربیونل کو عبوری ریلیف، حفاظتی اقدامات اور فوری قبضہ واگزار کروانے کا مکمل اختیار ہوگا۔غیر قانونی قبضہ کرنے والوں کو 5 سے 10 سال قید اور ایک کروڑ روپے تک جرمانہ یا دونوں سزائیں ہو سکتی ہیں۔اسی طرح جھوٹی یا بدنیتی پر مبنی درخواست دینے پر بھی سخت سزا مقرر کی گئی ہے ، جس میں 1 سے 5 سال قید اور 5 لاکھ روپے جرمانہ شامل ہے ۔اپیل کا طریقہ کار بھی تبدیل کیا گیا ہے ، اب اپیل صرف لاہور ہائیکورٹ میں دائر کی جا سکے گی اور اپیل کیلئے پراسیکیوٹر جنرل کی منظوری لازمی ہو گی۔ اپیل 30 دن کے اندر دائر کی جائے گی اور چیف جسٹس کے نامزد کردہ بینچ میں سنی جائے گی، جسے 30 دن میں فیصلہ کرنا ہوگا۔
