آج کا پکوان
جھٹ پٹ چکن مصالحہ اجزا:چکن ایک کلو، نمک حسب ذائقہ، لہسن آٹھ جوئے، ادرک ایک سے دو انچ کا ٹکڑا، موٹی کٹی ہوئی پیاز دو عدد، پھینٹی ہوئی دہی ایک پیالی، مکمل لال مرچیں دس عدد، سفید زیرہ ایک کھانے کا چمچ، کُٹی ہوئی کالی مرچیں ایک چائے کا چمچ، مکمل گرم مصالحہ ایک کھانے کا چمچ، کوکنگ آئل آدھی پیالی۔ سجانے کے لیے: کٹا ہوا ہرا دھنیا اور لیموں کی قاشیںحسب پسند۔
ترکیب:چکن کو نمک، کالی مرچ اور دہی لگا کر آدھے گھنٹے کے لیے رکھ دیں۔ پیاز، ادرک لہسن، زیرہ اور لال مرچوں کو ملا کر موٹا موٹا پیس لیں۔ دیگچی میں کوکنگ آئل کو دو سے تین منٹ کے لیے درمیانی آنچ پر ہلکا گرم کریں اور مکمل گرم مصالحہ ڈال دیں۔ جب کڑکڑانے لگے تو پسا ہو مصالحہ ڈال دیں اور چار سے پانچ منٹ تک بھونیں۔ چکن ڈال کر اچھی طرح ملائیں اور ڈھک کر درمیانی آنچ پر اتنی دیر پکائیں کہ تیل علیحدہ ہوجائے۔ ہرا دھنیا چھڑک کر تین سے چار منٹ ہلکی آنچ پر پکا کر اتار لیں۔ ہرا دھنیا اور لیموں سے سجا کر پراٹھوں کے ساتھ پیش کریں۔
مرغ دم پخت
اجزا: مرغ بمعہ کھال ایک عدد، گھی 250 گرام، دہی 250 گرام، پیاز تین چھوٹی گڈیاں، ادرک ایک چھوٹی گانٹھ، سرخ مرچ حسب ذائقہ، کالی مرچ 10 گرام، کچری دس گرام، کشمش 60 گرام، بادام کی گریاں 60 گرام، لیموں دو عدد، نمک حسب ذائقہ، انڈے دو عدد، آلو دو عدد، گرم مصالحہ تھوڑا سا۔
ترکیب:پیاز دو کاٹ لیجئے اور ان کو ادرک کے ساتھ پیس لیں۔ اس طرح نمک سرخ مرچ اور کالی مرچوں کو بھی الگ الگ پیس لیجئے۔ نمک اور کالی مرچیں مرغ پر ملیے اور اسے چھری کی نوک سے اچھی طرح گوندھ لیجئے۔ پھر کشمکش، بادام کی گریاں اور پیاز کے باقی لچھے گھی میں بھوننے کے بعد ان پر لیموں کا عرق چھڑ کئے اور مرغ کے پیٹ میں بھر دیجئے۔ آلو ؤں اور انڈوں کو ابال کر ان کے قتلے کر لیجئے اور انہیں بھی مرغ کے اندر بھر کر اسے دھاگے یا ڈور سے سی لیجئے تاکہ مصالحہ باہر نہ نکلے۔ گھی میں بھوننے کے بعد گلانے کے لئے پانی ڈال کر پتیلی کا منہ آٹے سے بند کر دیجئے۔ جب بھاپ باہر نکلنے لگے تو پتیلی چولہے سے اتار کر رکھ لیں۔ پتیلی کا منہ کھولئے اور اس میں پسا ہوا گرم مصالحہ ڈال دیجئے۔ دم پخت چکن تیار ہے۔
