پودے اور ہریالی خواتین کی عمر بڑھائیں
قدرتی ماحول میں رہنا انسانی صحت کیلئے کتنا اچھا ہے اسی حوالے سے ایک تحقیق کے بعد سائنسدانوں نے انکشاف کیا ہے کہ جن علاقوں میں زیادہ پودے اور ہریالی ہوتی ہے وہاں خواتین کی عمریں لمبی ہوتی ہیں۔ تازہ تر ین جائزہ انسانی صحت پر ماحول کے اثرات کو سمجھنے کے حوالے سے تھا جس سے یہ بات سامنے آئی کہ کم ہریالی والے علاقوں میں رہنے والی خواتین کے مقابلے میں قدرتی ماحول سے قریب رہنے والی خواتین میں نمایاں طور پر شرح اموات کم تھی۔ اس تحقیق سے پتہ چلا کہ کم پودوں اور درختوں والے علاقے میں رہنے والی خواتین کے مقابلے میں ماحول دوست علاقوں میں رہنے والی خواتین میں مجموعی طور پر 12 فیصد کم شرح اموات تھی۔
محققین نے اپنی رپورٹ میں لکھا کہ شرح اموات کی کمی کے نتائج کے ساتھ ہم یہ کہہ سکتے ہیں کہ پودے اور ہریالی ہماری صحت کیلئے کئی طریقوں سے بہت اہم ہو سکتے ہیں۔ ہم ہریالی کی نمائش میں اضافے اور کم شرح اموات کے درمیان مضبوط تعلق کا مشاہدہ کرنے پر حیران تھے۔ اس کے ساتھ ہی محققین نے اپنے تجزیہ میں یہ بھی کھنگالنے کی کوشش کی ہے کہ کس طرح پودے، جھاڑیاں اور سبزہ کے ساتھ ایک ماحول موت کی شرح کو کم کرسکتا ہے۔ ہمارے لیے یہ جاننا بہت ضروری ہے کہ پودے اور درخت ہماری کمیونٹیز کو صحت اور ساتھ ساتھ خوبصورتی کے فوائد فراہم کرتے ہیں۔مطالعاتی جائزہ ماحولیاتی ہیلتھ سائنس کے قومی ادارے (این آئی ای ایچ ایس) کی طرف سے فنڈ کیا گیا تھا۔جس میں نرسوں کی صحت کے ایک طویل المعیاد مطالعہ میں شامل خواتین کے گھروں کے ارد گرد پھیلی ہریالی کی سطح کی جانچ پڑتال کی گئی تھی۔اپنے مطالعے کیلئے محققین نے سیٹلائٹ کے ذریعے گھروں کے مقامات سے 250 سے 1,250 میٹر کے اندر اندر سبزہ اور ہریالی کی سطح کا تعین کیا تھا۔محققین نے پودوں کی سطح میں تبدیلیوں اور شرکاء کی اموات سے باخبر رہنے کیلئے کئی سال تک ان کی نگرانی کی تھی جبکہ مطالعے کی مدت کے دوران 8,604 اموات واقع ہوئیں۔ جن کے گھروں کے ارد گرد پودوں ،درختوں اور سبزہ کی سطح میں اضافہ ہوا تھا وہاں سائنسدانوں نے مسلسل کم شرح اموات کو دیکھا تھا۔ یہ رجحان موت کی الگ الگ وجوہات کیلئے بھی دیکھا گیا تھا او جب محققین نے کم ہرے بھرے ماحول میں رہنے والی خواتین کا مقابلہ سبزہ اور ہریالی سے ہرے بھرے علاقوں میں رہنے والی خواتین کے ساتھ کیا تو انھیں پتا چلا کہ وہاں گردوں کی بیماری کیلئے 41 فیصد کم شرح اموات تھی ،اسی طرح سانس کی بیماری کیلئے 34 فیصد کم شرح اموات تھی۔ علاوہ ازیں ماحول دوست علاقوں میں کینسر کیلئے 13 فیصد کم شرح اموات پائی گئی۔
محققین نے موت کے خطرے میں اضافہ کرنے والے دیگر عوامل مثلا ًشرکاء کی سماجی واقتصادی حیثیت ،عمر جنس ،قومیت اور نسل اور تمباکو نوشی سمیت خواتین کی طرز زندگی کو بھی دیکھا ہے۔ اور ان عوامل کو شامل کرنے کے بعد محققین اور بھی زیادہ پر اعتماد تھے کہ ان عوامل کے مقابلے میں پودے اور سبزہ موت کی شرح میں کمی کیلئے اہم کردار ادا کرتے ہیں۔