Roznama Dunya: اسپیشل فیچرز :- فارغ بخاری

فارغ بخاری

13 April, 2018

تحریر : معروف آزاد

فارغ بخاری کا نام احمد شاہ تھا۔ 11 نومبر 1917ء کو پشاور میں پیدا ہوئے۔ انٹرمیڈیٹ تک تعلیم حاصل کرنے کے بعد مشرقی زبانوں کے کئی امتحانات پاس کئے۔ فارغ بخاری نظریاتی طور پر ترقی پسند تحریک سے وابستہ تھے لیکن اس نظریاتی وابستگی نے ان کی تخلیقی کشادگی کو کم نہیں ہونے دیا۔ وہ موضوع ، زبان اور شعری ہیئتو ں میں نئے نئے تجربے کرتے رہے۔ ان کا ایک نمایاں تجربہ غزل کی فارم میں ہے۔ انہوں نے اپنے شعری مجموعے ’’ غزلیہ ‘‘ میں غزل کی ہیئت اور تکنیک کو ایک نئے انداز میں برتا ہے۔فارغ نے اردو کی ادبی صحافت میں بھی اہم کردار ادا کیا۔ وہ ماہنامہ ’’نغمۂ حیات‘‘ اور ہفت روزہ ’’شباب‘‘ کے مدیر رہے اور ’’سنگ میل‘‘ کے نام سے ایک ادبی رسالہ بھی نکالا۔فارغ بخاری کی مطبوعات کے نام یہ ہیں۔ ’’زیروبم، شیشے کے پیرہن، خوشبو کا سفر، غزلیہ، ادبیات سرحد، پشتو کے لوک گیت، سرحد کے لوک گیت، باچا خان، پشتو شاعری، رحمان بابا کے افکار، اور جرأت عاشقاں‘‘۔ فارغ بخاری کو ان کی ادبی اور ثقافتی خدمات کے لئے حکومت پاکستان نے صدارتی تمغہ برائے حسن کارکردگی سے بھی نوازا۔ 13 اپریل 1997 کو پشاور میں انتقال ہوا۔

روزنامہ دنیا ایپ انسٹال کریں

کوارٹر ہارس ایم کے-1

کیا دنیا میک 5 کی رفتار سے سفر کے دور میں داخل ہو رہی ہے؟امریکی ایرو سپیس کمپنی Hermeus کے تجرباتی طیارے Quarterhorse Mk 1کی پہلی کامیاب پرواز نے فضائی سفر کی دنیا میں ایک نئی بحث چھیڑ دی ہے۔ اگرچہ یہ طیارہ ابھی ابتدائی آزمائشی مراحل میں ہے لیکن اس کی کامیاب پرواز کو مستقبل کے ایسے مسافر بردار جہازوں کی جانب ایک اہم قدم قرار دیا جا رہا ہے جو آواز کی رفتار سے پانچ گنا زیادہ تیز یعنی میک 5 (Mach5) کی رفتار سے سفر کر سکیں گے ۔کوارٹر ہارس ایم کے1 کی پہلی کامیاب پروازگزشتہ برس 21 مئی کو ریاست کیلیفورنیا میں امریکی فضائیہ کے ایڈورڈز ایئر فورس بیس سے ہوئی۔پرواز کا مقصد طیارے کے ٹیک آف، لینڈنگ، کنٹرول سسٹمز، ایویونکس اور ایروڈائنامکس کی جانچ کرنا تھا۔ کوارٹر ہارس ایم کے1 مستقبل کے ہائپر سانک طیاروں کی تیاری کی جانب ایک اہم قدم سمجھا جا رہا ہے۔کمپنی کا بنیادی مقصد ایسا مسافر بردار طیارہ تیار کرنا ہے جو میک 5 کی رفتار سے پرواز کر سکے۔ماہرین کے مطابق یہ پیش رفت صرف ایک نئے طیارے کی آزمائش نہیں بلکہ فضائی نقل و حمل میں ایک ممکنہ انقلاب کی بنیاد ہے۔ اگر اس منصوبے میں کامیابی ہو جاتی ہے تو اس صلاحیت کا حامل مسافر بردار طیارہ لندن سے نیویارک کا سفر محض ڈیڑھ گھنٹے کے قریب مکمل کر سکے گا جبکہ موجودہ طیاروں کو یہی فاصلہ طے کرنے میں سات سے آٹھ گھنٹے لگتے ہیں۔پہلی پرواز کیوں اہم ہے؟کوارٹر ہارس ایم کے 1نے اپنی پہلی پرواز امریکی فضائیہ کے مشہور تجرباتی مرکز ایڈورڈز ایئر فورس بیس سے کی۔ اس پرواز کا بنیادی مقصد انتہائی تیز رفتار پرواز سے پہلے طیارے کے بنیادی سسٹمز، ایویونکس، لینڈنگ گیئر، کنٹرول سسٹمز اور فضائی استحکام کا جائزہ لینا تھا۔کمپنی کے مطابق ایم کے1 ماڈل کو محض 19 ماہ میں ڈیزائن اور تیار کیا گیا،جو جدید ہوابازی کی صنعت میں غیر معمولی رفتار سمجھی جاتی ہے۔ اس منصوبے کی خاص بات یہ تھی کہ کمپنی روایتی انداز میں کئی سال تحقیق کرنے کے بجائے ''تیار کرو، آزماؤ اور سیکھو‘‘ کی حکمت عملی پر عمل کر رہی ہے۔رفتار اور تکنیکی خصوصیاتبنیادی طور پرایم کے 1 میک 5 کی رفتار کے لیے نہیں بنایا گیا مگر یہ مستقبل میں برق رفتار طیارے بنانے کے لیے ایک بنیاد فراہم کرنا ہے۔ موجودہ آزمائشی طیارہGE J85 ٹربوجیٹ انجن کا حامل ہے جو بنیادی پرواز اور سسٹمز کی جانچ کے لیے استعمال کیا جا رہا ہے۔تاہمHermeus کا اصل ہدف ایسے انجن تیار کرنا ہے جو کم رفتار پر عام جیٹ انجن کی طرح کام کریں اور پھر انتہائی تیز رفتار پر رام جیٹ (Ramjet) نظام میں تبدیل ہو جائیں۔ اس ٹیکنالوجی کوTurbine Based Combined Cycle (TBCC) کہا جاتا ہے۔میک 5 کی رفتار تقریباً 6,100 کلومیٹر فی گھنٹہ بنتی ہے اور اس رفتار پر پرواز کرنے والا طیارہ شدید حرارت اور فضائی دباؤ کا سامنا کرتا ہے، یہی وجہ ہے کہ ہائپرسانک طیاروں کی تیاری دنیا کے مشکل ترین انجینئرنگ منصوبوں میں شمار ہوتی ہے۔سب سے بڑا چیلنجہائپرسانک رفتار پر پرواز کرنے والے طیاروں کے لیے سب سے بڑا مسئلہ انجن نہیں بلکہ حرارت ہوتی ہے۔ جب کوئی طیارہ میک 5 کی رفتار سے فضا میں سفر کرتا ہے تو اس کے اگلے حصے کا درجہ حرارت کئی سو ڈگری سینٹی گریڈ تک پہنچ سکتا ہے۔اس صورتحال میں عام ایلومینیم یا روایتی دھاتی ڈھانچے ناکافی ثابت ہوتے ہیں۔ اسی لیے انجینئرز کو خصوصی دھاتوں، جدید کمپوزٹس اور حرارت برداشت کرنے والے مواد کا استعمال کرنا پڑتا ہے۔ کوارٹر ہارس پروگرام انہی مسائل کے عملی حل تلاش کرنے کی ایک کوشش بھی ہے۔ مستقبل کا مسافر بردار طیارہکوارٹر ہارس پروگرام کا حتمی مقصد Halcyon نامی ایک ہائپرسانک مسافر بردار طیارہ تیار کرنا ہے۔ کمپنی کے ابتدائی تصورات کے مطابق یہ طیارہ تقریباً 20 مسافروں کو لے جانے کی صلاحیت کا حامل ہو گا اور میک 5 کی رفتار سے بین الاقوامی سفر کو موجودہ دور کے مقابلے میں کئی گنا مختصر بنا دے گا۔اگر یہ منصوبہ کامیاب ہوتا ہے تو نیویارک، لندن، ٹوکیو اور سنگاپور جیسے بڑے شہروں کے درمیان سفر کے اوقات نمایاں طور پر کم ہو جائیں گے۔تاہم ماہرین کا خیال ہے کہ تجارتی سطح پر ہائپرسانک پروازیں شروع ہونے میں ابھی کئی سال لگ سکتے ہیں کیونکہ رفتار کے ساتھ ساتھ حفاظت، ایندھن کی لاگت، شور، ماحولیاتی اثرات اور سرکاری منظوری جیسے مسائل بھی حل کرنا ہوں گے۔مستقبل کی سمتکوارٹر ہارس ایم کے1 کی پہلی پرواز اگرچہ ابتدائی قدم ہے لیکن اس نے یہ ثابت کر دیا ہے کہ آنے والے برسوں میں سپرسانک اور پھر ہائپرسانک رفتار کے حامل مسافر طیارے بنانے میں کامیابی ہو سکتی ہے اور دنیا ایک بار پھر فضائی سفر کے ایسے انقلاب کی گواہ بن سکتی ہے جس کا خواب کانکورڈ کے دور کے بعد تقریباً ختم ہو چکا تھا۔اب نظریں Quarterhorse کے اگلے ماڈلز پر مرکوز ہیں کیونکہ انہی کی کامیابی یا ناکامی مستقبل کے میک 5 مسافر بردار جہاز Halcyon کی قسمت کا فیصلہ کرے گی۔

ورلڈ بائیسکل ڈے

صحت مند معاشرے اور صاف ماحول کی جانب ایک قدم 3 جون کو دنیا بھر میں ورلڈ بائیسکل ڈے منایا جاتا ہے۔ اقوامِ متحدہ نے 2018ء میں اس دن کو عالمی سطح پر تسلیم کیا تاکہ سائیکل کی اہمیت، افادیت اور پائیدار نقل و حمل کے طور پر اس کے کردار کو اجاگر کیا جا سکے۔ بائیسکل صرف ایک سواری نہیں بلکہ صحت مند طرزِ زندگی، ماحولیاتی تحفظ اور معاشی بچت کا ایک مؤثر ذریعہ بھی ہے۔ پاکستان جیسے ترقی پذیر ممالک میں سائیکل کے استعمال کی اہمیت مزید بڑھ جاتی ہے ۔ یہ نہ صرف صحت کے لیے فائدہ مند ہے بلکہ اس کا کم خرچ ہونا ایک الگ خصوصیت ہے۔سائیکل انسانی تاریخ کی سب سے کامیاب اور ماحول دوست ایجادات میں شمار ہوتی ہے۔ دنیا کے کئی ترقی یافتہ ممالک، خصوصاً نیدرلینڈز، ڈنمارک اور جرمنی میں لاکھوں افراد روزانہ دفتر، تعلیمی اداروں اور دیگر مقامات تک پہنچنے کے لیے آج بھی سائیکل استعمال کرتے ہیں۔پاکستان میں بھی چند دہائیاں قبل سائیکل عام سواری سمجھی جاتی تھی اور طلبہ، مزدور، کسان اور سرکاری ملازمین بڑی تعداد میں سائیکل پر سفر کیا کرتے تھے۔ پھر ہمارے ہاں موٹر سائیکل انقلاب آیا اور سائیکل قصہ پارینہ بن گئی۔ آج ورلڈ بائیسکل ڈے ہمیں اس مفید روایت کو دوبارہ زندہ کرنے کی ترغیب دیتا ہے۔صحت مند زندگی کے لیے بہترین انتخابجدید دور میں جسمانی سرگرمیوں کی کمی کے باعث موٹاپا، دل کے امراض، ذیابیطس اور بلڈ پریشر جیسے مسائل تیزی سے بڑھ رہے ہیں۔ سائیکل چلانا ایک مکمل جسمانی ورزش ہے جو جسم کے مختلف حصوں کو متحرک کرتی ہے۔ ماہرین صحت کے مطابق روزانہ 30 سے 45 منٹ سائیکل چلانے سے دل مضبوط ہوتا ہے، خون کی گردش بہتر ہوتی ہے اور جسمانی وزن متوازن رہتا ہے۔سائیکلنگ ذہنی صحت پر بھی مثبت اثرات مرتب کرتی ہے۔ ورزش کے دوران جسم میں ایسے ہارمونز خارج ہوتے ہیں جو ذہنی دباؤ، بے چینی اور تھکن کو کم کرنے میں مدد دیتے ہیں۔ یہی وجہ ہے کہ دنیا بھر میں صحت کے ماہرین سائیکلنگ کو ایک آسان اور مؤثر ورزش قرار دیتے ہیں۔ہمارے ہاں نوجوان نسل کا زیادہ وقت موبائل فون، کمپیوٹر اور دیگر ڈیجیٹل آلات کے استعمال میں گزرتا ہے۔ اگر بچے اور نوجوان روزانہ کچھ وقت سائیکل چلانے کے لیے مختص کریں تو ان کی جسمانی اور ذہنی نشوونما بہتر ہو سکتی ہے۔ماحولیاتی آلودگی میں کمی کا ذریعہدنیا اس وقت ماحولیاتی آلودگی اور موسمیاتی تبدیلی جیسے سنگین چیلنجز کا سامنا کر رہی ہے۔ گاڑیوں اور موٹر سائیکلوں سے خارج ہونے والی گیسیں فضائی آلودگی میں اضافے کا باعث بنتی ہیں۔ بڑے شہروں میں دھواں، شور اور ٹریفک جام روزمرہ زندگی کو متاثر کر رہے ہیں۔سائیکل ایک ماحول دوست سواری ہے جو کسی طرح بھی ماحول پر منفی اثر نہیں ڈالتی۔ اگر شہری علاقوں میں مختصر فاصلے طے کرنے کے لیے سائیکل کے استعمال کو فروغ دیا جائے تو فضائی آلودگی میں نمایاں کمی لائی جا سکتی ہے۔ اس کے علاوہ سڑکوں پر ٹریفک کا دباؤ بھی کم ہوگا اور ایندھن کی بچت ممکن ہو سکے گی۔ہمارے ملک کے بڑے شہروں جیسا کہ لاہور، کراچی، فیصل آباد اور دیگر بڑے شہروں کو فضائی آلودگی کے مسائل کا سامنا ہے۔ ایسے حالات میں سائیکلنگ کلچر کو فروغ دینا ماحول دوست مستقبل کی جانب ایک اہم قدم ثابت ہو سکتا ہے۔ سائیکل کلچر کے فروغ کی ضرورتاگرچہ سائیکل کے بے شمار فوائد موجود ہیں لیکن اس کے استعمال میں کئی رکاوٹیں بھی ہیں۔مثال کے طور پر شہروں میں سائیکل سواروں کے لیے مخصوص لینز کی کمی، سڑکوں کی نامناسب حالت اور ٹریفک کے مسائل لوگوں کو سائیکل استعمال کرنے سے روکتے ہیں۔ضرورت اس امر کی ہے کہ حکومتیں اور مقامی ادارے سائیکل دوست پالیسیاں متعارف کرائیں۔ تعلیمی اداروں، پارکوں اور عوامی مقامات پر سائیکلنگ کی حوصلہ افزائی کی جائے۔ شہری منصوبہ بندی میں سائیکل ٹریکس شامل کیے جائیں تاکہ لوگ محفوظ انداز میں سفر کر سکیں۔اس کے ساتھ ساتھ والدین بھی اپنے بچوں کو سائیکلنگ کی طرف راغب کریں۔ سکولوں میں سائیکلنگ کے مقابلے، آگاہی مہمات اور کھیلوں کی سرگرمیاں اس سلسلے میں اہم کردار ادا کر سکتی ہیں۔ ورلڈ بائیسکل ڈے ہمیں یہ یاد دلاتا ہے کہ ایک سادہ سی سائیکل صحت مند زندگی، صاف ماحول اور معاشی بچت کا بہترین ذریعہ بن سکتی ہے۔ بڑھتی ہوئی آلودگی، ٹریفک کے مسائل اور صحت کے چیلنجز کے پیش نظر سائیکلنگ کو فروغ دینا وقت کی اہم ضرورت ہے۔ اگر حکومت، تعلیمی ادارے اور عوام مل کر سائیکل کے استعمال کو اپنی روزمرہ زندگی کا حصہ بنائیں تو نہ صرف انفرادی صحت بہتر ہوگی بلکہ ایک صاف، صحت مند اور پائیدار معاشرہ بھی تشکیل پائے گا۔ یہی ورلڈ بائیسکل ڈے کا اصل پیغام ہے۔

آج کا دن

3 جون پلان3 جون 1947ء برصغیر کی تاریخ کا ایک نہایت اہم دن ہے کیونکہ اس روز برطانوی حکومت نے ہندوستان کی تقسیم کا منصوبہ پیش کیا تھا جسے 3 جون پلان کہا جاتا ہے۔ اس منصوبے کا اعلان برطانوی وائسرائے لارڈ ماؤنٹ بیٹن نے کیا تھا۔ دوسری جنگِ عظیم کے بعد برطانیہ کی حکومت کمزور ہو چکی تھی اور ہندوستان میں آزادی کی تحریک اپنے عروج پر تھی۔3 جون کے منصوبے کے مطابق پنجاب اور بنگال کی تقسیم، عوامی نمائندوں کی رائے اور سرحدوں کے تعین کیلئے خصوصی کمیشن قائم کرنے کی تجاویز دی گئیں۔اسی فیصلے کے نتیجے میں 14 اگست 1947ء کو پاکستان اور 15 اگست 1947ء کو بھارت آزاد ہوئے۔ انطاکیہ کی فتح3 جون 1098ء کو پہلی صلیبی جنگ کے دوران صلیبی افواج نے انطاکیہ کے عظیم اور تاریخی شہر پر قبضہ کر لیا۔ انطاکیہ اس وقت مشرقِ وسطیٰ کا ایک اہم فوجی، تجارتی اور مذہبی مرکز تھا۔ یہ شہر موجودہ ترکی کے جنوبی حصے میں واقع تھا اور اس پر سلجوقی مسلمانوں کی حکومت تھی۔صلیبی افواج نے تقریباً آٹھ ماہ تک انطاکیہ کا محاصرہ کیے رکھا۔آخرکار شہر کے ایک محافظ کی مدد سے صلیبی فوج شہر میں داخل ہونے میں کامیاب ہوگئی اور 3 جون 1098ء کو انطاکیہ پر قبضہ کر لیا گیا۔انطاکیہ کی فتح پہلی صلیبی جنگ کا ایک اہم موڑ ثابت ہوئی کیونکہ اس سے صلیبی افواج کا حوصلہ بلند ہوا اور انہیں بیت المقدس کی جانب پیش قدمی کا موقع ملا۔ پہلی امریکی خلائی چہل قدمی3 جون 1965ء کو امریکہ نے ناسا کے تحت جیمنی 4 (Gemini 4) مشن کا آغاز کیا جو خلائی تحقیق کی تاریخ میں ایک اہم سنگِ میل ثابت ہوا کیونکہ اسی مشن کے دوران امریکی خلانورد نے پہلی مرتبہ خلا میں چہل قدمی کی۔ جیمنی 4 میں دو خلانورد شامل تھے۔ مشن کے دوران ایک خلا نورد خلائی جہاز سے باہر نکلا اور تقریباً 20 منٹ تک خلا میں رہا۔ یہ منظر پوری دنیا میں براہِ راست نشر کیا گیا اور لاکھوں لوگوں نے اسے دیکھا۔۔ جیمنی 4 مشن نے خلائی تحقیق میں نئی راہیں کھولیں اور امریکہ کی سائنسی ترقی کو عالمی سطح پر نمایاں کیا۔ آپریشن بلیو سٹار3 جون 1984ء کو بھارتی حکومت نے پنجاب میں آپریشن بلیو سٹار کا آغاز کیا۔ اس فوجی کارروائی کا مقصد امرتسر میں واقع سکھوں کے مقدس ترین مقام، گولڈن ٹیمپل، میں موجود مسلح افراد کو نکالنا تھا۔ 3 جون کو علاقے کا محاصرہ کیا گیا ۔ اس آپریشن میں ٹینک، بکتر بند گاڑیاں اور ہزاروں فوجی شامل تھے۔کارروائی کے دوران بڑی تعداد میں لوگ ہلاک ہوئے اور گولڈن ٹیمپل کی عمارت کو شدید نقصان پہنچا جس پر دنیا بھر کی سکھ برادری نے شدید ردِعمل ظاہر کیا۔ اس واقعے کے چند ماہ بعد بھارتی وزیر اعظم اندرا گاندھی کو ان کے سکھ محافظوں نے قتل کر دیا۔فرانس پر جرمن فضائی حملے3 جون 1940ء دوسری جنگِ عظیم کے دوران ایک اہم دن تھا جب نازی جرمنی نے فرانس کے مختلف شہروں خصوصاً پیرس، پر بڑے پیمانے پر فضائی حملے کیے۔ اس وقت جرمن افواج مغربی یورپ میں تیزی سے پیش قدمی کر رہی تھیں اور فرانس کو شکست کے قریب پہنچا چکی تھیں۔ جرمن فضائیہ نے فرانسیسی دفاع کو کمزور کرنے کے لیے شدید بمباری کی۔ پیرس سمیت کئی شہروں میں تباہی پھیلی، عمارتیں منہدم ہوئیں اور بڑی تعداد میں شہری متاثر ہوئے۔ ان فضائی حملوں نے جرمن زمینی افواج کی پیش قدمی کو مزید آسان بنا دیا اور بالآخر 22 جون 1940ء کو فرانس نے جرمنی کے سامنے ہتھیار ڈال دیے۔

80 سال پرانا مسئلہ اور مصنوعی ذہانت کا حیران کن حل جس نے ریاضی دانوں کو حیران کر دیا

مصنوعی ذہانت (Artificial Intelligence) مختلف شعبوں میں اپنی صلاحیتوں کا مظاہرہ تو کر ہی رہی ہے لیکن گزشتہ ہفتے OpenAI کے اس انکشاف نے دنیا بھر کے ریاضی دانوں کو حیرت میں مبتلا کر دیا کہ اس کے ایک AI ماڈل نے معروف ریاضی دان پال ایرڈوش کے اُس مسئلے کا نیا حل تجویز کیا ہے جوتقریباً 80 سال سے ریاضی دانوں کے لیے معمہ بنا ہوا تھا۔ اس پیش رفت کو بعض ماہرین مصنوعی ذہانت کی تاریخ میں ایک اہم سنگِ میل قرار دے رہے ہیں کیونکہ یہ محض تیز رفتار حساب کتاب ہی نہیں بلکہ ایک نئے ریاضیاتی ماڈل کی دریافت سے متعلق ہے۔یہ مسئلہ ہنگری کے معروف ریاضی دان پال ایرڈوش (Paul Erdos) نے 1946ء میں پیش کیا تھا۔ ایرڈوش بیسویں صدی کے عظیم ترین ریاضی دانوں میں شمار ہوتے ہیں اور انہوں نے ہزاروں ریاضیاتی مسائل اور نظریات پر کام کیا۔تاہم ان کا مذکورہ مسئلہ کئی دہائیوں تک دنیا بھر کے ریاضی دانوں کی توجہ کا مرکز بنا رہا۔مسئلہ کیا تھا؟ایرڈوش نے سوال اٹھایا تھا کہاگر ایک ہموار سطح پر بہت سے نقطے لگائے جائیں تو ان نقطوں کے درمیان ایسے نقطوں کی جوڑیوں کی زیادہ سے زیادہ تعداد کتنی ہو سکتی ہے جن کا باہمی فاصلہ بالکل ایک یونٹ ہو۔ ایسے دو نقاط جن کے درمیان فاصلہ ایک یونٹ ہو، یونٹ ڈسٹنس جوڑی (Unit Distance Pair) کہلاتے ہیں۔اس مسئلے کو Planar Unit Distance Problem کہا جاتا ہے اور بظاہر یہ ایک سادہ سا سوال معلوم ہوتا ہے لیکن اس کے پیچھے موجود ریاضی انتہائی پیچیدہ ہے۔ کئی دہائیوں تک ریاضی دان مختلف جیومیٹریکل ترتیبوں یہ معلوم کرنے کی کوشش کرتے رہے کہ زیادہ سے زیادہ کتنے نقاط اس انداز میں رکھے جا سکتے ہیں کہ ان کے درمیان ایک یونٹ فاصلے والے جوڑوں کی تعداد زیادہ سے زیادہ ہو۔وقت گزرنے کے ساتھ ایک عمومی تصور قائم ہو گیا کہ سکوئر گرڈ (Square Grid)اس مسئلے کے لیے تقریباً بہترین حل فراہم کرسکتا ہے، اگرچہ اس تصور کو مکمل طور پر ثابت نہیں کیا جا سکا لیکن بیشتر ماہرین اسے درست مانتے تھے۔بہرکیف اس مسئلے سے متعلق کئی دہائیوں تک تحقیق جاری رہی۔مصنوعی ذہانت نے کیا نیا دریافت کیا؟ جب ایک جدید AI ماڈل کے ذریعے ریاضی کے اس مسئلے پر غور کیا گیا تو حیران کن طور پر اس ماڈل نے ایک ایسی نئی جیومیٹریکل شکل (Construction) تجویز کی جو مروجہ نظریات سے مختلف تھی۔اس نئی جیومیٹریکل شکل نے اس بات کے شواہد فراہم کیے ہیں کہ کئی دہائیوں سے رائج گرڈ سکوئر کا تصور مکمل طور پر درست نہیں تھا۔ دوسرے الفاظ میں AI نے ایک ایسا حل دریافت کیا جس نے پرانے اندازوں کو غلط ثابت کر دیا ہے۔مزید دلچسپ بات یہ ہے کہ مصنوعی ذہانت نے اس حل تک پہنچنے کے لیے ریاضی کے ایک نسبتاً غیر متوقع شعبے، Algebraic Number Theory، سے تعلق رکھنے والے خیالات استعمال کیے ہیں۔ عام طور پر اس مسئلے کے بارے میں سوچتے وقت ریاضی دان جیومیٹری پر زیادہ توجہ دیتے تھے لیکن AI نے مختلف ریاضیاتی شعبوں کے درمیان تعلق تلاش کرتے ہوئے ایک نئی راہ دریافت کی۔یہی وہ پہلو ہے جس نے ماہرین کو سب سے زیادہ متاثر کیا کیونکہ اس سے ظاہر ہوتا ہے کہ مصنوعی ذہانت بعض اوقات ایسے راستے تلاش کر سکتی ہے جن کے بارے میں انسانوں نے پہلے غور نہ کیا ہو۔ماہرین ِ ریاضی کا ردِعملاس پیش رفت پر دنیا کے کئی ممتاز ریاضی دانوں نے مثبت ردِعمل ظاہر کیا ہے۔ معروف برطانوی ریاضی دان ٹموتھی گوورز (Timothy Gowers) جو فیلڈز میڈل حاصل کر چکے ہیں، نے کہا کہ اگر یہی نتیجہ کسی انسانی محقق کی جانب سے پیش کیا جاتا تو میں اسے اعلیٰ درجے کے جرنل میں شائع کرنے کی سفارش کرنے میں کوئی ہچکچاہٹ محسوس نہ کرتا۔اسی طرح دیگر ماہرین نے بھی اس کام کو غیر معمولی قرار دیا ہے۔ بعض ریاضی دانوں کے مطابق یہ پہلی بار ہے کہ مصنوعی ذہانت نے ایسا ریاضیاتی نتیجہ پیش کیا ہے جو اپنی ذات میں تحقیقی اہمیت رکھتا ہے اور جسے صرف کمپیوٹر کی حسابی طاقت کا نتیجہ قرار نہیں دیا جا سکتا۔اگرچہ بعد میں انسانی محققین نے اس دریافت کا تفصیلی جائزہ لیا اور مزید بہتریاں بھی تجویز کیں لیکن بنیادی خیال مصنوعی ذہانت کی جانب سے سامنے آیا تھا۔ یہی وجہ ہے کہ اس کامیابی کو AI اور انسانی تحقیق کے اشتراک کی ایک اہم مثال سمجھا جا رہا ہے۔کیا مسئلہ مکمل طور پر حل ہو گیا؟یہاں ایک اہم نکتہ سمجھنا ضروری ہے کہ AI نے پورے Planar Unit Distance Problemکا مکمل حل پیش نہیں کیا اور مسئلہ اب بھی ریاضی دانوں کے لیے ایک چیلنج ہے اور اس کے کئی پہلو ابھی تحقیق طلب ہیں۔البتہ مصنوعی ذہانت نے اس مسئلے سے متعلق ایک معروف اندازے کو غلط ثابت کر کے تحقیق کا رخ موڑ دیا ہے۔ ریاضی کی دنیا میں اکثر ایسا ہوتا ہے کہ کسی مسئلے کا مکمل حل حاصل ہونے سے پہلے کئی اہم جزوی نتائج سامنے آتے ہیں۔ یہ دریافت بھی انہی اہم سنگِ میل میں سے ایک تصور کی جا رہی ہے۔مستقبل میں مصنوعی ذہانت کا کرداراس پیش رفت نے ایک نئی بحث کو جنم دیا ہے کہ آیا مستقبل میں مصنوعی ذہانت سائنسی اور ریاضیاتی تحقیق میں ایک فعال معاون بن سکتی ہے۔ ماہرین کا خیال ہے کہ AI انسانی محققین کی جگہ نہیں لے گی لیکن یہ پیچیدہ مسائل میں نئی راہیں اور غیر متوقع خیالات ضرور فراہم کر سکتی ہے۔ریاضی، فزکس ، بیالوجی اور دیگر سائنسی شعبوں میں ایسے بے شمار مسائل موجود ہیں جن پر کئی دہائیوں سے تحقیق جاری ہے۔ اگر مصنوعی ذہانت اسی رفتار سے ترقی کرتی رہی تو ممکن ہے کہ مستقبل میں یہ نئی دریافتوں اور نظریات کی تشکیل میں اہم کردار ادا کرے۔

کوٹ ڈیجی: وادیٔ سندھ کی تہذیب کے آغاز کی کہانی

ملکِ عزیز پاکستان کی سرزمین دنیا کی قدیم ترین تہذیبوں کی امین ہے۔ وادیٔ سندھ کی تہذیب کو طویل عرصے تک موئن جو دڑو اور ہڑپہ کے تناظر میں دیکھا جاتا رہا لیکن 1957-58ء میں سندھ کے تاریخی مقام کوٹ ڈیجی میں ہونے والی آثارِ قدیمہ کی کھدائیوں نے اس تصور کو نئی جہت عطا کی۔ محکمہ آثارِ قدیمہ کے اُس وقت کے سربراہ ڈاکٹر ایف اے خان کی سربراہی میں ہونے والی ان کھدائیوں نے ثابت کیا کہ وادیٔ سندھ کی ترقی یافتہ شہری تہذیب اچانک وجود میں نہیں آئی بلکہ اس کے پیچھے ایک قدیم اور منظم ثقافتی پس منظر موجود تھا۔ڈاکٹر ایف اے خان کے مطابق کوٹ ڈیجی کی تہذیب موئن جو دڑو اور ہڑپہ کی معروف تہذیب سے پہلے کی ایک اہم ثقافتی کڑی ہے۔ اس دریافت نے ماہرین آثارِ قدیمہ کو یہ سمجھنے میں مدد دی کہ وادیٔ سندھ کی تہذیب کے ارتقا کا عمل کئی صدیوں پر محیط تھا۔قلعہ بند شہر اور منظم شہری زندگیکوٹ ڈیجی کا آثارِ قدیمہ کا مقام دو حصوں پر مشتمل ہے، ایک بلند قلعہ نما حصہ اور دوسرا اس کے گرد پھیلا ہوا شہری علاقہ۔ کھدائیوں سے معلوم ہوا کہ یہاں کے باشندوں نے مضبوط دفاعی فصیلیں تعمیر کی تھیں جن میں پتھر اور کچی اینٹیں استعمال کی گئی تھیں۔ دیواروں کو برجوں کے ذریعے مزید مضبوط بنایا گیا تھا، جو اس بات کا ثبوت ہیں کہ یہاں کے لوگ دفاعی حکمتِ عملی اور تعمیراتی مہارت سے بخوبی واقف تھے۔کھدائی کے دوران کشادہ کمروں، فرشوں، ذخیرہ گاہوں اور رہائشی ڈھانچوں کے آثار بھی دریافت ہوئے۔ گھروں میں مٹی کے برتن، ذخیرہ کرنے کے بڑے مرتبان، بچوں کے کھلونے، گیندیں، کنچے، چوڑیاں اور مختلف قسم کے زیورات ملے۔ یہ اشیا ظاہر کرتی ہیں کہ کوٹ ڈیجی کے باشندے ایک منظم اور نسبتاً خوشحال معاشرے میں زندگی گزار رہے تھے۔تحقیق سے یہ بھی معلوم ہوا کہ یہاں کے مکانات منصوبہ بندی کے تحت تعمیر کیے گئے تھے۔ اس سے اندازہ ہوتا ہے کہ شہری نظم و نسق اور اجتماعی منصوبہ بندی کا تصور اس دور میں بھی موجود تھا جو بعد میں ہڑپہ اور موئن جو دڑو کی ترقی یافتہ شہری تہذیب میں مزید نکھر کر سامنے آیا۔کوٹ ڈیجی کی منفرد ثقافت اور فنڈاکٹر ایف اے خان کی رپورٹ میں کوٹ ڈیجی کے برتنوں کو اس تہذیب کی نمایاں ترین خصوصیات میں شمار کیا گیا ہے۔ یہاں سے دریافت ہونے والی مٹی کی اشیا نہایت عمدہ معیار کی ہیں۔ ان کا رنگ گلابی سے سرخی مائل ہے اور ان پر سیاہ، بھورے اور سرخی مائل رنگوں سے دلکش نقش و نگار بنائے گئے ہیں۔خاص طور پر مچھلی کے چھلکوں جیسے ڈیزائن، لہردار خطوط، حلقے اور دیگر جیومیٹریکل نمونے اس فن کے اعلیٰ معیار کی نشاندہی کرتے ہیں۔ بعض برتنوں پر سینگوں والے دیوتا کی تصویر بھی پائی گئی جسے ڈاکٹر خان نے نہایت منفرد اور نادر قرار دیا ہے۔ ان کے مطابق اس قسم کا ڈیزائن اس سے پہلے برصغیر کی کسی قدیم تہذیب کے برتنوں پر دریافت نہیں ہوا ۔یہ برتن اس بات کا ثبوت ہیں کہ کوٹ ڈیجی کے باشندے نہ صرف فنی ذوق رکھتے تھے بلکہ ان کے ہاں ایک مضبوط ثقافتی شناخت بھی موجود تھی۔ کوٹ ڈیجی طرز کے برتن ہڑپہ اور دیگر مقامات پر بھی دریافت ہوئے ہیں جس سے ظاہر ہوتا ہے کہ اس ثقافت کے اثرات وسیع علاقے تک پھیلے ہوئے تھے۔موئن جو دڑو سے پہلے کی تہذیبکوٹ ڈیجی کی سب سے بڑی اہمیت اس حقیقت میں پوشیدہ ہے کہ اس نے وادیٔ سندھ کی تہذیب کے آغاز کے بارے میں رائج تصورات کو تبدیل کر دیا۔ کھدائیوں سے واضح ہوا کہ موئن جو دڑو کی ابتدائی آبادی دراصل کوٹ ڈیجی کے قدیم باشندوں کی بستی کے اوپر آباد ہوئی تھی۔ اس کا مطلب یہ ہے کہ کوٹ ڈیجی کی تہذیب موئن جو دڑو اور ہڑپہ کی ترقی یافتہ تہذیب سے پہلے موجود تھی۔ڈاکٹر ایف اے خان کے مطابق کوٹ ڈیجی کی تہذیب ممکنہ طور پر 3000 قبل مسیح کے آس پاس موجود تھی، جبکہ ہڑپہ اور موئن جو دڑو کی تہذیب کا دور عموماً 2500 تا 2300 قبل تھا۔ اس طرح کوٹ ڈیجی وادیٔ سندھ کی تہذیبی تاریخ کو کئی صدیوں پیچھے لے جاتی ہے۔کھدائیوں میں آگ اور سیلاب کے شواہد بھی ملے اور قلعے کے بالائی حصوں میں جلی ہوئی مٹی کی موٹی تہہ دریافت ہوئی جس سے اندازہ ہوتا ہے کہ آتش زدگی کے کسی بڑے واقعے نے اس بستی کو تباہ کیا۔ ڈاکٹر خان کا خیال ہے کہ اسی تباہی کے بعد ہڑپہ اور موئن جو دڑو سے وابستہ ثقافت نے اس مقام پر جگہ بنائی۔یہ دریافت اس نظریے کو تقویت دیتی ہے کہ وادیٔ سندھ کی عظیم تہذیب مقامی ارتقائی عمل کا نتیجہ تھی۔ اگرچہ اس کے بیرونی روابط موجود تھے لیکن اس کی بنیادی ترقی اسی خطے میں ہوئی۔ کوٹ ڈیجی اس ارتقائی سفر کی ایک اہم کڑی ہے جو ہمیں بتاتی ہے کہ انسانی تہذیبیں اچانک جنم نہیں لیتیں بلکہ صدیوں کے تجربات، اختراعات اور ثقافتی ترقی کے نتیجے میں پروان چڑھتی ہیں۔کوٹ ڈیجی کی کھدائیاں آج بھی پاکستان کی آثارِ قدیمہ کی تاریخ میں سنگِ میل کی حیثیت رکھتی ہیں۔ یہ مقام نہ صرف سندھ بلکہ پوری جنوبی ایشیا کی قدیم تاریخ کو سمجھنے کی کلید فراہم کرتا ہے اور ثابت کرتا ہے کہ اس خطے کے باشندے پانچ ہزار سال قبل بھی تعمیر، فن، تجارت اور سماجی تنظیم کے اعلیٰ معیار سے واقف تھے۔

آج کا دن

ملکہ الزبتھ کی تاج پوشی2 جون 1953 ء کو برطانیہ کی ملکہ الزبتھ دوم کی تاج پوشی لندن کے مشہور چرچ ویسٹ منسٹر ایبے میں ہوئی۔ اگرچہ وہ اپنے والد شاہ جارج ششم کے انتقال کے بعد 1952ء میں تخت نشین ہو چکی تھیں لیکن برطانوی روایات کے مطابق ان کی رسمی تاج پوشی ایک سال بعد منعقد کی گئی۔اس تقریب میں دنیا بھر سے سربراہانِ مملکت، شاہی خاندانوں کے افراد اور سفارتی نمائندوں نے شرکت کی۔ یہ تقریب اس لحاظ سے بھی منفرد تھی کہ پہلی مرتبہ کسی برطانوی تاج پوشی کو ٹیلی ویژن پر براہِ راست نشر کیا گیا۔ ملکہ الزبتھ دوم برطانیہ کی تاریخ کی سب سے طویل عرصے تک حکمرانی کرنے والی ملکہ بنیں۔ اٹلی کا یوم جمہوریہ 2 جون 1946ء کو اٹلی میں ایک تاریخی ریفرنڈم منعقد ہوا جس کے نتیجے میں صدیوں پرانی بادشاہت کا خاتمہ اور جمہوریہ کے قیام کا فیصلہ کیا گیا۔ دوسری جنگِ عظیم کے بعد اٹلی شدید سیاسی بحران کا شکار تھا اور عوام کی بڑی تعداد شاہی خاندان کو جنگی تباہی کا ذمہ دار سمجھتی تھی۔ریفرنڈم میں لاکھوں شہریوں نے حصہ لیا اور اکثریت نے جمہوری نظام کے حق میں ووٹ دیا۔اس ریفرنڈم کی ایک اور تاریخی اہمیت یہ تھی کہ اطالوی خواتین نے پہلی مرتبہ قومی سطح پر ووٹ کا حق استعمال کیا۔ جمہوریہ کے قیام کے بعد اٹلی نے نیا آئین تشکیل دیا اور جمہوری اداروں کی بنیاد رکھی۔ پی ایل او کا قیام 2 جون 1964 کوفلسطین لیبریشن آرگنائزیشن (پی ایل او) کے قیام کا اعلان کیا گیا۔1960ء کی دہائی میں مسئلہ فلسطین مشرقِ وسطیٰ کی سیاست کا مرکزی موضوع بن چکا تھا۔ مختلف فلسطینی گروہوں کو ایک متحد پلیٹ فارم فراہم کرنے کے لیے اس تنظیم کی بنیاد رکھی گئی تاکہ وہ اپنی قومی شناخت اور سیاسی مطالبات کو مؤثر انداز میں دنیا کے سامنے پیش کر سکیں۔بعد ازاں پی ایل او فلسطینی عوام کی سب سے بڑی نمائندہ تنظیم بن گئی۔ 1990ء کی دہائی میں اوسلو امن مذاکرات کے دوران بھی پی ایل او نے مرکزی کردار ادا کیا۔ سرویئر-1 چاند پراترا 2 جون 1966ء کو امریکی خلائی ادارے ناسا کے خلائی جہازسروئیر- 1 نے چاند کی سطح پر کامیاب لینڈنگ کی۔اس مشن کا بنیادی مقصد چاند کی سطح کا مطالعہ کرنا اور یہ جانچنا تھا کہ آیا وہاں مستقبل میں انسانوں کی لینڈنگ ممکن ہوگی یا نہیں۔ سرویئر-1 نے ہزاروں تصاویر زمین پر ارسال کیں جنہوں نے سائنسدانوں کو چاند کی ساخت اور سطح کے بارے میں قیمتی معلومات فراہم کیں۔یہ کامیابی امریکہ اور سوویت یونین کے درمیان جاری خلائی دوڑ میں ایک اہم پیش رفت تھی۔ انہی معلومات کی بنیاد پر بعد میں اپالو پروگرام کو مزید ترقی دی گئی جس کے نتیجے میں 1969ء میں انسان پہلی مرتبہ چاند پر پہنچا۔وائرلیس ریڈیو پیٹنٹ2 جون 1896ء کو اطالوی موجد مارکونی نے برطانیہ میں وائرلیس ٹیلی گرافی کے اپنے نظام کیلئے پیٹنٹ کی درخواست جمع کروائی۔ یہ واقعہ جدید ریڈیو مواصلات کی تاریخ میں ایک بنیادی سنگِ میل سمجھا جاتا ہے۔اس دور میں مواصلات زیادہ تر تاروں کے ذریعے انجام پاتے تھے، جس کی وجہ سے دور دراز علاقوں اور سمندری راستوں میں رابطہ قائم کرنا مشکل تھا۔ ان کی ایجاد کی بدولت بحری جہازوں اور ساحلی مراکز کے درمیان رابطہ ممکن ہوا۔