جینز دنیا کا مقبول ترین کپڑا
![جینز دنیا کا مقبول ترین کپڑا](https://dunya.com.pk/news/special_feature/specialFeature_img/27815_49840954.jpg)
اسپیشل فیچر
'' جینز ‘‘ جو کپڑے کی ایک قسم ''ڈینم‘‘ سے بنتی ہے ، بلاشبہ اس وقت دنیا کا ایک مقبول ترین کپڑا ہے۔ اس کے پہننے والے، اس کے بنانے والے اور اس کے بیچنے والے بجا طور پر یہ دعویٰ کرتے ہیں کہ آج تک دنیا بھر میں کسی کپڑے کو اتنی مقبولیت نہیں ملی جتنی جینز کو ملی ہے۔ اس کی مقبولیت میں اس کو یہ اعزاز بھی جاتا ہے کہ یہ کپڑا قطع نظر عمر، جنس اور کلچر دنیا کے ہر کونے میں یکساں مقبول ہے۔
یہ کپڑا کب ، کیسے اور کہاں ایجاد ہوا ؟
اس کی تاریخ بھی اتنی ہی دلچسپ ہے جس قدر یہ مقبول ہے۔جین فسٹئین نامی سوتی کپڑا 16 ویں صدی کے آس پاس جینیوا کامقبول ترین کپڑا ہوا کرتا تھا جو پوری دنیا میں ایک آرام دہ اور پر وقار کپڑے کے طور پر جانا جاتا تھا۔ مورخین کہتے ہیں کہ بنیادی طور پر یہی کپڑا ''جینز‘‘کی ایجاد کا باعث بنا۔ جینز کا ''جنم‘‘ دراصل ایک حادثے کا نتیجہ ہے۔ اس ایجاد کے پیچھے چھپی کہانی کچھ اس طرح سے ہے کہ فرانس کے شہر نمز کے کچھ جولاہے، جن کا یہ دعویٰ تھا کہ وہ اچھے سے اچھا کپڑا بنانے پر ملکہ رکھتے ہیں۔ایک دن وہ سوتی کپڑا جین فسٹئین بنانے کی کوشش کررہے تھے جو ان سے نہ بن پایالیکن بنتے بگڑتے یہ کچھ اور ہی شے بن گئی۔ پہلے تو انہیں اس ناکامی پر ملال ہوا لیکن مزید غور کرنے پر یہ اس نتیجے پر پہنچے کہ اس '' بگاڑ‘‘ میں بھی کچھ نیا پن ہے۔ یہ دراصل''جینز ‘‘کا ایسا جنم تھا ،جس کا ان پریشان حال جولاہوں کے وہم و گمان میں بھی نہ تھا کہ آنے والے وقتوں میں یہ دنیا کا ایک مقبول ترین کپڑا بن جائے گا۔
تاریخ گواہ ہے کہ کسی بھی چیز کی ایجاد کے پس پردہ متعدد عوامل کارفرما ہوتے ہیں۔ بعض مورخین کا کہنا ہے کہ جینز سے پہلے بھی اس سے ملتا جلتا ایک کپڑا ہندوستان میں 16 ویں صدی کے اوائل میں رواج پا چکا تھا۔ جسے مقامی زبان میں ''ڈگاری‘‘کہا جاتا تھا ، اسے بعد ازاں نیلے رنگ میں رنگ کر ممبئی کے ڈوگار قلعہ کے پاس فروخت کیا جاتا تھا۔ شروع شروع میں جب ملاحوں کی اس پر نظر پڑی تو انہوں نے اسے اپنے لئے سہل پایا تو اس کی پتلونیں بنوانا شروع کر دیں۔
جینز سے ملتاجلتا ایک اور کپڑا 16 ویں ہی صدی میں اٹلی کے ایک قصبے ٹیورن میں تیار کیا جانے لگا۔اس نئے کپڑے پر جب جینیوا کے ملاحوں کی نظر پڑی تو ا نہوں نے بھی اسے اپنی پینٹوں کیلئے سازگار اور موزوں پایا۔جینیوا چونکہ ایک آزاد جمہوریہ کا دارالحکومت تھا جس کی بحریہ اپنے دور کی ایک طاقتور بحریہ تھی۔ سب سے پہلے جینیوا کی بحریہ نے اپنے ملاحوں کیلئے پتلونیں اس کپڑے سے بنوائیں ۔ دراصل انہیں ایسے ہی کپڑے کی پتلونیں چاہئیے تھیں جنہیں خشک یا گیلا دونوں صورتوں میں پہنا جا سکے ، اس کے ساتھ ساتھ ڈیک کی صفائی کے دوران پینٹ کے پائنچوں کو باآسانی اوپر کی طرف موڑا بھی جا سکے۔ دھلائی کے دوران جینز کی پینٹوں کو بڑے بڑے جالوں میں باندھ کر سمندر کی لہروں کے سامنے رکھ دیا جاتا تھا جس سے یہ بہت اچھے طریقے سے دھل جاتی تھیں اور تھوڑی ہی دیر میں سمندر کی تیز ہوائیں انہیں سکھا بھی دیتی تھیں۔ مورخین کا کہنا ہے کہ جینیوا کے نام ہی کی مناسب سے ان پتلونوں کانام ''جینز‘‘ مشہور ہوا ۔ علاوہ ازیں اس کپڑے کا خام مال فرانس کے شہر نمز سے آتا تھا جسے مقامی زبان میں ''دی نم‘‘ کہا جاتا تھا ، یہیں سے اس کپڑے کا نام ''ڈینم‘‘ کی شہرت اختیار کر گیا۔
جینز کی پتلونیں بنیادی طور پر محنت کش طبقے کی آسانی کو مدنظر رکھ کر بنائی گئی تھیں لیکن وقت کے ساتھ ساتھ انسانی زندگی میں روز بروز بڑھتی مصروفیات اور وقت کی قلت نے دفتروں میں کام کرنے والے دیگر کارکنوں کو بھی اس پہناوے کا گرویدہ بنا دیا۔ صحیح طور پر جینز کو مقبولیت دینے میں نوجوانوں کا کلیدی کردارہے جنہوںنے 1950ء کی دہائی میں اسے بطور فیشن اپنانا شروع کر دیا تھا۔ اس کی مقبولیت دیکھتے ہوئے عالمی شہرت یافتہ کمپنیاں، لیوائس، رینگکر اور ذوڈائک میدان میں آئیں اور جس سے اس پراڈکٹ کو چار چاند لگنا شروع ہو گئے اور آج بقول ''گلوبل ڈینم پراجیکٹ ‘‘ ،''سال کے کسی بھی دن دنیا کی آبادی کی اکثریت جینز یا ڈینم زیب تن کئے نظر آتی ہے ‘‘۔
جینز عالمی لباس کیسے بنا؟
جینز کو عالمی طور پر متعارف کرانے میں دو نوجوانوں جیکب جوفیوس اور لوئب سیٹراس کا کلیدی کردار نظر آتا ہے ، جن کا تعلق جرمن اور لٹویا سے تھا۔جیکب اور لوئب نے 1870ء میں اپنے اپنے ملک سے امریکہ کا رخ کیا۔ بہت سارے دوسرے لوگوں کی طرح انہوں نے بھی اپنے اپنے نام بدل لئے۔ جیکب جوفیوس، ڈیوس جبکہ لوئب سیٹراس، لیوی سٹیراس بن گئے تھے۔ڈیوس جو بنیادی طور پر ایک درزی تھے انہیں ایک پتلون کی سلائی کا آرڈر ملا۔انہوں نے یہ سوچ کر کہ اس طرح اس پتلون کی مضبوطی میں خاطر خواہ اضافہ ہو جائے گا، انہوں نے اس کی پشت پر ایک بیج کا اضافہ کردیا۔اس پتلون کی شہرت چاروں طرف کیا پھیلی کہ ایک ہی ماہ کے اندر اس قسم کی پتلون کے لاتعداد آرڈر انہیں ملنا شروع ہو گئے۔
جب مانگ بڑھی تو ڈیوس نے سان فرانسسکو میں کپڑا سپلائی کرنے والے لیوی سے رابطہ کیا۔ لیوی نے موقع کی نزاکت بھانپتے ہوئے ڈیوس کو سان فرانسسکو فوری پہنچنے کا مشورہ دیا جہاں دونوں نے مل کر باقاعدہ طور پر دنیا کہ پہلی جینز (پینٹ ) تیار کی۔ڈینم سے بنی جینز کی یہ خصوصیت ہے کہ اسے جتنا زیادہ دھوئیں گے یہ اتنا ہی نرم ہوتا چلا جائے گا اور محنت کشوں کے لئے دراصل ایسا ہی کپڑا موزوں اور موافق تھا جو آرام دہ تھا لیکن نازک نہیں تھا۔جینز کی اسی خاصیت نے رفتہ رفتہ اسے پوری دنیا میں ایک مقبول لباس بنا دیا۔
جینز کی تیاری میں پاکستان کا کردار
پاکستان میں فیصل آباد کی زرعی یونیورسٹی کو یہ اعزاز جاتا ہے کہ اس نے بھنگ کے پودے کے ریشوں کو کپاس کے ساتھ ملا کر ایک ایسی پائیدار جینز بنا ئی ہے جس کی مانگ امریکہ اور یورپ میں دن بدن بڑھ رہی ہے۔ ماہرین کا دعویٰ ہے کہ بھنگ ملی جینز کی خاص بات یہ ہے کہ یہ روائتی جینز کے مقابلے میں نہ صرف ایک پائیدار جینز ہے بلکہ عالمی منڈی میں اس کی قیمت بھی بہت زیادہ ہے۔پاکستان کو اللہ نے خودرو جنگلی بھنگ کی دولت سے مالا مال کر رکھا ہے ، جسے نہ تو کھاد اور نہ ہی پانی کی ضرورت ہوتی ہے بلکہ یہ پودے بارش کے پانیوں میں پرورش پاتے ہیں۔اس سے پہلے جنگلی بھنگ نہ صرف ملکی ادویات کی ضروریات پورا کرتی تھی بلکہ دوسرے ملکوں کو بر آمد بھی کی جاتی تھی۔اب پاکستان میں جنگلی بھنگ کی وافر مقدار میں دستیابی سے جینز بنانے کی لاگت میں خاطر خواہ کمی کے باعث پاکستان عالمی منڈی میں کئی گنا زیادہ منافع کما رہا ہے۔