چائے کی کاشت ، صدیوں پرانا راز
![چائے کی کاشت ، صدیوں پرانا راز](https://dunya.com.pk/news/special_feature/specialFeature_img/27817_63522153.jpg)
اسپیشل فیچر
آج ہماری زندگی میں پانی کے بعد اگر کوئی چیز بہت عام ہے تو وہ چائے ہے۔ تقریباً ہر شخص شوق سے چائے پینا پسند کرتا ہے۔ ہر گھر میں صبح کے وقت چائے پی جاتی ہے اور بغیر چائے کے ایسا محسوس کیا جاتا ہے کہ ہم قدرت کی کسی نعمت سے محروم ہیں۔اتنی زیادہ استعمال ہونے والی چائے کے بارے میں بہت کم لوگ جانتے ہیںکہ چائے کی دریافت کس نے کی تھی۔ چائے کی کھوج کے سلسلے میں کئی دلچسپ کہانیاں مشہور ہیں۔
بہت عرصہ پہلے چین میں ایک بادشاہ حکومت کرتا تھا۔ ایک بار اس کو چھوت کی بیماری ہو گئی، اس نے اس بیماری کا بہت علاج کیا، بڑے بڑے حکیموں اور ڈاکٹروں کو بلایا گیا لیکن کوئی بھی بادشاہ کے اس مرض کو صحیح طور پر پہچان نہ سکا۔ کافی علاج کرنے کے بعد بھی بادشاہ کا مرض ٹھیک نہیں ہوا۔ ایک دن بادشاہ وزیر کے ساتھ شاہی باغ میں ٹہلنے نکلا اور اپنی بیماری کے بارے میں وزیر کو بتا کر کہنے لگامیں شاید ہی صحت مند ہو سکوں مجھے صحت یاب ہونے کی کوئی امید نظر نہیں آتی۔ بادشاہ کی بات سن کر وزیر نے کہا کہخدا کی طرف سے کبھی ناامید نہیں ہونا چاہئے۔ابھی یہ گفتگو ہو ہی رہی تھی کہ ان کے پاس ایک چھوٹی ڈالی گری جس میں ہرے پتے لگے ہوئے تھے۔ وزیر نے نظر اوپر ڈالی دیکھا کہ ایک کوا پودے پر بیٹھا ہوا ہے اور اس نے یہ ڈالی پھینکی تھی۔ بادشاہ نے اس ڈالی کو اٹھا لیا اور کہا شاید خدا نے یہ ہمارے لئے بھیجی ہے ضرور اس میں قدرت کی کوئی مصلحت ہے پھر وزیر نے ڈالی کے پتے کو پانی میں اُبال کر بادشاہ کو پینے کو دیا۔ قدرت کی مہربانیوں کا کیا کہنا کہ اس پانی کے پینے کے بعد بادشاہ کی بیماری میں حیرت انگیز طور پر کمی ہوئی۔ بادشاہ نے لوگوں کو اس ڈالی کے بارے میں معلومات حاصل کرنے کیلئے کہا۔ کافی تحقیق کے بعد کامیابی حاصل ہوئی۔ بادشاہ نے اس پودے کی کاشت کرائی۔ یہ وقت کے ساتھ مشہور ہوتی گئی۔ یہ چائے کا درخت تھا جو پہلی بار دریافت کیا گیا تھا اور وہ بادشاہ شاید دنیا کا پہلا انسان تھا جس نے چائے پی۔
چائے کا پیدائشی مقام چین کو مانا جاتا ہے۔ سب سے پہلے چائے کا استعمال چین میں شروع ہوا۔یہ کوئی 2700سال قبل عیسوی کی بات ہے۔ سائنسدانوں کے خیال میں 1000ء میں چائے چین سے جاپان پہنچی اور 16ویں صدی میں یہ یورپ کے بازاروں میں آئی اور پھر 1820ء میں جاوا اور 1830ء میں یہ ہندوستان پہنچی۔ پہلے چائے کا استعمال زیادہ تر دوا کے طور پر ہوتا تھا۔ یہ مشروب کے طور پر بہت کم استعمال ہوتی تھی۔ اس کی کاشت روس، برازیل اور افریقہ میں بھی ہوتی ہے، لیکن چائے کی سب سے زیادہ کاشت ہندوستان کے صوبہ آسام میں ہوتی ہے۔
چائے کا پودا جھاڑی جیسا ہوتا ہے۔ اس کی اونچائی تقریباً تین یا چار فٹ ہوتی ہے۔ چائے کی پتیاںآٹھ یا دس دن کے بعد توڑی جاتی ہیں۔ ویسے تو پہلے سال سے ہی چائے کی پتیاں توڑی جا سکتی ہیں لیکن ایک پودے کو پوری طرح سے بڑھنے میں تقریباً پانچ سال لگ جاتے ہیں اور چائے کے ایک پودے کی عمر انسان کی طرح تقریباً ساٹھ سال تک ہوتی ہے۔پتیاں توڑنے کے بعد چائے تیار کی جاتی ہے۔ آسام کی چائے کی پتیاں بڑی ہوتی ہیں اور ان کی کاشت میدان میں ہوتی ہے۔ اس کے برخلاف چین میں پیدا ہونے والی چائے کی پتیاں چھوٹی ہوتی ہیں اور ان کی کاشت پہاڑی علاقوں میں کی جاتی ہے۔ آسام کی چائے رنگ میں اپنا جواب نہیں رکھتی اور خوشبو میں دارجلنگ کی چائے دنیا میں اپنی مثال آپ ہے۔ چائے کے پودے کو سمندر کی سطح سے تقریباً آٹھ ہزار فٹ کی اونچائی تک پہاڑوں کے ڈھالوں پر کامیابی کے ساتھ اْگایا جا سکتا ہے۔ چائے کی جھاڑیوں کا منظر بے حد خوبصورت ہوتا ہے۔ اگر آپ چائے کے باغ کو دیکھیں تو آپ کو ساری زندگی یاد رہے گا۔
چائے کی کاشت کیلئے تیزابی مٹی بہت ضروری ہے اور ایسی آب و ہوا جس میں مسلسل بارش ہوتی رہے۔ اس کی کاشت کیلئے موزوں خیال کی جاتی ہے۔ عام طور پر چائے کے پتے اکتوبر تک جھڑ جاتے ہیں اور اسی وقت سردی شروع ہوتی ہے اس کے بعد مارچ کے قریب چائے کے پتے دوبارہ نکل آتے ہیں۔ اس کا فائدہ یہ ہوتا ہے کہ سردیوں میں پتے نہ ہونے سے روشنی کافی ہوتی ہے جبکہ گرمی میں پتیوں سے روشنی کم چھنتی ہے۔ اس قدرتی نظام سے زمین کی زرخیزی بڑھ جاتی ہے۔ کیونکہ چائے کے درخت نائیٹروجن مہیا کرتے ہیں اور گرنے والے پتے آہستہ آہستہ کھاد میں تبدیل ہو جاتے ہیں اور مٹی زرخیز ہو جاتی ہے۔ چائے کی تیاری میں نئی پتیاں (دو پتی اور ایک کلی) توڑی جاتی ہیں۔ پھر استعمال ہوتی ہے۔ پرانے پتے استعمال نہیں ہوتے۔ اگر آپ دو پتیوں اور ایک کلی سے زیادہ توڑ دیں گے تو چائے کے خراب ہونے کا امکان پیدا ہو جاتا ہے۔ پتیوں کو توڑنے کا مشکل کام عورتیں کرتی ہیں۔ پتیوں کو توڑنے کے بعد انہیں خشک کیا جاتا ہے تاکہ ان میں کچھ کیمیاوی تبدیلی پیدا ہو جائے۔ عمل سولہ سے بیس گھنٹے تک جاری رہتا ہے۔اس کے بعد چائے کی پتی رولر مشین میں ڈال دی جاتی ہے۔ جہاں پتی کو مروڑا جاتا ہے۔ اس سے نکلنے والے سیال کو برابر پھیلا دیا جاتا ہے۔ پھر دوسری مشین میں ڈال کر پتیوں پر بَل ڈالا جاتاہے۔ پھر انہیں توڑنے اور پیسنے کے عمل سے گزرنا ہوتا ہے۔ اس عمل میں تقریباً ایک گھنٹہ لگ جاتا ہے۔ اس کے بعد ان پتیوں کو بہت چھوٹے ٹکڑوں میں مشین کے ذریعے علیحدہ کرتے ہیں اور ٹھنڈی جگہ پر تھوڑی دیر کیلئے رکھتے ہیں۔ اس دوران میں کیمیاوی تبدیلیاں ہوتی ہیں اور اب چائے کی کیفیت پیدا ہو جاتی ہے۔ اس طریقے کو فرمنٹیشن کہتے ہیں جس کے بعد پتیاں بھورا رنگ اختیار کر لیتی ہیں۔ پھر انہیں چھوٹی بڑی چھلنی سے علیحدہ کر لیا جاتا ہے۔
چائے کی قسم بہت سی باتوں پر منحصر ہوتی ہے مثال کے طور پر پودے کی عمر، اْگانے کی جگہ، مٹی، آب و ہوا، توڑنے کا وقت اور پتیوں پر عمل سے ہے۔ گولڈن چائے کی تیاری کیلئے صرف کچی کلیوں کو ہی استعمال میں لایا جاتا ہے۔ چائے تیار کرتے وقت اس کا خیال رکھا جاتا ہے کہ اس کی لذت، خوشبو اور رنگ باقی رہے۔ اس کے ساتھ چائے کے مفید اجزا بھی باقی رہیں۔
اور یہی وجہ ہے کہ جب ہم چائے کو اْبالتے ہیں تو چائے کو ایک مناسب مقدار میں کھولتے ہوئے پانی میں ڈالتے ہیں اور اس کا اثر یہ ہوتا ہے کہ چائے کی پتیوں میں موجود الکولائیڈ اور تیل فوراً پانی میں گھل جاتا ہے، جس سے اس پانی کا رنگ، خوشبو اور لذت اب کچھ اور ہی ہو جاتی ہے، لیکن اگر ہم چائے کو زیادہ دیر تک اْبالتے رہیں اور کھولاتے رہیں تو چائے کی پتیوں میں موجود ٹینن پانی میں کھل جائے گا، جس سے چائے کے پینے کی لذت پہلے جیسی باقی نہیں رہتی اور چائے کڑوی ہو جاتی ہے اس کے مفید اجزا بھی باقی نہیں رہتے۔ ایسی چائے ہماری صحت کے لئے نقصان دہ ہے۔ چاثے کی تجارت کے معاملے میں ہندوستان دنیا میں پہلے نمبر پر ہے اور سب سے زیادہ چائے باہر کے ملکوں کو برا?مد کرتا ہے۔ جوپوری پیداوار کا پچھتر فیصد ہے اس طرح پچیس فیصد جائے کا استعمال ملک میں ہوتا ہے۔ اس طرح چائے ہمارے لئے ایک لذیذ مشروب (رقیق پینے والی چیز) ہی نہیں بلکہ ہماری ملکی ترقی میں بھی مدد گار ہے۔
چائے کس طرح بنائی جاتی ہے۔ اب یہ بھی سینے۔ جو چائے ہم بازار سے خریدتے ہیں اسے مختلف ترکیبوں سے تیار کیا جاتا ہے۔ کم لوگ ہیں جو چائے کی پتی کو صحیح پینے کے قابل بنانے کے بارے میں جانتے ہوں اور اس کی خصوصیات سے واقف ہوں۔