آج کا دن
اسپیشل فیچر
اٹلانس کی پہلی پرواز
3اکتوبر 1985ء کو امریکی خلائی شٹل ''اٹلانٹس‘‘ نے اپنی پہلی خلائی پرواز مکمل کی۔ یہ پرواز ایس ٹی ایس 51 جے مشن کے تحت انجام دی گئی، جس میں ''ڈی ایس سی ایستھری‘‘ نظام کے دو دفاعی مواصلاتی سیٹلائٹس خلا میں پہنچائے گئے۔ یہ اٹلانٹس خلائی شٹل کی پہلی پرواز تھی اور امریکی خلائی پروگرام کی اہم کامیابیوں میں شمار ہوتی ہے۔
معاہدہ نِش
1739ء میں آج کے روزسلطنت عثمانیہ اور روس کے درمیان معاہدہ نِش پر دستخط ہوئے، جس کے نتیجے میں 1735ء سے 1739ء تک جاری رہنے والی روس ترک جنگ کا خاتمہ ہوا۔ یہ جنگ دونوں سلطنتوں کے درمیان خطے میں سیاسی اور فوجی کشیدگی کا سبب بنی رہی۔ معاہدے کے ذریعے دونوں فریقوں نے جنگ بندی پر اتفاق کیا اور اپنے باہمی تنازعات کو ایک معاہدے کے تحت سمیٹا۔
اٹلی:کشتی کا سانحہ
3اکتوبر 2013ء کو اٹلی کے جزیرے لیمپڈوسا کے قریب تارکین وطن کو لے جانے والی ایک کشتی سمندر میں ڈوب گئی، جس کے نتیجے میں کم از کم 360 افراد ہلاک ہوئے۔ یہ حادثہ بحیرہ روم میں پیش آنے والے انتہائی المناک انسانی سانحات میں شمار کیا جاتا ہے۔ کشتی میں سوار افراد بہتر مستقبل کی تلاش میں یورپ پہنچنے کی کوشش کر رہے تھے۔ حادثے نے غیر محفوظ سمندری سفر، انسانی اسمگلنگ اور تارکین وطن کی مشکلات کے مسئلے کو عالمی سطح پر اجاگر کیا۔
برطانیہ جوہری طاقت بنا
1952ء میں آج کے روزبرطانیہ نے مغربی آسٹریلیا کے مونٹی بیلو جزائر میں ''آپریشن ہریکین‘‘ کے تحت کامیابی سے جوہری ہتھیار کا تجربہ کیا۔ اس تجربے کے بعد برطانیہ دنیا کی تیسری جوہری طاقت بن گیا۔ یہ تجربہ برطانوی دفاعی اور جوہری پروگرام کی ایک اہم پیش رفت تھا۔ اس سے قبل امریکہ اور سوویت یونین جوہری ہتھیار تیار کرکے ان کا تجربہ کر چکے تھے۔
انسان بردار خلائی مشن
3اکتوبر1962ء کو امریکی خلائی پروگرام ''پروجیکٹ مرکری‘‘ کے تحت خلا باز ولی شیرا کو خلا میں روانہ کیا گیا۔ اس مشن کے دوران انہوں نے زمین کے گرد چھ چکر لگائے۔ یہ پرواز امریکی انسان بردار خلائی پروگرام کی اہم کامیابیوں میں شمار ہوئی۔ مشن کا مقصد خلا باز کی کارکردگی، خلائی جہاز کے نظام اور طویل دورانیے کی خلائی پرواز کے مختلف پہلوؤں کا جائزہ لینا تھا۔
لنگیاڈس قتل عام
1943ء میں آج کے دن نازیوں کی جانب سے ایک قتل عام کیا گیا جس میں فرسٹ ماؤنٹین ڈویژن نے حصہ لیا، اسے ''لنگیاڈس کا قتل عام‘‘ کہا جاتا ہے۔ شمال مغربی یونان میں لنگیاڈس کے قریب ایک جرمن افسر قتل ہو گیا۔ جس کے بعد نازیوں نے ایک آپریشن شروع کیا جس میں بڑی تعداد میں لوگوں کو قتل کیا گیا۔ قتل کئے جانے والوں میں زیادہ تعداد بچوں، خواتین اور بزرگوں کی تھی۔
