کرکٹ میں ایک بار پھر بگ تھری پر مشتمل منصوبہ بنانے پر غور
ممبئی (سپورٹس ڈیسک )کرکٹ میں ایک بار پھر بگ تھری پر مشتمل منصوبہ بنانے پر غور ہو رہا ہے ،میڈیا رپورٹس کے مطابق بھارت، آسٹریلیا اور انگلینڈ بورڈ زنے ایک دوسرے کے ساتھ بارڈر گواسکر ٹرافی کی طرز پر زیادہ سے زیادہ ٹیسٹ سیریز کھیلنے کا پلان بنایا ہے ۔
آئی سی سی کے چیئرمین جے شاہ، کرکٹ آسٹریلیا کے چیئرمین مائیک بیئرڈ اور انگلینڈ کرکٹ بورڈ کے چیئرمین رچرڈ تھامپسن کے درمیان اس ماہ کے آخر میں ملاقات کا امکان ہے ۔جس میں ٹیسٹ کرکٹ کا نیا دو رویہ سٹرکچر ایجنڈے میں شامل ہے ، ٹیسٹ کرکٹ میں دو رویہ کا پلان موجودہ 2027ء تک کے ایف ٹی پی کے بعد عمل میں لایا جائے گا۔ رپورٹس کے مطابق ٹیسٹ کرکٹ سٹرکچر میں تبدیلی سے ورلڈ ٹیسٹ چیمپئن شپ مزید ایک اور سائیکل تک جاری رہ سکے گی۔انگلینڈ ٹیم کے کپتان بین سٹوکس ڈبلیو ٹی سی پر پہلے ہی تنقید کر چکے ہیں۔کرکٹ کی کچھ سینئر شخصیات نے بھی بہترین ٹیموں کا ایک دوسرے سے زیادہ مقابلوں پر زور دیا ہے ۔دو ڈویژن ٹیسٹ کرکٹ کا پلان 2016ء میں آئی سی سی میں زیرِ بحث آیا تھا، 2016ء کے پلان کے مطابق 7 ملک ٹاپ ڈویژن جبکہ 5 سیکنڈ رینک میں مقابلہ کریں گے ۔2016ء میں تب بھارتی کرکٹ بورڈ نے 2 ڈویژن سسٹم کے خلاف ووٹ دیا تھا۔اس وقت بی سی سی آئی نے کہا تھا کہ 2 ڈویژن سسٹم سے چھوٹے بورڈز کا مالی نقصان ہو گا۔
بگ تھری کے درمیان زیادہ کرکٹ سے براڈ کاسٹرز کے بھی مفادات جڑے ہیں، براڈ کاسٹرز بھی چاہتے ہیں کہ تینوں ملکوں کے درمیان زیادہ سے زیادہ میچز ہوں۔اس حوالے سے براڈ کاسٹرز نے کہاہے کہ جتنے زیادہ میچز ہوں گے اُتنا زیادہ اچھا ہے ۔
