قرآن: کتابِ انقلاب

قرآن مجید اللہ تعالیٰ کی نازل کردہ آخری الہامی کتاب ہے۔قرآن مجیداگرچہ 23برس تک رسول اللہ ﷺ کے قلب اطہر پر نازل ہوتا رہا لیکن لوح محفوظ سے آسمان دنیا پر اس کو رمضان المبارک کے آخری عشرے کی ایک طاق رات میں نازل کیاگیا تھا ۔رمضان المبارک کے تعارف کے طور پربھی اللہ تعالیٰ نے سورہ بقرہ کی آیت نمبر 185میںیہی ارشادفرمایا ''رمضان کا مہینہ وہ ہے جس میں قرآن مجید کواتارا گیا جوکہ ہدایت ہے لوگوں کے لیے ،اور اس میں واضح نشانیاں ہیںہدایت کی او ر تفریق کرنے والا ہے ‘‘۔

قرآن مجیدکے نزول کا بنیادی اور بڑا مقصد انسانوں کو سیدھے رستے پر چلانا تھا ۔انسان کی فکر اور عمل کی کجیوں کو دور کرکے اس کی اصلاح کرنا تھا ۔چنانچہ سورہ نساء کی آیت نمبر 175,174میں ارشاد ہوا ۔''اے لوگوتم تک تمہارے رب کی دلیل آپہنچی ہے اور ہم نے تمہاری طرف واضح نشانی کو اتارا ہے ۔پس جو لو گ اللہ تعالیٰ پر ایمان لانے والے ہیں اور اس کو مضبوطی سے پکڑتے ہیںتو عنقریب و ہ ان کو ضرور اپنے فضل اور رحمت میں داخل کرے گا اور ان کی سیدھے راستے کی طرف راہنمائی کرے گا‘‘۔

قرآن مجید جس معاشرے اور عہد میں نازل ہوا تھا وہ عہد انسانی تاریخ کا تاریک ترین دور تھا ۔لوگ اللہ تعالیٰ کی توحید کو چھوڑ کراپنے ہاتھوں سے تراشے ہوئے بتوں کی پوجا کرنے میں مصروف تھے۔ مظاہر فطرت کو پروردگار عالم کے مقام پر فائز کیا جاتا تھا۔سورج ،چاند اور ستارے کی پوجا کرنے والے گروہ اور جماعتیں بھی دنیا میں پھیلی ہوئی تھیں۔انسانوں کے ایک طبقے کے ہاں دو خداؤں کا تصور بھی موجود تھا۔ الہامی تعلیمات میں اس حد تک ترامیم کر دی گئیں تھیں کہ انبیاء علیھم السلام کو بھی نعوذ باللہ، اللہ تعالیٰ کا ہم پلہ اور شریک بنا دیا گیا تھا چنانچہ مسیحی حضرت عیسیٰ علیہ السلا م کو اللہ تعالیٰ کا بیٹا اور یہودی حضرت عزیرعلیہ السلام کو اللہ تعالیٰ کا فرزند قرار دے رہے تھے ۔

عقیدے کی کمزوریوں کے ساتھ ساتھ سماجی سطح پر بھی مختلف قسم کی برائیاں عام تھیں ۔لوگ ہر طرح کے نشے اور شراب سے لذت حاصل کر نے میں مصروف رہا کرتے تھے، بیٹیوں کو زندہ در گور کیا جاتا تھا ،اپنے حسب و نسب پر فخر کیا جاتا اوردیگر انسانوں کو اپنے سے کم تر سمجھا جاتا تھا ۔جاہلیت کی اندھی نفرتوں کی وجہ سے قتل و غارت گری کا بازار گرم تھا اور تشدداور انتقام نے اس طرح معاشرے کواپنی لپیٹ میں لے رکھا تھاکہ بلا جوازدشمنی اور نفرت کے سلسلے موقوف ہونے کے دور دور تک کوئی امکانات نظر نہیں آتے تھے ۔عدم برداشت کی حالت یہ تھی کہ کبھی سواری آگے بڑھانے پر جھگڑا ہوتا تو کبھی کنوؤں سے پانی نکالنے پر لوگ ایک دوسرے کی جانوں کے دشمن ہو جایا کرتے تھے ۔

بدچلنی کا دور دورہ تھا۔ طوائفوں نے اپنے گھروں پرجھنڈے لگائے ہوئے تھے تاکہ برائی کے طلبگاروں کوان کے ٹھکانے پر پہنچنے میں کسی قسم کی دقت کا سامنا نہ کرنا پڑے ۔ بدچلن اور بدقماش لوگ اپنی بیویوںکا استحصال کرتے اور اگر وہ ان سے علیحدہ ہونا چاہتیں تو ان کی رہائی کے کوئی امکانات موجود نہ ہوتے ۔جاہلیت کے اندھیروں میںڈوبے ہوئے لوگ بتوں کے آستانوں پر چڑھاوے چڑھاتے اور ایسے میلے ٹھیلوں کا انتظام کرتے جن میں شراب و شباب کے رسیا لوگ اپنی نفسانی خواہشات کی تسکین کی غرض سے بڑی تعداد میں شامل ہوتے ۔

حضرت ابراہیم علیہ السلام نے حضرت اسماعیل علیہ السلام کے ہمراہ جس گھر کی تعمیر اللہ تعالیٰ کی بندگی کے لیے کی تھی وہ گھر بھی ان مشرکوں کی چیرہ دستیوںسے محفوظ نہیں تھا ۔ اللہ تعالیٰ کے مقدس گھرمیں توحید کی بجائے شرک اور جاہلیت کی رسومات بدکا ارتکاب کیا جاتا۔بیت اللہ میں ان ظالموںنے 360بتوں کو نصب کر دیا تھا ۔ذہنی پراگندگی کا شکار مشرک مرد اور عورتیں بیت اللہ شریف کا برہنہ ہوکر طواف کیا کرتے اور اللہ تعالیٰ کے گھرکی حرمت اور تقدس کو پامال کرنے میںکسی قسم کی عار محسوس نہ کرتے ۔

معیشت کے معاملات بھی بری طرح الجھے ہوئے تھے۔ سود اور جاہلیت نے معاشرے کو اپنے شکنجے میں لیا ہواتھا۔ معاشرے کے مجبور طبقوں کواس لعنت نے اس طرح جکڑا ہواتھا کہ نسل در نسل لوگ سرمایہ داروں کی غلامی کرنے پر مجبور رہتے ۔ پانسہ، بت گری اور شراب کی تجارت عام تھی۔

اللہ تعالیٰ نے بنی آدم کو اندھیروںسے باہر نکالنے کے لیے نبی آخر الزمان حضرت محمد ﷺ پر اپنی آخری کتاب کا نزول فرمایا ۔ نبی کریم ﷺ نے شجروہجر، سورج وچانداور بت وکواکب کی پرستش کرنے والے انسانوں کو توحید خالص کا درس دیا اور ان کو سمجھایا کہ سجدہ صرف اللہ تعالیٰ کی ذات کا حق ہے اور اس حق میںکسی دوسر ے کو شریک نہیںٹھہرایاجا سکتا ۔

آپ ﷺ نے سماجی برائیوں کے خلاف بھی اللہ تعالیٰ کی کتاب(قرآن مجید ) سے اپنے عہد کے لوگوں کو آگاہ کیا۔ان کو بتلایا کہ زندہ در گور کی جانے والی بیٹیوں کے بارے میں قیامت کے دن سوال کیا جائے گا۔زناکاری اور بدکاری کی بھر پور طریقے سے مذمت کرتے ہوئے واضح کیاکہ زناکاری کے قریب بھی نہیں جانا چاہیے۔شادی بیاہ کے حوالے سے جاہلیت کے غلط رسوم و رواج کی قرآن مجید کی آیات کی روشنی میں مذمت کی ۔بھٹکی ہوئی انسانیت کو محرم رشتے داروں کی حرمت سے آگاہ کیااور ان کو بتلایا کہ باپ کی منقوحات کے ساتھ نکاح کرنا شرف انسانیت کے خلاف اور دو بہنوں کو بیک وقت نکاح میں جمع کرنا اخلاقی اصولوں سے متصادم ہے۔

ظلم اوربربریت کا خاتمہ کرکے انصاف اور عدل کے اعلیٰ اصولوں کو اہل کائنات کے سامنے رکھا گیا۔ان کوبتلایا گیا کہ قانون امیر اور غریب کے لیے یکساں ہونا چاہیے اور کوئی بھی صاحب اثر انسان اپنے اثر ورسوخ کی وجہ سے قانون کی گرفت سے نہیں بچ سکتا ۔جب اسامہ ابن زید رضی اللہ تعالیٰ عنہ نے بنو مخزوم کی ایک عورت کی سفارش کی تونبی کریم ﷺ نے اپنے صحابہ کو سابق اقوام کی تباہی کے سبب سے آگاہ کیا کہ جب ان میں سے کوئی بڑا جرم کرتا تو اس کو چھوڑ دیا جاتااور جب کوئی چھوٹا جرم کرتا تو اس پر گرفت کی جاتی۔اس موقع پر آپ ﷺنے عدل انصاف کی اہمیت کو اجاگر کرتے ہوئے ارشاد فرمایا''اگرمیری بیٹی فاطمہ بھی چوری کرے تو میں اس کے بھی ہاتھ کاٹ ڈالوں گا‘‘۔

اللہ تعالیٰ کی بندگی کے لیے نظام صلوٰۃ اور اللہ تعالیٰ کی مخلوق کے مسائل کے حل کے لیے نظام زکوٰۃ و صدقات کو متعارف کیا گیا۔

قرآن مجید نے جاہلیت میںڈوبے ہوئے معاشرے کو نئی روشنی سے متعارف کروایا ۔قرآن مجید کی تعلیمات پر عمل پیراہونے کی وجہ سے جاہلیت کے اندھیرے چھٹ گئے اور لوگ دلوں کو سکون دینے والے نئے نظام کے خوگر ہوگئے ۔ اہل عرب کو قرآن مجید پر عمل پیراہو کر امن،اطمینان اور سکون حاصل ہواتو وہ قرآن مجید کاانقلابی پیغام لے کردنیاکے اطراف و اکناف میں پھیل گئے اور پھرچشم فلک نے اپنی آنکھوں سے اس منظر کودیکھاکہ کلیسا کی ہیبت مٹ گئی ،کسریٰ کا آتش کدہ بجھ گیا اورمصر سے لے کر ہندوستان تک دنیا کا ہر کنارہ توحید کے پیغام سے منور ہو گیا۔

وہ قرآن جس نے چند عشروں میںدنیا کے تمام معاشروں میں انقلاب بپا کر دیا ،اس قرآن کو چھوڑنے کی وجہ سے آج اُمت مسلمہ ذلت و رسوائی کے گڑھوں میں گری ہوئی نظر آتی ہے۔اُمت مسلمہ کے زوال کے خاتمے کے لیے ایک مرتبہ پھر قرآن پاک سے اپنے تعلق کومضبوط کرنا ہوگا اور اس تجدید تعلق کے لیے رمضان کی گھڑیوں سے بہتر کون سی گھڑیاں ہو سکتی ہیںکہ جس مہینے کویہ بلند مقام حاصل ہوا تو نزول قرآن مجید کی وجہ سے ہوا۔اللہ تعالیٰ اہل اسلام اور اہل پاکستان کو کتاب انقلاب سے تعلق استوار کرنے کی توفیق دے ۔(آمین)

روزنامہ دنیا ایپ انسٹال کریں