بے آرام ماں کی راتیں

میری نیند انتہائی کچی ہے ۔ ہلکی سی آہٹ پر جاگ جانے کی عادت اس وقت پڑی جب میرے بچے بہت چھوٹے تھے ۔ ان کی ہلکی سی جنبش سے میری آنکھ کھل جاتی تھی۔بچے اب بڑے ہوچکے لیکن میری کچی نیند کی عادت پختہ ہوچکی ہے۔ بچے اب میری نیند کے دوران انتہائی احتیاط کا مظاہرہ کرتے ہیں۔دو سال پہلے مجھے لاہور ایئرپورٹ کے قریب ایک نئی ہائوسنگ سوسائٹی میں کرائے کا گھر لینے کا اتفاق ہوا۔ پُرہجوم رہائشی علاقوں سے دور یہ گھر میرے لیے انتہائی جاذب نظر تھا۔ پُرسکون، وسیع اور کشادہ گھر۔ سوسائٹی کی بیرونی حد کے بعد ایک چھوٹے سے گاؤں کا رہائشی علاقہ تھا جس میں موجود ایک مسجد کے مینار پر چاروں سمت لگے لاؤڈ اسپیکروں سے تین یا چار مؤذن اذان دینے پر مامور تھے۔ ویسے تو ان سب کی آواز میں ترنم اور سریلے پن کا فقدان تھا لیکن ایک کی آواز تو انتہائی درشت تھی۔ اللہ اکبر کی ادائیگی پر وہ 'ر‘ کے حرف کو انتہائی طویل سانس کے ساتھ ناقابلِ یقین حد تک لمبا کر کے کھینچتا تھا تو انتہائی پھٹی اور بلند آواز ہتھوڑے کی طرح دماغ پر ٹکراتی تھی۔ اس طوالت کے باعث اذان پندرہ منٹ پر محیط ہو جاتی تھی۔

مجھے امید تھی کہ میں اس کی عادی ہو جاؤں گی لیکن ایک دن آدھی رات کو اچانک لاؤڈ سپیکرکے شور سے میری آنکھ کھل گئی۔ یہ وہی تند و تیز آواز تھی لیکن اس دفعہ وہ شخص دعا مانگ رہا تھا۔

پوری طاقت سے کھلے ہوئے سپیکروں میں دعا کے دوران بار بار کھانسی اور اس کے بعد گلے کی گہرائی سے پڑھنے کے عمل نے میرے اعصاب جکڑنے شروع کر دیئے۔ یوں ساری رات بے آرامی کی نذر ہو گئی۔اگلی رات پھر یہی عمل دہرایاگیا۔ میں سارا دن سر درد کی گولیاں لیتی رہی ۔ بے آرامی نے میری آنکھوں کے گرد حلقے گہرے کر دیئے تھے۔ جب تیسری رات بھی سکون نہ ملا تو میں نے سوسائٹی کی انتظامیہ سے رجوع کرنے کا فیصلہ کیا۔ سوسائٹی کے مینیجر نے میری بات ہمدردی سے سنی اور اپنی بے بسی کااظہار کرتے ہوئے صبر کا مشورہ دیا۔ اس کا کہنا تھا: لوگ پہلے بھی یہ شکایت کرتے رہے ‘ مسجد کیونکہ سوسائٹی کی حدود سے باہر ہے اس لیے وہ کچھ نہیں کرسکتے۔

میں نے سوچا کہ کیوں نہ میں خود مسجد جاکر انتظامیہ سے بات کروں۔ اگرچہ کسی عورت کا اس طرح گاؤں کی مسجد میں جانا روایات کے خلاف تصور کیا جاتا ہے ۔ مسجد کے امام کو اپنی ساری بپتا سنائی اور کئی دیگر افراد کی بے آرامی کا ذکر بھی کیا۔میں نے اسے یہ بھی بتایا کہ لاؤڈ سپیکر کا اذان کے علاوہ استعمال غیر قانونی ہے۔میں نے بالخصوص اس ایک درشت اور بے ڈھنگی آواز والے آدمی کی شکایت کی اور درخواست کی کہ وہ یہ ذمہ داری کسی اور کو سونپ دیں۔امام نے بتایا کہ وہ گاؤں کا ایک بوڑھا آدمی ہے۔ اس کی شدید خواہش ہے کہ وہ مؤذن کے فرائض سرانجام دے‘ لہٰذا اسے سبکدوش کرنا ممکن نہیں۔ میں نے التجا کی کہ مجھ پر رحم کریں اور آدھی رات کی بے سکونی سے نجات دلائیں۔ بادل ناخواستہ امام نے میری کچھ گزارشات پر عمل کرنے پر رضامندی ظاہر کی۔

حیرت انگیز طور پر اگلی آدھی رات کے وقت سپیکر پر وہ کھردری آواز سنائی نہ دی۔صبح معمول کی اذانوں کی آواز چاروں اطراف سے آ رہی تھی ۔سارا دن میں خوشی سے جھومتی رہی کہ میں نے دلیل سے اپنی بات منوا لی‘ مگر یہ خوشی عارضی ثابت ہوئی۔ اگلی ہی رات ابھی سوئے کچھ ہی وقت ہوا تھا کہ میں بستر سے تقریباً اچھل پڑی ۔ مسجد سے پھر اسی طرح لائوڈ سپیکر پر وقفے وقفے سے کھانسی کا شور بلند ہو رہا تھا۔ باقی رات انگاروں پہ گزاری۔ جونہی بچے سکول گئے، ڈرائیور کو ساتھ لیا اور سیدھی مسجد جا پہنچی۔ چیختے ہوئے کہا کہ مجھے امام سے ملوائیں ۔ وہ سامنے آئے تو میں نے چلاتے ہوئے کہا کہ میرا صبر کا پیمانہ لبریز ہو چکاہے ۔ اگر وہ اس ٹارچر کو روکیں گے نہیں تو پھر نتائج بھگتنے کے لیے تیار ہو جائیں۔ میرے پرانے اور وفادار ڈرائیور کا رنگ پیلا پڑ گیا ۔ اس کے نزدیک میں نے بھڑوں کے چھتے میں ہاتھ ڈال کر اچھا نہیں کیا ۔

مجھے حقیقت کا تو علم نہیں کہ کیوں‘ لیکن اگلے تین ہفتے مسجد سے سوائے اذان کے کوئی آواز نہ آئی۔یہ خوشی بھی عارضی ثابت ہوئی۔رمضان شریف کا چاند نظرآنے کا اعلان کیا ہوا‘ گویا گردونواح کی تمام مساجد کولاؤڈ سپیکروں کو پورے زور و شور سے کھول دینے کا لائسنس مل گیا۔غالباً وہ اسے بخشش کا واحد ذریعہ تصور کرتے ہیں۔سحری سے لے کر رات تک مختلف نوعیت کی دعاؤں کی بلند آوازیں گرد ونواح کی تمام مساجد سے بلند ہوتی رہیں۔ میرے لیے اعصاب شکن مرحلہ وہ تھا جب اسی مؤذن نے مسلمانوں کو تہجد کے لیے یہ کہتے ہوئے جگانا شروع کر دیاکہ پہلے ہی اڑھائی بج جانے کے باعث تاخیر ہو چکی ہے۔ اس نے یہ صدا پندرہ بیس دفعہ دی۔ وہ بار بار یہ یاد دہانی کراتا رہاکہ سحری کا وقت ختم ہو گیا ہے۔ اس لیے کھانا پینا بالکل بند کر دینا چاہیے۔۔ اتنی دیر میں میرے اعصاب ٹوٹ پھوٹ کا شکار ہو چکے تھے۔میں لگ بھگ نیم بے ہوش ہوکر بستر پر گر پڑی۔ مجھے بالکل پتہ نہ چلاکہ وہ کس وقت خاموش ہوا ۔ جب میری آنکھ کھلی تو دوپہر کے وقت لاؤڈ سپیکروں سے اس عمل کا دوبارہ آغاز ہو چکا تھا۔

بالآخر میں نے ہتھیار ڈال دیئے۔ مالک مکان کو بلا کر آگاہ کیا کہ میں گھر خالی کر رہی ہوں۔مکان بدلنے پر مزدوروں کو ادائیگی، قالینوں اور پردوں پر اُٹھنے والے اخراجات اور میری محنت سب کچھ ضائع ہو گیا۔میں ایک ایسی سوسائٹی میں منتقل ہوگئی جہاں سوائے اذان کے، مسجد کے لاؤڈ سپیکر کے استعمال کی اجازت نہ تھی۔

یہ کہانی لاہور کی ایک خاتون کی ہے جس نے زندگی کے کئی قیمتی ایام بڑی اذیت میں گزارے۔ہم سب لوگ لگ بھگ ہرروز اسی کرب سے گزرتے ہیں ‘صرف اظہار نہیں کرتے۔ آئمہ مساجد اور حکومت کو بھی ان مسائل پر غور کرنا چاہیے کہ کس طرح شہریوں کے آرام اور سکون میں خلل ڈالے بغیر وہ اپنے فرائض انجام دے سکتے ہیں۔