کچھ تو کھاؤ…

اس کہانی کا آغاز فرانس کے شاہی خاندان سے ہوا۔

شاہی خاندان فرانس کا ہو یا لاہورکا، اسے شغلیہ طرزِ حکومت ہی راس آتا ہے۔ ایسا دربار جس میں بھانڈ، مراثی اور خوشامدی اونچے ''منچ‘‘ پر بیٹھتے ہیں۔ اسی لئے شغلیہ نظام میں قوم کو ریلیف کے بجائے تکلیف اور فائدے سے زیادہ جُگت ملتی ہے۔ ایسی ہی ایک جُگت باز ملکہ میری اینٹینٹی (Marie Antoinette) فرانس میں برسرِ اقتدار تھی۔ بھوک کے مارے لوگوں نے روٹی کے لئے جلوس نکالا۔ ملکہ کو محل کے اندر کی خوشحالی کی وجہ سے حیرانی ہوئی کہ لوگ احتجاج کیوں کر رہے ہیں۔ اس نے کسی جُگت باز بھانڈ سے پوچھا: عوام کیا کہتے ہیں۔ جگت باز بولا: ملکہ‘ عوام کہہ رہے ہیں‘ ان کو روٹی نہیں ملتی۔ ملکہ بولی: روٹی نہیں ملتی تو پھر کیک کھا لیں۔ پاکستانی دربار کے اعلیٰ ترین جگت باز نے بھی پاکستانی قوم کو یہی مشورہ دیا۔ اس مشورے کے بعد فیس بک، وٹس ایپ، سوشل میڈیا، پرنٹ میڈیا اور ٹی وی پر مشوروں کے ڈھیر لگ گئے۔

وزیر خزانہ نے کچھ اور پھلجھڑیاں بھی چھوڑی ہیں۔ پہلے کہا: جو لوگ بھاری قرضے لینے کی مخالفت کرتے ہیں‘ وہ دشمن کے ہاتھوں میں کھیل رہے ہیں۔ امید ہے اگلی تقریر میں وہ ملک دشمنوں کی فہرست بھی جاری کریں گے۔ بظاہر قرض کی مخالفت معروف صحافی، معاشی تجزیہ کار، انویسٹیگیٹیو رپورٹنگ کرنے والے رپورٹر، اپوزیشن ارکان اور پاکستان کے بھوکے شہری کرتے ہیں۔ سمدھی صاحب کے تلخ لہجے سے ایک اور شعلہ بھی پھوٹا۔ کہا: قرض نہیں ملے گا تو کیا پا ک چائنہ راہداری بند کر دیں؟ سمدھی صاحب کو چاہیے فوری طور پر آئی ایم ایف، ورلڈ بینک، ایشین ڈویلپمنٹ بینک سے وہ معاہدہ قوم کو دکھا دیں جس کے تحت ''سی پیک‘‘ کے لئے قرضہ لیا گیا۔ ایسا نہ تو کوئی معاہدہ ہوا ہے اور نہ سی پیک کے لئے کوئی قرضہ ملا۔ سب قرضے میگا کمیشن کے لئے میگا پروجیکٹس پر لگائے جا رہے ہیں۔ جو کچھ بچ جائے گا وہ وزیر اعظم ہاؤس میں کروڑوں کی لاگت سے باتھ روم کے میک اپ، نئے قالین، شاہانہ ڈائننگ ٹیبل اور بادشاہی کرسیوں جیسے اہم قومی منصوبوں پر خرچ ہو گا۔ اہم اس لئے کہ صبر کی کوئی حد ہوتی ہے۔ آخر 3 سال تک ایک جیسا فرنیچر، کرسیاں اور ٹونٹیاں دیکھ دیکھ کر بندہ بور تو ہو ہی جاتا ہے۔ قومی اس لئے کہ ان کرسیوں پر قوم برادری کے لوگ ہی آ کر بیٹھتے ہیں۔ اور منصوبہ اس لئے کہ پاکستان بنا ہی شغلیہ بادشاہوں کی خدمت کرنے کے لئے ہے۔ سوشل میڈیا پر یہ پیروڈی آج کل ہِٹ ہے۔

اے وطن کے بدعنوانو

سارے قرضے تمہارے لئے ہیں

تم نے جو بھی ہے لوٹا وطن سے

ایک دن وہ گواہی بنے گا

منہ چھپاؤ گے تم جس کفن میں

چہرے کی وہ سیاہی بنے گا

اے عبرت کی زندہ مثالو

سب جہنم تمہارے لیے ہیں

ڈار والا مشورہ فرانس کی ملکہ کے مشورے کی طرح سمدھی صاحب سے '‘چپک‘‘ کر رہ گیا‘ لیکن دال کھانے والوں کا تجربہ کہتا ہے‘ ایک کلو مرغی میں سے گوشت آدھا کلو نکلتا ہے۔ دال پاؤ بھر ہو تو بھی مرچیں پانی ڈال کر پورا گھرانہ اس پر گزارہ کر لیتا ہے۔ ڈار نے کہا: دال مہنگی ہے تو مرغی کھاؤ۔ مغلیہ طرز کی شغلیہ جمہوریت غریب عوام سے کہہ رہی ہے روٹی مہنگی ہے، تو گھاس کھاؤ۔ دودھ مہنگا ہے تو پانی پیو۔ نمک مہنگا ہے تو پتھر چاٹو۔ مرچیں مہنگی ہیں تو مرچیں آنکھ میں ڈالو‘ اور سرمہ سالن میں۔ پتا نہیں کس نشے میں مخمور شاعر نے بھی کہہ رکھا ہے۔ ع

شراب سیخ پر ڈالی، کباب شیشے میں

فرانس کی ملکہ والی کہانی رکنے پر ہی نہیں آ رہی۔ کسی دل جلے نے یہ مشورہ بھی داغ دیا کہ آمدن نہیں ہے‘ تو قرضہ لے لو۔ بے روزگار ہو تو سیاست میں حصہ لو۔ سیلاب آئے تو اورنج ٹرین کی سواری کرو۔ انصاف نہیں ملتا تو خود کشی کر لو۔ بے روزگاری ہے تو ڈاکے مارو۔ کام چوری سے جی بھر گیا ہے تو جیبیں کاٹا کرو۔ جوتے نہیں ہیں تو پاؤں سر پر رکھ لو۔ کپڑا نہیں تو پتے پہنو۔ مکان نہیں ہے تو نیک اعمال کرکے جنت میں جلدی پہنچو۔ پولیس ایک تھپڑ مارے تو دوسرا گال پیش کرو تا کہ نہ تمہاری لِترول ہو اور نہ ہی پٹائی کی ویڈیو انٹرنیٹ پر پہنچے۔ سبزی مہنگی ہے تو درخت کی چھال اتار لو۔ پکوڑا افورڈ نہیں کر سکتے تو اپنے جگر کے کباب بنا لو۔ گیس نہیں آتی تو کاٹھ کی ہنڈیا چڑھا لو۔ لوڈ شیڈنگ بڑھ گئی ہے‘ تو خادمِ اعلیٰ والا پنکھا منگوا لو۔ پینشن میں اضافہ کروانا ہے تو 85 سال کی عمر پوری ہونے کا انتظار کرو۔ تنخواہ بڑھنے کا مطالبہ چھوڑ کر اوپر کی کمائی پر گزارا کیا کرو۔ غیر قانونی تارکِ وطن ہو تو پاکستان چلے آؤ۔ اہلِ وطن کو ایک شناختی کارڈ ملے گا‘ تم تین لے لو۔ ٹیبلٹ نہیں ملتی تو بلٹ کھاؤ، جان چھڑاؤ۔ ڈگری کسی کام نہیں آئی تو صومالیہ چلے جاؤ‘ جینے کا گر سیکھ جاؤ گے۔ محلے کا گٹر بند ہے تو اس کا ڈھکن چوری کر لو۔ ویگن میں جگہ نہیں تو خواتین والی سیٹ میں گھس بیٹھو۔ عدم تخفظ کا شکار ہو تو رات کو گھر کے دروازے کھول کر رکھو تاکہ کوئی تو تمہاری چیخ سن سکے۔ اور بتاؤ لذیذ ہم وطنو... تمہاری کیا خدمت کی جائے...؟ ارے! مرغی والی بات پر ناراض کیوں ہوتے ہو۔ کچھ تو کھائو!

ویسے تمہارا بھلا اسی میں ہے تم کچھ مت کھاؤ۔ نہ کھانے سے کوئی بیماری نہیں لگتی۔ کھانے سے گنٹھیا، شوگر، دل کے امراض اور ہائی بلڈ پریشر ہو جاتا ہے۔ سمارٹ نظر آنا چاہتے ہو تو سال بھر کے روزے رکھو۔ کھجور مہنگی ہے تو عیاشی چھوڑ دو، نمک سے روزہ کھولو، فقر سیکھ جاؤ گے۔ اڑوس پڑوس کا ہمیشہ خیال رکھو‘ خاص طور پر جب اہلِ خانہ گھر سے باہر چلے جائیں۔ کو ئی دستی گھڑی مانگے تو اسے کیمرے کے سامنے اتار کر دے دو، بعد میں سپیکر صاحب گھڑی واپس کر دیں گے۔ ترقی دیکھنی ہے تو رائے ونڈ چلو‘ محل دیکھنا ہے تو جاتی امرائ۔ بادشاہ دیکھنا ہے تو لندن چلو۔ شہزادے آدھے آدھے ہیں۔ چھوٹے دبئی میں اور ''بڑے‘‘مے فیئر میں۔ اخلاق سیکھنا ہے تو وزارت برقیات سے سیکھو۔ سچ جاننا چاہتے ہو تو سرکاری ٹی وی دیکھو۔ مہنگائی ختم کرنی ہے تو زمین و آسمان کے رب سے دعا مانگو۔ لوٹ مار اور ذخیرہ اندوزی سے جی اور جیب بھر چکی تو آخری عشرے میں زیارت کے لئے چلے جاؤ‘ عبادت میں دل لگاؤ۔ گھریلو خاتون ہو تو میاں کے لئے ''کڑا‘‘ جیب میں ڈال کے رکھو۔ ورکنگ ویمن ہو تو جوڈو کراٹے سیکھ لو۔ جرائم سے بچنا چاہتے ہو تو تھانیدار رشتہ دار کو لگواؤ۔ اس کہانی کا آغاز فرانس کے شاہی خاندان سے ہوا۔