سید اذلان شاہ کی شانِ ’’نزول‘‘

سہ ماہی ''نزول‘‘ کے حال ہی میں شائع ہونے والے تازہ اور آٹھویں شمارے میں چھپنے والے اپنے مکتوب میں حسین مجروح لکھتے ہیں: برادرم اذلان شاہ صاحب‘ سلام و رحمت۔ برسوں بعد آپ سے گفتگو رہی (گو بہت مختصر) ۔طبیعت شاد ہوئی۔ آپ کا حوصلہ لائقِ ستائش ہے کہ گوجرہ ایسی مختصر اور قدرے اونگھتی ہوئی جگہ سے بڑے استقلال کے ساتھ ''نزول‘‘ کو منزل کیے جاتے ہیں۔ میں تو کہوں گا کہ آپ نے ٹھنڈے اور میٹھے پانی کا چشمہ جاری کیا ہے۔ سچی بات تو یہ ہے کہ اس عہدِ ناپُرساں میں ادبی پرچہ نکالنا اور وہ بھی کسی قصباتی مقام سے کہ جہاں اشتہار ملنے کا امکان ہو نہ کسی بڑی ادبی سرگرمی کا محل‘ عشق سے کم انہماک کے بغیر ممکن نہیں۔

یہ تحریر اس لیے نقل کی ہے کہ اس رسالے کے بارے میں سب کی رائے یہی ہے اور اس پر کسی اضافے کی بھی کوئی خاص ضرورت نہیں۔ 368 صفحات پر محیط اس دستاویز کی قیمت 400 روپے رکھی گئی ہے۔ شاعری کا پلڑا اس بار واضح طور پر بھاری ہے جس میں بشمول اس خاکسار کے‘ کئی شعراء کے لیے گوشے مخصوص کیے گئے ہیں۔ اس میں مضامین کی کمی بے حد کھٹکتی ہے جبکہ متعدد شعراء کے گوشوں کے حوالے سے لکھے گئے مضامین کے علاوہ صرف ایک مضمون شامل اشاعت ہے جو ''اردو زبان کے بین الاقوامی تناظرات‘‘ کے عنوان سے قاسم یعقوب کا تحریر کردہ ہے اور اپنی اہمیت کے لحاظ سے اس شمارے کی خاص الخاص تحریر کہا جا سکتا ہے۔ دیگر مفصل اور مختصر مضمون نگاروں میں شہزاد احمد‘ کشور ناہید‘ اظہار الحق‘ نذیر قیصر‘ ناصر عباس نیّر‘ ابرار احمد‘ ڈاکٹر قاضی جمال حسین (بھارت) حسین مجروح‘ سیدہ سیفو‘ زاہد حسن‘ عبدالرشید‘ سلیم شہزاد‘ اذلان شاہ‘ نصرت انور‘ ناصر علی‘ صابر لودھی‘ فتح محمد ملک‘

مشکور حسین یاد‘ رضوانہ نقوی و دیگران شامل ہیں۔ اہلِ گوشہ میں مقصود وفاؔ‘ وحید احمد‘ یاسمین حمید‘ عالم خورشید (بھارت) گستاخ بخاری‘ غضنفر عباس اور ظہیر اقبال شامل ہیں جس کے ذریعے ہمیں ان شعراء کی اکٹھی چیزیں مطالعہ کرنے کا موقع ملا ہے۔ عامر سہیل‘ افضل خان اور اقتدار جاوید کی منظومات ان کے علاوہ ہیں۔ افسانوں کے حصے میں سمیع آہوجہ‘ مرزا حامد بیگ‘ یونس جاوید‘ محمود احمد قاضی‘ نیلم احمد بشیر‘ شبنم شکیل‘ نیّر اقبال علوی‘ پرویز انجم اور نجیب عمر کی کہانیاں ہیں جن میں سے شبنم شکیل کی کہانی بعنوان ''ایک ہی سہارے کے لوگ‘‘ ہم پہلے بھی پڑھ چکے ہیں جو آدمی کے اندر چھپی نیکی کا ایک بہت خوبصورت اظہار ہے جبکہ ہماری ایک بڑی افسانہ نگار طاہرہ اقبال کے فن کا جائزہ رضوانہ نقوی نے لیا ہے‘ کیا ہی اچھا ہوتا اگر طاہرہ اقبال کی کوئی تازہ کہانی بھی حاصل کر کے شامل کر لی جاتی۔ ناصر عباس نیّر نے تنقید کے علاوہ ایک عمدہ انشائیہ بھی ''کمرہ‘‘ کے عنوان سے لکھا ہے۔ جبکہ ''مندری والا‘‘ کے عنوان سے شاعر وحید احمد نے ناول کا ذائقہ بھی چکھنے کا موقع دیا ہے۔ رابعہ شاہ‘ غضنفر عباس اور انجم سلیمی کی نظمیں ہیں۔ انجم سلیمی اس دفعہ پنجابی نظموں میں بھی ظاہر ہوئے ہیں۔

سب سے زیادہ علاقہ حصۂ غزل نے گھیرا ہوا ہے جس میں آفتاب اقبال شمیم‘ انجم سلیمی‘ اشرف جاوید‘ محمد حنیف‘ قمر رضا شہزاد‘ افضل گوہر‘ شکیل جاذب‘ اشرف یوسفی‘ جان کاشمیری‘ عطا الرحمن قاضی‘ نعیم الدین نظر‘ عمران عامی‘ شاہد بخاری‘ محمد محمود احمد‘ اظہر فراغ‘ سید کامی شاہ‘ اسلم سحاب ہاشمی‘ تبسم بٹالوی‘ عبدالخالق صنم‘ منظور ثاقب‘ محمد اسد خاں‘ عکاشہ سحر‘ ڈاکٹر خالد انور‘ شاہین غزل‘ تمثیلہ لطیف‘ کائنات احمد‘ محمد اقبال رانجھا‘ امت الحئی وفا‘ بزمی تمنائی‘ نوشابہ عدنان‘ شاہ روم ولی خاں اور خود سید ا ذلان شاہ شامل ہیں۔ اس حصے میں سے جو اشعار میں نے آپ کی تفریحِ طبع کے لیے منتخب کیے ہیں‘ پیش ہیں:

جسے جانا ہی نہیں اپنے کناروں سے جُدا

اُسے دیکھا بھی نہیں موج سے باہر آ کر

بہت پہلے سے افسردہ چلے آتے ہیں ہم تو

بہت پہلے کہ جب افسردگی ہوتی نہیں تھی

ہمیں ان حالوں ہونا ہی کوئی آسان تھا کیا

محبت ایک تھی اور ایک بھی ہوتی نہیں تھی

(شاہین عباس)

اذنِ سخن ملا تو اُسے چُپ سی لگ گئی

کچھ دیر تو سوال میں رہنا پڑا مجھے

اک خواب کھُل کے سامنے آیا تمہارے بعد

پھر اپنی دیکھ بھال میں رہنا پڑا مجھے

اسی سے دربدری کی ہر ایک نسبت ہے