سرخیاں‘متن‘ درستی اور ابرارؔ احمد کی نظم

تھانہ کلچر بدل رہا ہے‘ عوام کو جلد تبدیلی نظر آئے گی: عثمان بزدار

وزیراعلیٰ پنجاب سردار عثمان بزدار نے کہا ہے کہ ''تھانہ کلچر بدل رہا ہے‘ عوام کو جلد تبدیلی نظر آئے گی‘‘ اور تھانہ کلچر کی اس سے بڑی اور تبدیلی کا ہو سکتی ہے کہ پولیس اب‘ تفتیش تھانوں میں نہیں کرتی‘ بلکہ عقوبت خانوں میں کرتی ہے‘ تا کہ اس کلچر کی تبدیلی باہر کے لوگوں کو ذرا کم سنائی دے اور اس دوران جس نے قضائے الٰہی سے فوت ہونا ہے‘ وہ تسلی سے ہو جائے‘ کیونکہ اس میں جان کَندن وغیرہ کی گنجائش ہی نہیں ہوتی اور سورۂ یٰسین پڑھنے کی بھی ضرورت نہیں پڑتی‘نیز اگر اب ‘آپ تھانے جائیں تو اہلکار آپ کو اٹھ کر ملیں گے‘ جبکہ لین دین کا معاملہ الگ ہے‘ کیونکہ وہ ہر آنے والے کے بارے یہ فرض کر لیتے ہیں کہ وہ پوری تیاری سے آیا ہوگا‘ جبکہ اس سے معاملات بھی جلد طے ہو جاتے اور آپ کا اور اہلکاران کا وقت بھی ضائع نہیں ہوتا ‘کیونکہ وہ وقت کے قیمتی ہونے کا پورا پورا احساس رکھتے ہیں ‘جو کہ زندہ قوموں کی نشانیوں میں سے ایک ہے۔ آپ اگلے روز خانیوال میں زرعی یونیورسٹی کے سب کیمپس کا افتتاح اور پارٹی عہدیداروں سے ملاقات کر رہے تھے۔

بھوک غریب آدمی کے دروازے پر دستک دے رہی ہے: حمزہ شہباز

پنجاب اسمبلی میں قائد حزب اختلاف حمزہ شہباز نے کہا ہے کہ ''بھوک غریب آدمی کے دروازے پر دستک دے رہی ہے‘‘ لیکن وہ باہر ہی نہیں نکل رہا اور وہ بیچاری تھک ہار کر واپس چلی جاتی ہے‘ بلکہ اب‘ لگتا ہے کہ اس کی قوتِ سماعت ہی جواب دے چکی ہے اور یہ عارضہ اُسے ہمارے دور اقتدار ہی سے لاحق چلا آ رہا ہے اور کسی بات پر متوجہ کرنے کے لیے اُس کے آگے ڈھول بجانا پڑتا تھا اور جس کے لیے ہم نے کافی سارے ڈھول اکٹھے بھی کر رکھے تھے‘ جن کا پول اب کھل رہا ہے‘ اس لیے حکومت کو چاہیے کہ اگر بھُوکا باہر نہ نکل رہا ہو تو اُس کے دروازے پر کوئی چھوٹا موٹا بم چلا دیا کرے‘ اس کا باپ بھی باہر نکل آئے گا‘ ورنہ اس کا کوئی چچا‘ تایا یا ماموں ضرور باہر نکلے گا۔اول تو سب بھوکوں کو گھر سے باہر نکل کر ہی بیٹھنا چاہیے‘ تا کہ حکومت یا لوگوں کیلئے آسانی رہے۔ آپ اگلے روز لاہور میں میڈیا سے گفتگو کر رہے تھے۔

امید ہے ‘اگلا وزیراعظم بلاول ہوگا: آصف علی زرداری

سابق صدر اور پیپلز پارٹی کے شریک چیئر مین آصف علی زرداری نے کہا ہے کہ ''امید ہے‘ اگلا وزیراعظم بلاول ہوگا‘‘ کیونکہ میں اس کے خلاف ثبوتوں کو ٹھکانے لگانے میں لگا ہوا ہوں‘ جبکہ مسلسل انکار کے بعد میری ضمانت کرانے کی وجہ بھی یہی تھی‘ نیز اس میں اللہ میاں کی مدد بھی شامل ہوگی ‘کیونکہ میرے خلاف مقدمے میں بھی فرشتوں نے میری اعلیٰ فائلیں غائب کر دی تھیں اور ان کی بجائے فوٹو کاپیاں رکھ دی تھیں اور مجھے بارہ سال جیل میں رکھے جانے کے بعد با عزت رہا کر دیا گیا تھا؛ اگرچہ مجھے عزت کی کوئی خاص ضرورت نہیں تھی‘ جو مجھے ملک بھر میں پہلے ہی کافی حاصل ہو چکی تھی‘ جو میری اور میرے ساتھیوں کی طرف سے عوام کی بے پناہ خدمت کا نتیجہ تھا‘ نیز یہ اندازہ نہیں کیا جا سکتا‘ جس سے ان کی عزت میں بھی اضافہ ہوتا رہا تھا ‘ کیونکہ دولت کے ساتھ عزت ضروری ہے۔ آپ اگلے روز بلاول کے جلسے میں ویڈیو لنک کے ذریعے خطاب کر رہے تھے۔

ریکارڈ کی درستی

اشفاق احمد ورک نے اپنے کالم میں ایک شعر اسطرح درج کیا ہے؎

کیا فرض ہے کہ سب کو ملے ایک سا جواب

آئو ناں ہم بھی سیر کریں کوہِ طُور کی

اس کے دوسرے مصرعے میں لفظ ''ناں‘‘ کی وجہ سے وزن خراب ہو گیا ہے‘ کیونکہ اصل مصرعہ اس طرح سے ہے ع

آئو نہ ہم بھی سیر کریں کوہِ طُور کی

رانا محبوب اختر نے اپنے کالم میں ایک شعر اسطرح درج کیا ہے؎

حیدریم قلندریم مستم

بندۂ مرتضیٰ علی ہستم

اس کے پہلے مصرعے میں دو غلطیاں ہیں۔ ایک تو یہ کہ پہلے دو لفظوں کو صیغۂ جمع جملے میں لکھا گیاہے ‘جو کہ درست نہیں۔ دوسرا یہ کہ پہلے لفظ ''حیدری‘‘ کے ساتھ ''م ‘‘آئے گا۔ میر ے خیال میں اصل مصرع اس طرح سے ہے: ع

حیدریم قلندرم‘ مستم

اور‘اب آخر میں ابرارؔ احمد کی نظم:

میں ترا ہجر کیسے بنوں؟

اے مرے خوش نما

اے مری نارسائی

مرے ہجرِ نامختتم

مجھ کو یہ تو بتا

کیا مری آنکھ میں

ایک بھی ایساآنسو نہیں

جو تری چشم میں

کوئی خوابِ تمنا جگا دے

میری مرجھائی آواز میں کیا نہیں ہے؟