سرخیاں‘ متن ’’درکار‘‘ اور ابرار ؔاحمد کی نظم

آئین کے تحفظ کیلئے جیلوں میں جانے کو تیار ہیں: بلاول

چیئر مین پاکستان پیپلز پارٹی بلاول بھٹو زرداری نے کہا ہے کہ ''آئین کے تحفظ کے لیے جیلوں میں جانے کو تیار ہیں‘‘ اس لیے ہمیں جعلی اکائونٹس وغیرہ کے مقدمات میں جیل بھیجنے کی ضرورت نہیں ہے اور جس طرح ہم اپنے خلاف تمام کارروائیوں کو انتقامانہ قرار دے رہے ہیں‘ اسی طرح ہمیں جس جرم میں بھی جیل بھیجا گیا ‘ہم سمجھیں گے کہ آئین کے تحفظ کے جرم میں ایسا کیا گیا ہے اور اگر ہم نے اثاثے بنائے ہیں تو آئین میں اس کی ممانعت نہیں ہے‘ جبکہ اس میں منی ٹریل وغیرہ دینے کا بھی کوئی ذکر نہیں ہے اور نہ ہی اس میں جعلی اکائونٹس کو آئین کے خلاف قرار دیا گیا ہے‘ اس لیے ہماری طرف سے اس کی خلاف ورزی کا سوال ہی پیدا نہیں ہوتا۔ آپ اگلے روز کراچی میں میڈیا سے گفتگو کر رہے تھے۔

حکومت اگر کچھ وقت کے لیے اپوزیشن سے

توجہ ہٹا لیتی تو مسئلہ حل ہو سکتا تھا: شہباز شریف

سابق وزیراعلیٰ پنجاب میاں شہباز شریف نے کہا ہے کہ ''حکومت اگر کچھ وقت کے لیے اپوزیشن سے توجہ ہٹا لیتی تو مسئلہ حل ہو سکتا تھا‘‘ کیونکہ ہمیں اندر کرنے سے پہلے حکومت کو کچھ ملا ہے‘ نہ آئندہ ملے گا اور اسی کو غنیمت سمجھیں ‘ جو بھائی صاحب جاتے ہوئے دے گئے تھے‘ لیکن حکومت صرف ہمارے معاملات میں دلچسپی لے رہی ہے؛ حالانکہ ہم نے اپنے ان معاملات میں کبھی کوئی خصوصی دلچسپی نہیں لی اور سارا کچھ روٹین ہی میں ہوتا رہا ہے‘ بلکہ اللہ میاں کی قدرت سے ہمارے اکائونٹس میں غائبانہ طور پر بھی پیسے آ جایا کرتے تھے‘ جسے ہم صرف غیبی امداد سمجھتے ہیں اور کبھی یہ کھوج لگانے کی کوشش نہیں کی کہ یہ پیسے کہاں سے اور کیوں آتے چلے جا رہے ہیں۔ آپ اگلے روز لاہور میں ایک بیان جاری کر رہے تھے۔

درکار

یہ اقرار مصطفی کا مجموعۂ غزل ہے‘ جسے سخن پبلی کیشنز لاہور نے شائع کیا ہے۔ انتساب والد محترم کے نام ہے۔ کتاب پر اظہارِ رائے کرنے والوں میں ڈاکٹر غلام بشیر احمد اوروقاص عزیز شامل ہیں۔ پیش لفظ شاعر کا بقلم خود ہے۔ سرورق کے اندر اور باہر شاعر کے منتخب اشعار اور تصویر شائع کی گئی ہے۔ اقرار مصطفی کا مجموعۂ غزل '' درکار‘‘ میں فنی نقائص سے پاک اور تقریباً بے عیب شاعری ہے اور جدید اُردو غزل کا مطالعہ کرنے سے بہتر ہو سکتی ہے۔ یہاں کچھ نمونۂ کلام پیش ہے:

رونا کاہے کا اگر یار بدل جاتا ہے

دن ڈھلے سایۂ دیوار بدل جاتا ہے

لوگ دیوانہ کہیں جب کہ حقیقت یہ ہے

حالتِ عشق میں کردار بدل جاتا ہے

کیا زمانہ تھا بدلنے پہ بدلتا ہی نہ تھا

کیا زمانہ ہے جو ہر بار بدل جاتا ہے

وقت کے تازہ تقاضوں کو نبھانے کے لیے

فن بدل جاتا ہے‘ کردار بدل جاتا ہے

اور‘ اب آخر میں ابرارؔ احمد کی یہ نظم:

ہماری یاد کا حصہ

فون پر ہونے والی گفتگو جو ابھی ابھی ختم ہوئی

سٹریچر پر پڑا ہوا شخص