حارث رؤف اور عثمان خان نیوزی لینڈ کیخلاف ون ڈے سکواڈ میں شامل
لاہور: (دنیا نیوز) پاکستان ٹیم مینجمنٹ نے فاسٹ باؤلر حارث رؤف اور وکٹ کیپر بیٹر عثمان خان کو نیوزی لینڈ میں ہی رکنے کی ہدایت کرتے ہوئے قومی ون ڈے سکواڈ میں شامل کرلیا۔
قومی ٹی 20 ٹیم کے 8 کھلاڑی وطن واپسی کے لیے روانہ ہوں گے اور باقی 5 کھلاڑیوں نے نیپیئر میں ٹیم کو جوائن کر لیا۔
نیوزی لینڈ کے خلاف ٹی 20 سیریز مکمل ہونے کے بعد پاکستان ٹیم کے کھلاڑی اور کوچنگ سٹاف ویلنگٹن سے نیپیئر روانہ ہوا، فاسٹ باؤلر حارث رؤف اور وکٹ کیپر بیٹر عثمان خان کو ٹیم مینجمنٹ نے ون ڈے سکواڈ میں شامل کر لیا جبکہ پہلے دونوں کھلاڑی صرف ٹی 20 سکواڈ میں شامل تھے۔
سلمان علی آغا، حارث رؤف، خوشدل شاہ، عرفان خان نیازی، ابرار احمد، سفیان مقیم، محمد علی اور عثمان خان نے نیپیئر میں ون ڈے سکواڈ کو جوائن کیا۔
واضح رہے کہ کپتان محمد رضوان اور بابر اعظم سمیت 9 کھلاڑی پہلے ہی نیپیئر میں موجود ہیں، ٹی 20 سکواڈ کے باقی 8 کھلاڑی نیوزی لینڈ سے براستہ دبئی پاکستان کے لیے روانہ ہوں گے جن میں شاداب خان، شاہین آفریدی، عمیر بن یوسف، حسن نواز، محمد حارث، عباس آفریدی، عبدالصمد اور جہانداد خان شامل ہیں۔
پاکستان اور نیوزی لینڈ کے درمیان تین میچز پر مشتمل ون ڈے سیریز 29 مارچ کو شروع ہو گی۔
