مقدمات خارج کرنے کی درخواست لاہور ہائی کورٹ میں کل سماعت کیلئے مقرر
لاہور: (دنیا نیوز) لاہور ہائیکورٹ نے اخراج مقدمات کی سابق وزیراعظم عمران خان کی درخواست سماعت کیلئے مقرر کردی۔
جسٹس علی باقر نجفی کی سربراہی میں لاہور ہائی کورٹ کا 2 رکنی بینچ کل 3 اپریل بروز پیر کو عمران خان کی درخواست پر سماعت کرے گا، سابق وزیر اعظم کی جانب سے درخواست میں وفاق، پنجاب حکومت، ایف آئی اے اور نیب سمیت دیگر کو فریق بنایا گیا ہے، عمران خان نے آئینی درخواست بیرسٹر سلمان صفدر کے ذریعے دائر کر رکھی ہے۔
یہ بھی پڑھیں: عمران خان کا حکومت کے ساتھ مذاکرات میں نہ بیٹھنے کا اعلان
درخواست میں مؤقف اختیار کیا گیا ہے کہ حکومت کی جانب سے انتقامی کارروائیوں کا نشانہ بنایا جا رہا ہے، سیاسی بنیادوں پر ایک ہی نوعیت کے مقدمات درج کر کے ہراساں کیا جا رہا ہے، اب تک ایک سو سے زائد کیسز درج کر کے اختیارات کا غیر قانونی استعمال کیا جا رہا ہے، 121 جھوٹے مقدمات درج کیے گئے ہیں یہ آئین کے آرٹیکل چار، نو، پندرہ، سولہ کی خلاف ورزی ہے۔
درخواست میں استدعا کی گئی کہ لاہور ہائی کورٹ تمام مقدمات کو خارج کرنے کا حکم دے، عدالت عمران خان کے خلاف درج تمام مقدمات کا تفصیلی ریکارڈ طلب کرے اور کیس کے حتمی فیصلے تک درج مقدمات میں کارروائی سے روکا جائے، کارروائی سے پہلے درخواست گزار کو نوٹس دے کر سننے کا موقع فراہم کرنے کا حکم دیا جائے اور عدالت گرفتار تمام کارکنوں کو رہا کرنے کا حکم بھی دے۔
