امریکا سکیورٹی کی ضمانت دے تو انتخابات کرانے کیلئے تیار ہیں: صدر یوکرین
روم: (دنیا نیوز) یوکرین کے صدر ولادیمیر زیلنسکی نے کہا ہے کہ ملک میں آئندہ 60 سے 90 دن کے اندر عام انتخابات کرانے کے لیے تیار ہیں بشرطیکہ مغربی اتحادی انتخابی عمل کے لیے مکمل سکیورٹی کی ضمانت فراہم کریں۔
اٹلی کے دورے کے بعد اپنے طیارے میں صحافیوں سے بات چیت کرتے ہوئے یوکرین کے صدر ولادیمیر زیلنسکی نے کہا ہے کہ وہ انتخابات سے متعلق کسی بھی تاخیر کے حامی نہیں تاہم سکیورٹی کی صورتحال بنیادی رکاوٹ ہے۔
انہوں نے کہا ہے کہ میں انتخابات کے لیے تیار ہوں اور میں کھلے عام امریکا اور یورپی اتحادیوں سے درخواست کر رہا ہوں کہ وہ انتخابی عمل کی سکیورٹی یقینی بنانے میں مدد کریں۔
واضح رہے کہ ان کا بیان ایسے موقع پر سامنے آیا ہے جب امریکی صدر ڈونلڈ ٹرمپ نے ایک انٹرویو میں کہا تھا کہ یوکرین کی قیادت جنگ کو انتخابات نہ کرانے کا بہانہ بنا رہی ہے اور اب ملک میں انتخابات ہونے چاہئیں۔
زیلنسکی نے اس تاثر کی سختی سے تردید کرتے ہوئے کہا ہے کہ وہ اقتدار سے چمٹے رہنے کے خواہاں نہیں بلکہ ملک کی سکیورٹی اولین ترجیح ہے، مسلسل میزائل حملوں کے دوران فوجی اور شہری کس طرح ووٹ ڈال سکتے ہیں؟
یوکرینی صدر نے بتایا کہ انہوں نے یوکرینی پارلیمنٹ سے کہا ہے کہ مارشل لاء کی حالت میں انتخابات کرانے کے لیے ضروری قانون سازی تیار کی جائے۔
صدر ولادیمیر زیلنسکی نے مزید کہا ہے کہ اپنے شراکت داروں کا احترام کرتے ہوئے کہوں گا کہ میں انتخابات کے لیے تیار ہوں مگر یہ فیصلہ یوکرین کے عوام کا ہے۔
