ایران کا ایٹمی ایجنسی کو مخصوص پروٹوکول کے بغیر جوہری تنصیبات کا دورہ کرانے سے انکار
تہران: (ویب ڈیسک) ایران نے بین الاقوامی ایٹمی ایجنسی کو مخصوص پروٹوکول کے بغیر جوہری تنصیبات کا دورہ کرانے سے انکار کر دیا۔
عالمی میڈیا کی رپورٹ کے مطابق ایرانی جوہری توانائی تنظیم کے سربراہ محمد اسلامی نے کہا ہے کہ بین الاقوامی ایٹمی ایجنسی ان مقامات کے دورے کا مطالبہ نہیں کر سکتی جو اسرائیل کے ساتھ جون کی جنگ کے دوران حملے کا نشانہ بنے تھے۔
رپورٹ کے مطابق محمد اسلامی نے کہا کہ اسرائیل اور امریکا کا دباؤ ان کے ملک پر اثر انداز نہیں ہوتا، تاہم انہوں نے کہا کہ اگر بین الاقوامی ایجنسی کے پاس حملے کا نشانہ بننے والے مقامات کے دورہ کے بارے میں کوئی پروٹوکول ہے تو اسے جائزہ لینے کے لئے ہمیں پیش کرنا چاہئے۔
ایرانی جوہری توانائی کے ترجمان بہروز کمالوندی نے تصدیق کی ہے کہ جوہری تنصیبات کا فی الحال کوئی دورہ نہیں ہو رہا ہے، انہوں نے وضاحت کی کہ گزشتہ عرصے کے دوران کیے گئےدورے ، بین الاقوامی ایجنسی کے ساتھ تعاون کی معطلی کے قانون کی بنیاد پر، سپریم نیشنل سکیورٹی کونسل کی منظوری سے کئے گئے تھے۔
انہوں نے زور دیا کہ جن تمام مقامات کا دورہ کیا گیا تھا وہ صنعتی سرگرمیوں سے متعلق تھے جن پر کوئی حملہ نہیں ہوا تھا۔ترجمان نے کہا کہ بمباری کا نشانہ بننے والی تنصیبات تک رسائی کی اجازت دینے میں تیزی لانے کے لئےدباؤ ہے لیکن ملک کی سلامتی اور جوہری تنصیبات کے تقاضے سوچ سمجھ کر فیصلے کرنے کی ضرورت پیدا کرتے ہیں۔
ان کا مزید کہنا تھا کہ چاہتے ہیں کہ یہ ایسے فیصلے ہوں جو قانون پر مبنی ہوں اور جو تنصیبات کو کسی بھی خطرے سے مکمل طور پر محفوظ رکھیں۔
