پاکستان سٹاک ایکسچینج میں تیزی، ہنڈرڈ انڈیکس میں 576 پوائنٹس کا اضافہ
کراچی: (دنیا نیوز) پاکستان سٹاک ایکسچینج میں تیزی کے باعث ہنڈرڈ انڈیکس میں 576 پوائنٹس کا اضافہ ہو گیا۔
کاروباری ہفتے کے دوسرے روز بھی کاروبار کے آغاز پر سٹاک مارکیٹ میں زبردست تیزی دیکھنے میں آئی، 576 پوائنٹس کے اضافے کے ساتھ پاکستان سٹاک ایکسچینج میں ہنڈرڈ انڈیکس ایک لاکھ 74 ہزار 472 پوائنٹس کی بلند ترین سطح پر پہنچ گیا۔
دن بھر اہم شعبوں میں بھرپور خریداری کا رجحان رہا، جن میں گاڑی ساز کمپنیاں، سیمنٹ، تجارتی بینک، کھاد، تیل و گیس کی تلاش کرنے والی کمپنیاں، آئل مارکیٹنگ کمپنیز، بجلی کی پیداوار اور ریفائنریز شامل رہیں۔
ایس ایس جی سی ، پی او ایل، پی ایس او، پی پی ایل، اوجی ڈی سی، ماری، ایم ای بی ایل، ایم سی بی، ایس این جی پی ایل اور این بی پی بھی مثبت زون میں دکھائی دیئے۔
واضح رہے کہ گزشتہ کاروباری روز کے اختتام پر ہنڈرڈ انڈیکس 1495 پوائنٹس کے اضافے کیساتھ ایک لاکھ 73 ہزار 896 پوائنٹس کی سطح پر بند ہوا تھا۔
