یونیورسٹی آف لندن کی پاکستان کے تعلیمی شعبے سے وابستگی کو سراہتا ہوں: عطا اللہ تارڑ
لاہور: (دنیا نیوز) وفاقی وزیر اطلاعات عطاء اللہ تارڑ نے کہا ہے کہ یونیورسٹی آف لندن کی پاکستان کے تعلیمی شعبے سے وابستگی اور خلوص کو سراہتا ہوں۔
عطاء اللہ تارڑ نے یونیورسٹی آف لندن کے وفد کے اعزاز میں منعقدہ تقریب سے خطاب کرتے ہوئے کہا کہ معزز اور باوقار اجتماع سے خطاب کا موقع ملنا ان کے لیے باعثِ اعزاز اور باعثِ افتخار ہے۔
انہوں نے کہا کہ یونیورسٹی آف لندن کا تعلیمی سفر کئی دہائیوں پر محیط ہے اور پاکستان کے تعلیمی شعبے سے اس کی وابستگی اور خلوص قابلِ ستائش ہے، دونوں کے درمیان تعلیمی تعلق وقت کے ساتھ مزید مضبوط اور مؤثر ہوتا چلا گیا ہے۔
عطاء اللہ تارڑ نے خطاب کے دوران کہا کہ یونیورسٹی آف لندن نے پاکستان میں تعلیم کے فروغ کے لیے نمایاں خدمات انجام دی ہیں، یونیورسٹی کی جانب سے جدت، اختراع اور نئے تعلیمی ماڈیولز متعارف کرائے گئے جس سے پاکستان میں تعلیمی معیار کو ایک نئی جہت ملی۔
وفاقی وزیر نے کہا کہ مسلسل بہتری اور جدت کو اپنانا یونیورسٹی آف لندن کی نمایاں پہچان ہے، یونیورسٹی تحقیق و ترقی پر بھرپور توجہ دے رہی ہے اور ہر گزرتے سال کے ساتھ تعلیمی معیار میں واضح بہتری دیکھنے میں آ رہی ہے۔
انہوں نے مزید کہا ہے کہ یونیورسٹی آف لندن کے پروگرامز نہ صرف پاکستان بلکہ دنیا بھر میں موجود ہیں، ہم خوش قسمت ہیں کہ دورانِ تعلیم ہمیں ممتاز اور باوقار اساتذہ کی رہنمائی حاصل رہی جبکہ آؤٹ ریچ جیسے پروگرامز تعلیم کے فروغ میں اہم کردار ادا کریں گے۔
