یو اے ای میں موٹر سپورٹس کا نیا باب، UAE4 Series ریسنگ چیمپئن شپ کا آغاز
دبئی (سید مدثر خوشنو) یو اے ای میں بین الاقوامی موٹر سپورٹس کے شائقین کے لیے ایک نیا اور اہم ایونٹ شروع ہونے جا رہا ہے جہاں 2026 کی UAE4 Series ریسنگ چیمپئن شپ کا پہلا سیزن 16 جنوری سے شروع ہوگا۔
یہ مقابلے ابوظہبی کے عالمی شہرت یافتہ Yas Marina Circuit پر منعقد کیے جائیں گے جہاں جدید سہولیات اور بین الاقوامی معیار کے مطابق ریسنگ ٹریک دستیاب ہے۔
رپورٹ کے مطابق UAE4 Series کو نوجوان اور ابھرتے ہوئے ڈرائیورز کے لیے ایک اہم پلیٹ فارم قرار دیا جا رہا ہے جس کا مقصد موٹر سپورٹس میں نئی صلاحیتوں کو فروغ دینا ہے، اس سیریز کے تمام مقابلے Federation Internationale de l Automobile کے مقرر کردہ معیار اور سیفٹی اصولوں کے مطابق ہوں گے تاکہ ڈرائیورز کو بین الاقوامی سطح کی ریسنگ کا تجربہ فراہم کیا جا سکے۔
یہ ریسنگ چیمپئن شپ نہ صرف یو اے ای میں سپورٹس اور انٹرٹینمنٹ کے فروغ کی عکاسی کرتی ہے بلکہ خطے کو عالمی موٹر سپورٹس کیلنڈر میں مزید نمایاں مقام بھی دلا رہی ہے، مختلف ممالک سے آنے والے نوجوان ڈرائیورز اس سیریز میں حصہ لے رہے ہیں جس سے مقابلے کا معیار اور دلچسپی دونوں میں اضافہ متوقع ہے۔
موٹر سپورٹس کے عالمی ایونٹس میں دلچسپی رکھنے والے پاکستانی ناظرین کے لیے بھی یہ چیمپئن شپ خاص توجہ کا مرکز بن سکتی ہے جہاں یو اے ای میں ہونے والے بڑے سپورٹس ایونٹس کی کوریج اور نوجوان ڈرائیورز کی کارکردگی خبروں میں نمایاں رہتی ہے، UAE4 Series جیسے مقابلے خطے میں سپورٹس انٹرٹینمنٹ کے بڑھتے ہوئے رجحان کی واضح مثال ہیں۔
