تین سگی بہنوں نے ورلڈ ایتھلیٹکس لیول ون کوچنگ کورس مکمل کر لیا
لاہور: (ویب ڈیسک) کھیلوں کی فیملی کا بیک گراؤنڈ رکھنے والی لاہور کی تین سگی بہنوں نے ایک ساتھ ورلڈ ایتھلیٹکس کا سی ای سی ایس لیول ون کوچنگ کورس کرنے کا اعزاز حاصل کر لیا۔
لاہور کی آمنہ شہزاد ، عائشہ شہزاد اور فاطمہ شہزاد کا تعلق ایک سپورٹس فیملی سے ہے، ان کے دادا فیاض محمود قریشی نیشنل ایتھلیٹ رہے جبکہ والد شہزاد قریشی نیشنل سوئمر رہے اور اب وہ کرکٹ کوچنگ سے منسلک ہیں۔
تینوں بہنیں بی ایس ہیلتھ اینڈ فزیکل ایجوکیشن کی طالبات ہیں ، سب سے بڑی بہن آمنہ شہزاد کا 8 واں سمیسٹر ہے جبکہ چھوٹی بہنیں عائشہ اور فاطمہ چھٹے سمیسٹر کی طالبات ہیں۔
حال ہی میں لاہور میں پاکستان ایتھلیٹکس فیڈریشن نے ورلڈ ایتھلیٹکس کا کوچز ایجوکیشن سرٹیفکیشن سسٹم کا لیول ون کورس کرایا ۔ اس کورس میں سینئر کوچز بھی شامل تھے لیکن یہ تینوں طالبات بہنیں سب کی توجہ کا مرکز رہیں اور انہوں نے کامیابی کے ساتھ لیول ون کورس مکمل کیا اور ورلڈ ایتھلیٹکس کا سرٹیفکیٹ حاصل کیا۔
تینوں بہنوں کا کہنا ہے کہ سینئر کوچز کے ساتھ کورس مکمل کرنا ہمارے لیے اعزاز ہے ، ہمیں یقین بھی نہیں آ رہا تھا کہ ہم کورس کے لیے منتخب ہوں گی ، کامیابی کے ساتھ کورس مکمل کرنے پر خوش ہیں۔
ان کا کہنا ہے کہ ہم نے کورس کو بہت انجوائے کیا ہے، ہمیں کوئی مشکل پیش نہیں آئی ، اب ہماری کوشش ہو گی کہ لیول 2 کے بعد دیگر لیول بھی کامیابی کے ساتھ مکمل کریں اور کوچنگ کے کیرئیر میں آگے بڑھیں۔
آمنہ ، عائشہ اور فاطمہ کا ماننا ہے کہ جس شعبے میں وہ تعلیم حاصل کر رہی ہیں اس کی وجہ سے ان کے لیے کورس میں بہت آسانی ہوئی ، انہوں نے کہا کہ تعلیم کی وجہ سے ان کے پاس خاصی معلومات تھیں ، کورس کے دوران انہیں پریکٹیکل کرنا پڑا جس میں انہیں تعلیم کی وجہ سے مشکل پیش نہیں آئی۔
