پاک-امریکہ تعلیمی شراکت داری: امریکی ناظم الامور کا یو ایس ای ایف پی کی نئی عمارت کا افتتاح
اسلام آباد: (دنیا نیوز) امریکی ناظم الامور(سی ڈی اے) نیٹلی اے بیکر نے وزیر مملکت برائے تعلیم وجیہہ قمر کے ہمراہ اسلام آباد میں یوایس ایجوکیشنل فاؤنڈیشن ان پاکستان (یو ایس ای ایف پی) کی ایک نئی عمارت کا افتتاح کیا۔
یہ عمارت پاکستان اور امریکہ کی دیرینہ تعلیمی شراکت میں ایک اہم سنگ میل ہے، اس سال پاکستان میں فل برائٹ پروگرام کی 75 ویں سالگرہ کا موقع بھی ہے۔
سی ڈی اے بیکر نے کہا کہ جیسا کہ امریکہ میں اگلے سال اپنی 250 ویں سالگرہ منانے جارہا ہے، یو ایس ای ایف پی کی نئی عمارت امریکہ کے بنیادی نظریات اوران کے عالمی اثرات کو اجاگر کرنے کیلئے پاک- امریکہ تعلقات کو مزید مضبوط بنائے گی۔
امریکی اعانت سے جاری یوایس ای ایف پی کی یہ پانچ منزلہ اور 9755 مربع میٹر پر محیط عمارت، جسے سیکھنے اور تبادلے کے لیے امریکی تعاون سے قائم کیا گیا ہے، تعلیمی وسائل تک رسائی کو وسعت دے گی، پاکستانی طالبعلموں اور اساتذہ کوبااختیار بنائے گی اور جدت کو فروغ دے گی۔
.jpg)
یہ عمارت ایجوکیشن یو ایس اے ایڈوائزنگ سروسز، لنکن کارنر، تربیتی مراکز اورعوامی پروگراموں کو ایک جگہ اکٹھا کرکے پاکستان کی اگلی نسل کو عالمی معیشت میں ترقی کیلئےدرکار مہارتوں اور علم سے آراستہ کرے گی۔
سی ڈی اے بیکر اور وزیر مملکت وجیہہ قمر نے فیتہ کاٹ کرعمارت کا باضابطہ افتتاح کیا، تقریب میں امریکی محکمہ خارجہ کی پرنسپل ڈپٹی اسسٹنٹ سیکرٹری برائے تعلیمی و ثقافتی امور شیری کینیسن ہال، قائم مقام ڈپٹی اسسٹنٹ سیکرٹری برائے جنوبی اور وسطی ایشیائی امور شیلی سیور نے شرکت کی۔
یو ایس ای ایف پی کے ایگزیکٹو ڈائریکٹر پیٹر مورن، یو ایس ای ایف پی کے چیئر مین کمال الدین ٹیپو، فنکار وشاعر ڈاکٹر راجہ چنگیز سلطان اور حکومت پاکستان کے متعدد شعبوں سے تعلق رکھنے والے مہمانوں نے بھی تقریب میں شرکت کی۔
اس موقع پر گفتگو کرتے ہوئے امریکی ناظم الامور نیٹلی بیکر نے نئی عوامی عمارت کے پاکستان میں تعلیم کو فروغ دینے اور پاک-امریکہ دوطرفہ تعلقات کو مضبوط بنانے کے حوالے سے طویل مدتی اثرات پر زور دیا ۔
انہوں نے کہا کہ یہ ایک عمارت سے بڑھ کر ہے، یہ امریکہ اور پاکستان کی تعلیم، جدت اور ایک مزید محفوظ, مضبوط مزید اور خوشحال مستقبل کی تعمیر کے لیے گہری وابستگی کی علامت ہے۔
.jpg)
نیٹلی بیکر نے کہا کہ اسے پاکستانیوں کیلئے امریکہ کے بارے میں مزید جاننے کے لیے ایک عوامی مرکز کے طور پر بھی استعمال کیا جائے گا، اس جگہ پرلوگ ہم سب کو متاثر کرنے والے ان معاملات پرخیالات کا تبادلہ کرنے کے لیے آ سکتے ہیں۔
یو ایس ای ایف پی 1950 میں دوقومی کمیشن کے طور پر قائم ہوا تھا جو تعلیمی اور ثقافتی تبادلوں کے ذریعے باہمی افہام و تفہیم کو فروغ دیتا ہے، یہ دنیا بھر میں قائم 49 فلبرائٹ کمیشنوں میں سے ایک ہے۔
اب تک 9 ہزار سے زیادہ پاکستانی اور لگ بھگ ایک ہزار امریکی شہری یو ایس ای ایف پی کے زیر اہتمام تبادلہ پروگراموں میں شرکت کر چکے ہیں، جس سے دونوں ممالک کے درمیان علمی اور ثقافتی تعلقات کو فروغ حاصل ہوا ہے۔
