×

پاکستان

چیف جسٹس سے انگلینڈ اینڈ ویلز ہائی کورٹ کے جج جسٹس کی ملاقات، باہمی امور پر تبادلہ خیال

بند کریں

اسلام آباد:(دنیا نیوز) چیف جسٹس آف پاکستان سے انگلینڈ اینڈ ویلز ہائی کورٹ کے جج جسٹس مارٹن گریفتھس نے سپریم کورٹ میں ملاقات کی جس میں پاکستان اور برطانیہ کے عدالتی و قانونی اداروں کے درمیان ادارہ جاتی تعاون بڑھانے پر تبادلۂ خیال کیا گیا۔

جسٹس مارٹن گریفتھس ان دنوں پاکستان کے دورے پر ہیں اور جوڈیشل کالج آف انگلینڈ اینڈ ویلز کی ٹریننگ کمیٹی کے چیئرمین جبکہ انر ٹیمپل کی انٹرنیشنل کمیٹی کے رکن بھی ہیں۔

ملاقات میں سپریم کورٹ کے ججز جسٹس محمد شفیع صدیقی اور جسٹس میاں گل حسن اورنگزیب، وفاقی جوڈیشل اکیڈمی کے ڈائریکٹر جنرل اور ڈائریکٹر، سپریم کورٹ بار ایسوسی ایشن کے صدر اور پاکستان بار کونسل کے ڈائریکٹر لیگل ایجوکیشن نے بھی شرکت کی۔

دوسری جانب دوران  گفتگو عدالتی تربیت، ججز کی پیشہ ورانہ ترقی اور استعدادِ کار میں اضافے کے شعبوں میں تعاون کے امکانات کا جائزہ لیا گیا، وفاقی جوڈیشل اکیڈمی اور جوڈیشل کالج آف انگلینڈ اینڈ ویلز کے درمیان منظم تعاون کے امکانات پر بھی گفتگو ہوئی۔

شرکا نے ججز کی عدالتی تعلیم و پیشہ ورانہ تربیت، تربیتی طریقۂ کار، ادارہ جاتی تجربات اور بہترین عدالتی روایات کے تبادلے کی اہمیت پر زور دیا۔

اس موقع پر انر ٹیمپل اور پاکستان کی قانونی برادری کے درمیان پیشہ ورانہ تعاون بڑھانے، وکالت کی تربیت، مسلسل قانونی تعلیم اور وکلاء کی پیشہ ورانہ استعداد میں اضافے کے لیے تعاون کے امکانات پر بھی تبادلۂ خیال کیا گیا۔

چیف جسٹس آف پاکستان نے برطانیہ کے عدالتی اور قانونی اداروں کے ساتھ روابط کو سراہتے ہوئے عدالتی تعلیم اور پیشہ ورانہ استعدادِ کار کے شعبوں میں عملی اور پائیدار ادارہ جاتی تعاون کی امید کا اظہار کیا۔