برطانیہ کا دہشتگردی کے خلاف جنگ میں پاکستان کے ساتھ تعاون جاری رکھنے پر اتفاق
اسلام آباد: (دنیا نیوز) پاکستان اور برطانیہ کے درمیان انسدادِ دہشت گردی سے متعلق دوطرفہ مذاکرات ہوئے، جن میں خطے اور عالمی سطح پر سکیورٹی کی صورتحال، دہشت گرد تنظیموں سے لاحق خطرات اور علاقائی استحکام کے امور پر تفصیلی تبادلہ خیال کیا گیا۔
ترجمان دفتر خارجہ کے مطابق پاکستانی وفد کی قیادت ڈائریکٹر جنرل کاؤنٹر ٹیررازم ڈاکٹر فریحہ بگٹی نے کی، مذاکرات کے دوران برطانوی وفد نے پاکستان میں دہشت گردی کے واقعات کے نتیجے میں بے گناہ انسانی جانوں کے ضیاع پر گہرے دکھ اور افسوس کا اظہار کرتے ہوئے متاثرہ خاندانوں سے تعزیت کی۔
برطانیہ نے دہشت گردی کے خلاف جنگ میں پاکستان کے ساتھ کھڑے رہنے اور تعاون جاری رکھنے کے عزم کا اعادہ کیا، دونوں فریقین نے خطے سمیت عالمی صورتحال پر تعمیری تبادلہ خیال کیا اور دہشت گرد تنظیموں، خصوصاً سرحد پار سرگرم دہشت گرد نیٹ ورکس سے لاحق خطرات کا جائزہ لیا۔
ترجمان کا مزید کہنا تھا کہ مذاکرات میں افغانستان کے اندر اور وہاں سے سرگرم دہشت گرد گروہوں سے لاحق خطرات پر بھی تشویش کا اظہار کیا گیا۔ دونوں ممالک نے علاقائی استحکام اور سلامتی کے لیے پاکستان کی خدمات اور کوششوں کا اعتراف بھی کیا۔
Comments / رائے دیں
Share your thoughts. Comments are reviewed before they appear publicly.
Approved Comments