بھارتی عمرہ زائرین کی بس اور ڈیزل ٹینکر میں تصادم، 42 افراد جاں بحق
ریاض: (دنیا نیوز) سعودی عرب میں بھارتی عمرہ زائرین کی بس اور ڈیزل ٹینکر میں تصادم کے نتیجے میں 42 افراد جاں بحق ہو گئے۔
مقامی حکام امدادی کارروائیوں کے لیے موقع پر پہنچ گئے، ابھی ہلاکتوں کی صحیح تعداد کی تصدیق اور متاثرین کی شناخت کی جارہی ہے۔
بھارتی میڈیا کے مطابق جاں بحق افراد میں ریاست تلنگانہ کے دارالحکومت حیدرآباد سے تعلق رکھنے والے 16 افراد شامل ہیں۔
حادثہ مکہ سے مدینہ جانے والی زائرین کی بس کو پیش آیا ہے، بس میں 43 افراد سوار تھے جن میں 20 خواتین اور 11 بچے شامل تھے، 43 افراد میں سے صرف ایک عمرہ زائر کے زندہ بچ جانے کی اطلاع ملی ہے۔
جدہ میں بھارتی قونصل خانے نے حادثے کے بعد ایک ہیلپ لائن قائم کر دی ہے۔
