×

دنیا

یوکرینی ڈرون حملوں میں 5 افراد ہلاک، روس کا 320 ڈرونز مار گرانے کا دعویٰ

بند کریں

ماسکو: (شاہد گھمن) روسی وزارت دفاع کا کہنا ہے کہ گزشتہ رات ملک کے مختلف علاقوں پر ہونے والے یوکرینی ڈرون حملوں کے دوران فضائی دفاعی نظام نے 320 ڈرونز کو تباہ کر دیا، حملوں میں ماسکو ریجن میں پانچ افراد ہلاک جبکہ 10 افراد زخمی ہوئے ہیں۔

روسی وزارت دفاع کے مطابق 3 اگست کی رات 8 بجے سے 4 اگست کی صبح 8 بجے تک بیلگورود، بریانسک، وولگوگراد، ورونژ، کالوگا، کرسک، لینن گراڈ، لیپٹسک، نزنی نووگورود، نووگورود، اوریول، پسکوف، روستوف، ریازان، اسمولینسک، تویر، تولا، ماسکو ریجن اور کریمیا کے اوپر یوکرینی ڈرونز کو مار گرایا گیا۔

ماسکو ریجن کے گورنر آندرے وروبیوف کے مطابق سب سے زیادہ حملے چیخوف ضلع میں ہوئے، جہاں نووسیلکی کے صنعتی علاقے میں کئی مقامات پر آگ بھڑک اٹھی۔ ایک گودام میں لگنے والی آگ پر تقریباً قابو پا لیا گیا ہے، جبکہ بجلی کے سب اسٹیشن اور ایک انتظامی عمارت کو بھی نقصان پہنچا۔؎

گورنر کے مطابق تمام زخمیوں کو طبی سہولیات فراہم کی جا رہی ہیں، جن میں ایک کی حالت تشویشناک اور سات کی حالت درمیانی نوعیت کی بتائی گئی ہے۔

دوسری جانب لینن گراڈ ریجن کے علاقے کراسنی بور میں ڈرون حملے کے نتیجے میں وائلڈ بیریز (Wildberries) کے لاجسٹک مرکز میں آگ لگ گئی۔ کمپنی کے مطابق احتیاطاً تمام عملے کو محفوظ مقام پر منتقل کر دیا گیا، جبکہ ایک شخص زخمی ہوا ہے۔ مقامی حکام نے ہنگامی آپریشن ہیڈکوارٹر قائم کر دیا ہے اور آگ بجھانے کا عمل جاری ہے۔

ادھر تویر ریجن کے علاقے ایماؤس میں بھی ڈرون کا ملبہ وائلڈ بیریز کے ایک گودام پر گرا، جس سے عمارت کی دیوار کو جزوی نقصان پہنچا، تاہم کسی جانی نقصان کی اطلاع نہیں ملی۔