خصوصی عدالتوں، ٹربیونلز، لا افسروں کے الاؤنسز روکنے کے احکامات معطل
اسلام آباد(اپنے نامہ نگارسے )اسلام آباد ہائی کورٹ نے خصوصی عدالتوں، ٹربیونلز اور لا افسروں کے جوڈیشل اوریوٹیلٹی الاؤنسز کی ادائیگی روکنے کے احکامات معطل کرتے ہوئے وفاق اور وزارت خزانہ، کنٹرولر جنرل اکاؤنٹس اور اکاؤنٹنٹ جنرل پاکستان کو نوٹس جاری کرکے دو ہفتوں میں جواب طلب کرلیا۔
جسٹس ارباب محمد طاہر نے کسٹم ٹربیونل کے ملازمین کی درخواست پر سماعت کا حکمنامہ جاری کیا اور قرار دیا کہ 5 اور 15 ستمبر 2025ء کے آرڈرز کے خطوط معطل کیے جاتے ہیں۔ عدالت نے فریقین کو دو ہفتوں میں پیراوائز کمنٹس جمع کرانے کی ہدایت کی۔ تحریری حکمنامہ میں کہا گیا کہ درخواست گزاروں کے وکیل نے عدالت میں پیش ہو کر موقف اختیار کیاکہ جو ملازمین عدالت گئے اور حکم امتناع لیا ان کے الاؤنسز بحال رکھے گئے جبکہ دیگر ملازمین کو ادائیگی روک دی گئی۔ لاہور ہائیکورٹ ملتان اور بہاولپور بینچز نے احکامات پہلے ہی معطل کر رکھے ہیں۔ آئندہ سماعت 9 فروری کو ہو گی۔
