وزیراعظم نے نئی نہروں کے معاملے پر اہم اجلاس آج طلب کرلیا
اسلام آباد(دنیا نیوز)وزیراعظم شہبازشریف نے نہروں کے معاملے پر اہم اجلاس آج طلب کرلیا۔ ذرائع کے مطابق سی سی آئی کے فیصلے کی روشنی میں نہروں کے معاملے پر مشاورت کی جائے گی،اجلاس میں نائب وزیراعظم اسحاق ڈار،وزیر قانون اعظم نذیر تارڑشرکت کریں گے جبکہ وزارت آبی وسائل کے حکام بھی موجود ہوں گے ۔
اجلاس میں وفاقی وزیرمنصوبہ بندی،وزیراقتصادی امور اوراٹارنی جنرل کوبھی بلایاگیاہے ۔ ذرائع کاکہنا ہے کہ پیپلزپارٹی نے نئی نہروں کے معاملے پرشدید تحفظات کا اظہار کیا تھا، گزشتہ سال وزیر اعظم کی زیر صدارت سی سی آئی نے نہروں کی تعمیر کو روک دیا تھا۔ وفاقی حکومت نے فیصلہ کیاتھا کہ سی سی آئی سے باہمی اتفاق کے بغیر نئی نہریں نہیں بنائی جائیں گی، صوبوں کے درمیان باہمی اتفاق پیدا ہونے تک وفاقی حکومت آگے نہیں بڑھے گی۔ سٹرٹیجک اہمیت کی حامل6 نہروں میں تھرکینال،رینی کینال،چولستان کینال ،گریٹر تھر کینال،کچھی کینال اور چشمہ رائٹ بینک کینال شامل ہیں۔ صدرمملکت کو ان نہروں کی بیک وقت تعمیرکی ضرورت پر بریف کیا گیا تھا اوران کینالزکی تعمیر کوملکی فوڈ سکیورٹی بڑھانے ،زرعی ترقی کے لیے ضروری قراددیاگیا تھا۔
