آج کا پکوان: قیمہ کڑاہی
اجزاء:ہاتھ سے کٹا ہوا گائے کا قیمہ آدھا کلو، پسا ہوا لہسن ادرک ایک کھانے کا چمچ، کٹی ہوئی پیازایک عدد، کٹے ہوئے ٹماٹر چار عدد، پسی ہوئی لال مرچ ایک کھانے کا چمچ، بھنا اور کٹا ہوا سفید زیرہ دو چائے کے چمچ، کٹا ہوا دھنیا دو چائے کے چمچ، کٹی ہوئی ہری مرچیں دو کھانے کے چمچ، کٹا ہوا ہرا دھنیا دو کھانے کے چمچ، کٹی ہوئی ہری پیاز دو کھانے کے چمچ، پودینہ چند پتے، پسا ہو ا گرم مصالحہ چوتھائی چائے کا چمچ، پانی ایک پیالی، نمک ایک چائے کا چمچ، تیل آدھی پیالی، کٹا ہوا ہرا دھنیا اور ادرک سجانے کیلئے۔
ترکیب:کڑاہی میں تیل گرم کرکے پیاز سنہری کرلیں۔ اس میں لہسن ادرک، ٹماٹر، لال مرچ اور نمک ملا کر پکائیں، پھر قیمہ ڈالیں اور ڈھکن دے کر پندرہ منٹ تک پکائیں، قیمے کو تیل علیحدہ ہونے تک بھونیں۔ اس میں دھنیا، سفید زیرہ اور پانی ملا کر قیمہ گلنے تک پکائیں، پھر ہری مرچیں، ہرا دھنیا، ہری پیاز، پودینہ اور گرم مصالحہ ملا کر ڈش میں نکال لیں۔ اسے ادرک اور ہرے دھنیے سے سجا دیں۔
افغانی مسلم پلاؤ
اجزاء : چکن ایک کلو، چاول تین پیالی، نمک حسب ذائقہ، ادرک لہسن پسا ہوا دو کھانے کے چمچ، فرائی پیاز ایک پیالی، ٹماٹر پانچ عدد، سرکہ دو کھانے کے چمچ، سفید مرچ پسی ہوئی ایک چائے کا چچ، پسی ہوئی لال مرچ ایک کھانے کا چمچ، آلو دو عدد درمیانے، تیز پات ایک پتہ، ہری مرچیں 11 عدد، تیل حسب ضرورت۔
ترکیب:چکن کے بڑے ٹکڑے کر کے صاف دھولیں، پھر انہیں نمک، سرکہ اور چار سے چھ پسی ہوئی ہری مرچیں لگا کر رکھ دیں۔ کچھ دیر بعد انہیں تیل میں ڈیپ فرائی کر کے نکال لیں، بڑے پین میں چار سے چھ کھانے کے چمچ تیل میں تیز پات ڈال کر گرم کریں اور اس میں ادرک لہسن ڈال کر ایک سے دو منٹ فرائی کریں۔ پھراس میں پیاز اور ٹماٹر کو بلینڈ کرکے ڈالیں اور ساتھ ہی نمک، لال مرچ اور سفید مرچ ڈال کر تیل علیحدہ ہونے تک بھونیں۔ آخر میں فرائی کرکے رکھی ہوئی چکن ڈال کر اچھی طرح ملا لیں۔ چاولوں کو نمک اور ہری مرچیں ڈال کر ایک کنی ابال لیں اور ان کے درمیان میں چکن کا مصالحہ رکھ دیں، کناروںپر چکن اور فرائی کیے ہوئے آلوؤں کے ٹکڑے رکھ کر اوپر سے اچار ڈال دیں۔ ڈھک کر ہلکی آنچ پر10 سے 12 کیلئے دم پر رکھ دیں۔ ڈش میں نکالتے ہوئے اچھی طرح ملا کر نکالیں اور پیش کریں۔
