خوشبودار اور مفید دار چینی
اسپیشل فیچر
دارچینی جو عرف عام میں دال چینی کے نام سے مشہور ہے۔ یہ ایک درخت کی خوشبودار چھال ہے۔ جو ہر گھر میں گرم مصالحوں میں استعمال ہوتی ہے۔ یہ پیس کر سالن کو خوش ذائقہ بنانے کیلئے استعمال کی جاتی ہے۔ زمانہ قدیم سے دارچینی کا استعمال دوائیوں میں ہوتا آیا ہے‘ حکیم جالینوس‘ قدیم ہندی اطباء اور اسلامی اطباء نے دارچینی کا ذکر کیا ہے۔دارچینی کا رنگ بھورا سیاہ مائل ہوتا ہے۔ اس کا ذائقہ شیریں تیز اور نہایت خوشگوار ہوتا ہے۔ اس کا مزاج گرم و خشک نمبر3 بیان کیا گیا ہے۔ اس کی قوت پندرہ سال تک قائم رہتی ہے۔ اس کی مقدار خوراک دو ماشہ تک ہے۔ بعض حالات میں اس کی خوراک کی مقدار ایک تولہ یومیہ بھی ہو سکتی ہے۔دارچینی کے فوائد1- دارچینی ایک بہترین خوشبودار چیز ہے جو کہ دافع تعفن ہے۔2- اس کی تاثیر قابض ہوتی ہے۔3- سدہ کھولتی ہے۔4- محلل ریاح اور ارواح کی محافظ ہے۔ اس لیے اس کو معجونوں اور مفرحات میں استعمال کیا جاتا ہے۔5- کھانسی اور دمہ میں دارچینی کو ہم وزن شہد میں ملا کر چٹانے سے فائدہ ہوتا ہے۔6- اگر سردی کی وجہ سے بار بار پیشاب آتا ہو تو دو ماشہ سفوف دار چینی ہمراہ دودھ پلانا مفید ہے۔7- دارچینی کا تیل سرد بیماریوں اور مختلف نوعیت کے سردرد کیلئے مفید ہوتا ہے۔ 8- منہ کی بدبودار آواز کو درست کرنے کیلئے دارچینی‘ تج‘ دانہ الائچی خورد‘ خولنجاں اور مصری ہم وزن پیس کر عرق گلاب میں کھرل کر کے چنے کے برابر گولیاں بنائیں۔ چار چار گھنٹہ بعد ایک گولی منہ میں رکھ کر چوسنے سے شفاء ہوتی ہے۔9- دانتوں اور مسوڑھوں کی تکالیف میں روغن دار چینی بہت مفید ہوتا ہے۔10- روغن دار چینی سر کا تنقیہ کرتا ہے کیونکہ یہ اپنی لطافت اور قوت حرارت کی وجہ سے جلد نفوذ کر جانے کے باعث دماغ کی رطوبت کو جذب کرتا ہے۔ اس کے علاوہ سینہ کی رطوبات کو بھی صاف کرتا ہے ۔11- روغن دار چینی‘ درد گردہ و درد رحم کو بھی نفع دیتا ہے۔ ایسی صورت میں پانچ قطرے روغن دار چینی دودھ کے ساتھ پینا مفید ہے اس کو بیرونی طور پر درد گردہ کی صورت میں پشت پر اور درد رحم کی صورت ناف کے نیچے لگانے سے فائدہ ہوتا ہی۔12- آنکھوں کے پھولے میں روغن دار چینی کھانے اور لگانے سے فائدہ ہوتا ہے۔ کھانے کی خوراک پانچ قطرے دودھ کے ہمراہ ہے۔13- کثرت طمث اور سیلان الرحم میں دار چینی چھ ماشہ ثعلب مصری ایک تولہ صدف خالص دو تولہ اور چینی ان تمام باقی ماندہ ادویہ کے ہم وزن لے کر سفوف بنائیں۔ تین ماشہ سفوف صبح و شام ہمراہ پانی استعمال کرنا مفید ہوتا ہے۔14- نزلے اور زکام میں دارچینی کا سفوف ایک ایک ماشہ صبح و شام ہمراہ پانی استعمال کرنا مفید ہے۔15- دارچینی کا جوشاندہ ہر قسم کی کھانسی کیلئے مفید ہے۔ دارچینی چار ماشہ‘ بیہدانہ شیریں چار ماشہ‘ اصل السوس ایک تولہ‘ زو فا ایک تولہ‘ انجیر زرد تین عدد‘ کوکنار دو تولہ اور کوزہ مصری ایک تولہ‘ ان تمام ادویہ کو آدھ سیر پانی میں جوش دیں پھر مل چھان کر شیشی میں محفوظ کر لیں۔ دن میں تین دفعہ صبح دوپہر شام پانچ تولہ کی مقدار میں نیم گرم کر کے پلانے سے فائدہ ہوتا ہے۔16- پھلبہری‘ برص اور بہق کے امراض میں اسے رگڑ کر طلاء کرنے سے نشانات بہتر ہو جاتے ہیں۔17- زہریلے جانوروں کے کاٹے پر درد اور سوزش کی تسکین کیلئے درد پر پیس کر لیپ کرنے سے بہت فائدہ دیتی ہے۔18- بواسیری مسوں پر دارچینی رگڑ کر لیپ کرنا بہت فائدہ دیتا ہے۔19- دارچینی اور ہلیلہ کا بلی ہم وزن رگڑ کر سفوف بنا کر تین ماشہ صبح و شام استعمال کرنے سے استسقاء کو بے حد مفید ہوتا ہے۔20- نسیان کو دور کرنے کیلئے دارچینی کا سفوف دو دو ماشے صبح و شام نیم گرم دودھ کے ساتھ استعمال کرنا چاہیے‘ مجرب ہے۔ 21- کثرت پیشاب میں دارچینی اور کندرہم وزن باریک پیس کر دو ماشہ سفوف پانی کے ہمراہ صبح و شام استعمال کرنا مفید ہے۔22- حافظہ کی تقویت اور نسیان کے مرض کو دور کرنے کیلئے دارچینی دو تولہ‘ تج ایک تولہ اور ہلیلہ کابلی ایک تولہ بنات سفید (چینی) چار تولے پیس کر سفوف بنائیں اور ایک ماشہ سے تین ماشہ تک صبح و شام ہمراہ پانی استعمال کرنا فائدہ مند ہوتا ہے۔٭…٭…٭
