اقوام متحدہ سمیت عالمی اداروں کے فری کورسز ، اہم شعبوں میں ایک سے زیادہ کورسز بھی دستیاب ہیں
اسپیشل فیچر
دنیا بھر میں ہر سال لاکھوں سکالر شپس دئیے جاتے ہیں مگر پاکستا نیوں کاحصہ ان میں نہایت کم ہے اس لئے نہیں کہ انہیں انکار کیا جاتا ہے بلکہ ا س لئے کہ علم نہ ہونے کے باعث وہ درخواست ہی نہیں دے پاتے ، اسی سال کے آغاز میں ایک جگہ 17سو اور دوسری جگہ ڈھائی ہزار آن لائن کورسز کا اعلان کیا گیا تھا، آپ میں سے کتنوں نے اپلائی کیا؟
گزشتہ برس دسمبر میں اقوام متحدہ نے غیر معینہ مدت کیلئے متعدد شعبوں میں فری آن لائن کورسز کا اجراء کیا ،ان کے لئے کوئی ڈیڈ لائن مقرر ہے نہ ہی تعلیمی قابلیت۔ ایف اے پاس سے پی ایچ ڈی تک، کوئی بھی حصہ لے سکتا ہے۔
آن لائن کورسز کا اعلان کرتے وقت اقوام متحدہ نے لکھا کہ '' ہمارے نام سے تو ہر کوئی واقف ہے،اسی لئے ہمارے کورسز کے دروازے بھی ہر کسی پر کھلے ہیں، کسی بھی ملک کاکوئی بھی شہری حصہ لے سکتا ہے‘‘۔
ایک انتہائی اہم پروگرام ''انٹرنیشنل وولنٹیئر پروگرام ‘‘ 2021ء میں جاری کیا گیا تھا۔اگرچہ ا س کی معیاد نکل گئی ہے لیکن گھبرانے کی ضرورت نہیں ،ایسے پروگرام ہر سال میں جاری ہوتے رہتے ہیں۔
اقوام متحدہ نے اعلان کیاہے کہ وہ سرٹیفکیٹ بھی فری جاری کرے گا۔ وہ جانتا ہے کہ ہاروڈیونیورسٹی اور آکسفورڈ جیسے ادارے بھی فری آن لائن کورسز کروا رہے ہیں۔ کورسز تو مفت ہیں لیکن سرٹیفکیٹ کی فیسیں وصول کی جا رہی ہیں جو اگرچہ معمولی ہیں لیکن ہیں تو۔ اقوام متحدہ تو یہ قیمت بھی نہیں لے رہا۔اس ادارے کے ساتھ اس کے ذیلی ادرے جیسا کہ یونیسیف، ڈبلیو ایچ او، آئی ایم ایف اور عالمی بینک بھی کچھ کورسز میں شریک ہیں اور ان اداروں نے الگ سے بھی فری آن لائن کورسز جاری کر رکھے ہیں۔
اقوام متحدہ کے شعبوں میں زراعت،بچے ، یوتھ، جمہوریت، گورننس، اسلحہ کا عدم پھیلائو، تعلیم، ماحولیات، کلائمنٹ چینج،معاشی و سماجی ترقی، نیوٹریشن، صحت، انسانی حقوق،انسانی بہبود، انٹرنیشنل لاء، عالمی نظام انصاف ،عالمی تجارت، و معیشت، مہاجرین وامیگریشن، قدرتی وسائل، پانی ،توانائی،امن کی بحالی، سلامتی، بہبودآبادی، ڈیمو گرافی، ہاتھوں کی صفائی، وویمن، جینڈرگیپ اور لسانیات بھی شامل ہیں۔
عالمی بینک الگ سے بھی کورسز اکا اجراء کرتا رہتا ہے ۔اس ضمن میں اس کا ایک بڑ اپروگرام ''اوپن لرننگ کیمپس‘‘ کے زیر عنوان پہلے سے ہی چل رہا ہے۔ یہ تمام پروگرام 20 زبانوں میں کرائے جارہے ہیں۔ جبکہ یونیسیف کے فری پروگراموں کی تعداد276ہے۔ یہ بھی کئی شعبوں او رمختلف زبانوں میں دستیاب ہیں۔عالمی مالیاتی فنڈبھی ترقی سے متعلقہ شعبوں میں فری کورسز کا اجراء کرتا رہتا ہے، اس کے پروگراموں میں ہر سال 60ہزار طلبا ء شرکت کرتے ہیں۔ کووڈ ۔19کے بارے میں عالمی ادارہ صحت نے بھی چھوٹے چھوٹے کورسزکرائے ہیں۔درجنوں ویب سائٹس پر بے شمار کورسز کی تفصیلات دستیاب ہیں ۔عالمی ادارہ محنت بھی لیبر کی صورتحال میں اصلاح کے لئے کئی کورسز جاری کر رکھے ہیں،یہ بھی مختلف مہینوں میں کرائے جاتے رہتے ہیں۔بعض اداروں نے کمپیوٹر ، ڈیجیٹل مارکیٹنگ ، ڈیٹا انالسٹ، گرافک ڈیزائنر ،سیلزاور نیٹ ورکنگ کے شعبوں میں بھی کورسز جاری کر رکھے ہیں، جن کی تعدا دکم نہیں ہے،وقت کے ساتھ ساتھ ان کورسز کی مانگ بھی بڑھتی جائیگی۔ہاورڈ یونیورسٹی بھی کمپیوٹر اور کورونا کے حوالے سے کئی کورسز کروا چکی ہے مزید کابھی اعلان ہوگا۔ایم آئی ٹی بھی اس ضمن میں اپنے منصوبے پیش کرتی رہتی ہے۔
بزنس مینجمنٹ، تعمیرات،کسٹمر سروس، ایونٹ مینجمنٹ، فیشن ڈیزائننگ،ہوٹل مینجمنٹ،ہیومن ریسورسز، انٹر نیٹ مارکیٹنگ، پبلک ریلیشنز، سپلائی چین، رسک مینجمنٹ، ٹریول، اکائونٹنگ اینڈ فنانس ، ڈائٹ، نیوٹریشن، سوشل میڈیا مینجمنٹ،سائبر سکیورٹی،لائف کوچنگ کورس، انتظامی امور کی تربیت ،فراڈ سے بچائو، نظام انہضام،خوارک کے مسائل، وزن میں کمی،مینی کیور، پیڈی کیور،روم ڈیزائننگ،بزنس ایتھکس،آٹزم اور سٹریٹیجک پلاننگ کے کورسز بھی مل سکتے ہیں۔ آپ کو صرف تیار رہنے کی ضرورت ہے۔
دیگر اداروں میں گوگل، برٹش کونسل، ڈیکن یونیورسٹی (Deakin University)،گریفن یونیورسٹی، کونوینٹری یونیورسٹی، کنگس کالج، یونیورسٹی آف مشی گن، ہیلتھ ایجوکیشن انگلینڈ، ڈبلیو ایچ او، یونیورسٹی آف لیڈز،یونیورسٹی آف اینڈنبرا، ویلکم جینوم کیمپس ایڈوانسڈ کورسز ،یونیورسٹی آف ملبورن،یونیورسٹی آف ریڈنگ، بزنس سکول لندن ،سکول آف ہائجین اور یو کے ہیلتھ ریپڈ سپورٹ ٹیم جیسے مایہ ناز ادارے اور یونیورسٹیاں بھی شامل ہیں۔
