2025 : گرمی کی شدت اور موسمیاتی خطرات
اسپیشل فیچر
پاکستان جو پہلے ہی موسمیاتی تبدیلیوں کے انتہائی خطرناک اثرات کا شکار ہے 2025ء میں شدید گرمی اور موسمیاتی بحران کے نئے چیلنجز کا سامنا کر رہا ہے۔ گزشتہ دہائی میں ملک میں درجہ حرارت میں مسلسل اضافہ، غیرمعمولی گرمی کی لہریں اور موسموں کے تغیرات نے ماہرین کو تشویش میں ڈال دیا ہے۔ عالمی حدت کے اثرات، جنگلات کی کٹائی اور شہری آبادیوں میں بے ہنگم پھیلاؤ نے صورتحال کو مزید سنگین بنا دیا ہے۔پاکستان دنیا کے ان ممالک میں شامل ہے جو موسمیاتی تبدیلیوں کے سب سے زیادہ اثرات قبول کر رہے ہیں، حالانکہ یہ عالمی کاربن اخراج میں صرف 1% سے بھی کم حصہ ڈالتا ہے۔ گلوبل کلائمیٹ رسک انڈیکس 2023 کے مطابق پاکستان موسمیاتی آفات سے سب سے زیادہ متاثر ہونے والے ممالک میں آٹھویں نمبر پر ہے۔ ہمالیہ کے گلیشیئرز جو ملک کے لیے پانی کا بنیادی ذریعہ ہیں، تیزی سے پگھل رہے ہیں، جبکہ دریاؤں کے بہاؤ میں بے قاعدگی اور بارشوں کے غیرمتوقع نمونے زراعت اور آبی وسائل کو شدید خطرے میں ڈال رہے ہیں۔
2025 میں گرمی کی شدت
ماہرین ماحولیات کے مطابق رواں سال پاکستان میں اوسط درجہ حرارت میں 1.5 سے 2 ڈگری سنٹی گریڈ تک اضافے کا امکان ہے۔ ورلڈ بینک کی ایک رپورٹ کے مطابق اگر اسی شرح سے کاربن اخراج جاری رہا تو صوبہ سندھ اور جنوبی پنجاب میں گرمی کی لہریں 50 ڈگری سنٹی گریڈ تک پہنچ سکتی ہیں۔ اس کی بنیادی وجوہات میں فوسل فیولز کا بے تحاشا استعمال، جنگلات کی کٹائی اور شہری علاقوں میں کنکریٹ کے جنگل کا پھیلاؤ شامل ہیں۔ شہروں میں گرین سپیس کی کمی اور آلودگی نے ہیٹ آئیلینڈ ایفیکٹ (Heat Island Effect)کو جنم دیا ہے، جس کی وجہ سے شہری علاقوں میں درجہ حرارت آس پاس کے دیہی علاقوں کے مقابلے میں بڑھ جاتا ہے کیونکہ عمارتیں، سڑکیں اور دیگر انفراسٹرکچر حرارت جذب اور دوبارہ خارج کرتے ہیں۔ ہیٹ آئیلینڈ ایفیکٹ کی وجہ سے شہری علاقوں میں درجہ حرارت دیہی علاقوں کے مقابلے میں 5سے7 ڈگری بڑھ جاتا ہے۔
شدید گرمی انسانی صحت کے لیے سنگین خطرہ بن چکی ہے۔ ہیٹ ویوز کے باعث ہیٹ سٹروک، ڈی ہائیڈریشن اور دل کی بیماریوں میں نمایاں اضافہ متوقع ہے۔ خصوصاً کراچی، لاہور، اور حیدرآباد جیسے گنجان آباد شہروں میں کم آمدنی والے طبقے زیادہ متاثر ہوسکتے ہیں جہاں ٹھنڈک کے لیے بجلی تک رسائی محدود ہے۔ عالمی ادارہ صحت (WHO) کے مطابق 65 سال سے زائد عمر کے افراد اور بچے سب سے زیادہ خطرے میں ہیں۔ اس کے علاوہ گرمی کی وجہ سے پانی سے پیدا ہونے والی بیماریاں (جیسے ہیضہ) اور مچھروں سے پھیلنے والے امراض (ڈینگی، ملیریا) بھی بڑھ سکتے ہیں۔
زراعت اور خوراک کو خطرات
پاکستان کی معیشت کا 24 فیصدسے زائد حصہ زراعت پر انحصار کرتا ہے، جو موسمیاتی تبدیلیوں کے لیے انتہائی حساس شعبہ ہے۔ 2025ء تک گندم، کپاس، اور چاول کی پیداوار میں 15سے20 تک کمی کا اندیشہ ظاہر کیا گیا تھا، جس کی وجہ سے خوراک کی قلت اور افراطِ زر میں اضافہ ہو سکتا ہے۔ دریائے سندھ کے طاس پر انحصار کرنے والے کسانوں کے لیے پانی کی کمی ایک بڑا مسئلہ بن جائے گی۔ ماہرین کے مطابق اگر آبپاشی کے جدید طریقے اپنائے نہ گئے اور موسم کے مطابق فصلوں کی اقسام تیار نہ کی گئیں تو لاکھوں افراد غربت کی لکیر سے نیچے چلے جائیں گے۔
پانی کا بحران
پاکستان کا 60 فیصدسے زائد پانی گلیشیئرز اور برف پگھلنے سے حاصل ہوتا ہے۔ موسمیاتی تبدیلیوں کے باعث گلیشیئرز کے تیزی سے پگھلنے سے ابتدائی طور پر سیلابوں میں اضافہ ہوگا لیکن 2025ء میں زیرِ زمین پانی کی سطح خطرناک حد تک گر سکتی ہے۔ پانی کی کمی نہ صرف پینے کے صاف پانی تک رسائی کو متاثر کرے گی بلکہ صنعتوں اور توانائی کے شعبے (خاص طور پر ہائیڈرو پاور) کو بھی نقصان پہنچائے گی۔ ورلڈ ریسورسز انسٹی ٹیوٹ کے مطابق پاکستان 2040ء تک دنیا کے ''انتہائی پانی کے مسائل‘‘ والے ممالک میں شامل ہو جائے گا۔شدید گرمی کی لہریں پاور گرڈ کو بھی ناکام بنا سکتی ہیں۔ 2022ء میں لاہور میں بجلی کے نظام کی خرابی کے بعد سے صورتحال مزید سنگین ہو چکی ہے۔ ایئر کنڈیشننگ اور ٹیوب ویلز کی بڑھتی ہوئی طلب بجلی کی فراہمی اور تقسیم کے نظام پر مزید بوجھ ڈال رہی ہے۔ سڑکیں اور عمارتیں بھی شدید گرمی سے متاثر ہو سکتی ہیں جبکہ صحت کی سہولیات مریضوں کی بڑھتی ہوئی تعداد کے لیے تیار نہیں ہوں گی۔موسمیاتی تبدیلیوں کے اثرات ہر طبقے پر یکساں نہیں پڑتے۔ دیہی علاقوں میں رہنے والے کسان اور شہروں کے غریب محنت کش جن کے پاس گرمی سے بچاؤ کے وسائل کم ہیں، سب سے زیادہ متاثر ہوں گے۔ بین الاقوامی ادارے آکسفیم کے مطابق پاکستان میں 40 فیصدسے زائد آبادی غربت کی لکیر کے قریب ہے، جو انہیں موسمیاتی صدمات کے لیے انتہائی کمزور بنا دیتی ہے۔
ممکنہ حل اور تخفیف کی حکمت عملی
توانائی کا منتقلی: شمسی اور ہوا سے چلنے والی توانائی میں سرمایہ کاری کرکے فوسل فیولز پر انحصار کم کیا جا سکتا ہے۔
شہری منصوبہ بندی: پارکس اور سبز علاقوں کو بڑھا کر ہیٹ آئیلینڈ ایفیکٹ کو کم کیا جا سکتا ہے۔
پانی کا موثر استعمال: ڈرپ آبپاشی اور بارش کے پانی کے ذخیرہ کو فروغ دینا۔
عوامی بیداری: گرمی سے بچاؤ کے طریقوں اور ہنگامی ردعمل پر تربیت۔
بین الاقوامی تعاون: گرین کلائمیٹ فنڈ جیسے اداروں سے مالی وسائل کا حصول۔
2025ء میں پاکستان کو درپیش موسمیاتی چیلنجز صرف ماحولیاتی مسائل نہیں، بلکہ قومی سلامتی اور معاشی استحکام کے لیے خطرہ ہیں۔ ان خطرات سے نمٹنے کے لیے فوری اور جامع اقدامات کی ضرورت ہے، جس میں حکومت، عوام اور عالمی برادری کی مشترکہ کوششیں شامل ہیں۔ ہمیں اپنے بچوں کے لیے ایک محفوظ مستقبل کی تعمیر کے لیے آج ہی قدم اٹھانا ہوگا۔
