معطل مردم شماری

بالآخر ملک کی چھٹی مردم شماری کے ابتدائی نتائج سامنے آ گئے۔ یہ نتائج کسی انکشاف سے کم نہیں۔ ملک کی آبادی بیس کروڑ ستتر لاکھ سے زیادہ ہو چکی ہے۔ آبادی میں سالانہ اضافے کی رفتار دو اعشاریہ چار فی صد ہے‘ جو نارمل سے بہت زیادہ ہے۔ اس شرح کے ساتھ ملکی آبادی میں سالانہ اضافہ تقریباً پچاس لاکھ بنتا ہے جو بہت خطرناک شرح ہے، کیونکہ سالانہ اضافے کے اعتبار سے پاکستان، چین اور انڈیا کے بعد، دنیا کا تیسرا بڑا ملک بن چکا ہے۔ اسی طرح کل آبادی کے اعتبار سے پاکستان دنیا کا چھٹا بڑا ملک ہے‘ اور اس کی یہ حیثیت پچھلی تقریباً دو دہائیوں سے برقرار ہے۔ کل آبادی کے اعتبار سے دنیا کا پانچواں بڑا ملک برازیل ہے۔ اس کی آبادی تقریباً اکیس کروڑ بارہ لاکھ ہے جبکہ سالانہ اضافے کی شرح ایک فی صد سے بھی کم (یعنی 0.8 فیصد) ہے۔ اس حساب سے کچھ عرصے میں پاکستان آبادی کے لحاظ سے دنیا کا پانچواں بڑا ملک بن جائے گا جو یقینا باعث تشویش ہے۔ واضح رہے کہ اپنے قیامِ کے وقت آبادی کے اعتبار سے موجودہ پاکستان (مغربی پاکستان) دنیا کا چودہواں بڑا ملک تھا۔ 1951ء میں ملک کی پہلی مردم شماری کے مطابق موجودہ پاکستان کی کل آبادی صرف تین کروڑ سینتیس لاکھ (33.7 ملین) تھی‘ جو کہ 1961ء میں بڑھ کر 43 ملین ہو گئی‘ جبکہ اسی مردم شماری (1961ء) میں مشرقی پاکستان کی آبادی 50 ملین تھی‘ یعنی مغربی پاکستان کی آبادی مشرقی پاکستان سے70 لاکھ کم تھی۔ موجودہ بنگلہ دیش کی آبادی 1981ء تک پاکستان سے زیادہ رہی۔ اسی سال دونوں ملکوں میں مردم شماری ہوئی‘ جن کے مطابق بنگلہ دیش کی آبادی 87 ملین تھی جبکہ پاکستان کی آبادی 84 ملین تھی۔ یعنی 1961ء میں جو فرق 70 لاکھ تھا وہ کم ہو کر تیس لاکھ رہ گیا۔ بنگلہ دیش میں اگلی مردم شماری 1991ء میں تواتر برقرار رکھتے ہوئے ہوئی‘ جس کے مطابق ملک کی آبادی دس کروڑ ساٹھ لاکھ تھی۔ پاکستان میں مردم شماری تو التوا کا شکار ہو گئی مگر تخمینے کے مطابق پاکستان بنگلہ دیش سے آبادی کے لحاظ سے آگے نکل چکا تھا۔ بنگلہ دیش کا آبادی کے بڑھنے کی رفتار پر قابو پانا ایک بڑی کامیابی ہے۔ 2017ء کے تخمینے کے مطابق بنگلہ دیش کی آبادی صرف ساڑ ھے سولہ کروڑ (165 ملین) ہے‘ جس کا واضح مطلب یہ ہے کہ اس کی آبادی پاکستان سے چار کروڑ بیس لاکھ (42 ملین) کم ہے۔ اگر بنگلہ دیش آبادی کے بڑھنے کی رفتار پر کامیابی سے قابو پا سکتا ہے تو پاکستان کیوں نہیں؟ ترکی، انڈونیشیا اور ایران وہ دیگر مسلم ممالک ہیں‘ جنہوں نے اس مسئلے پر قابو پایا ہے‘ جبکہ مجموعی طور پر مسلم ممالک میں آبادی میں اضافہ دنیا میں سب سے زیادہ ہے۔

پاکستان میں جمہوریت کی طرح مردم شماری کا انعقاد بھی تعطل کا شکار رہا ہے‘ جیسا کہ 1991ء میں مردم شماری ہونا ضروری تھا‘ مگر جمہوری حکومت ہونے کے باوجود نہ کرائی گئی‘ اور سات سال کی تاخیر کے بعد 1998ء میں ہوئی۔ اس کے بعد دس سال کے وقفہ سے 2008ء میں ہونی چاہئے تھی‘ مگر ایک بار پھر باوجود جمہوری حکومت کے نہ ہو سکی۔ المیہ یہ ہے کہ موجودہ مردم شماری کے نتائج پر تنقید کرنے والی پیپلز پارٹی اس وقت (2008ء میں) اقتدار میں تھی۔ اسے اپنی نگرانی میں لازمی طور پر مردم شماری کروانی چاہئے تھی۔ کیا ہی اچھا ہوتا‘ اگر وہ (پیپلز پارٹی) 2011ء میں ہی کروا دیتی تاکہ جمہوریت کے ساتھ مردم شماری بھی پٹڑی پر چڑھ جاتی‘ مگر 19 سال کی مجرمانہ غفلت کے بعد مردم شماری ممکن ہوئی‘ جو ایک قومی المیہ سے کم نہیں۔ دیکھنا یہ ہے کہ اب اگلی مردم شماری کا انعقاد کب ہوتا ہے۔ اگر دہائی کے پہلے سال کی

ترتیب کو بحال کرنا ہے تو2021 ء اور اگر دس سال کے وقفے کی ترتیب قائم رکھنی ہے تو 2027ء میں اگلا انعقاد ضروری ہے۔

کل آبادی میں خواتین کا تناسب 49 فیصد ہے جبکہ 1998ء کی مردم شماری میں یہ تناسب 48 فیصد تھا‘ لہٰذا خواتین کے تناسب میں ایک فیصد بہتری آئی ہے۔ آپ نے یقینا سن رکھا ہو گا کہ پاکستان کی کل آبادی میں خواتین کا تناسب 51 فیصد ہے مگر یہ غلط ہے‘ اگرچہ کسی بھی ملک کی کل آبادی میں 51 فیصد ہونا چاہئے کیونکہ خواتین کی اوسط عمر مردوں سے تقریباً 4 سال زیادہ ہوتی ہے۔ دنیا کے تمام ترقی یافتہ ممالک، جو بیٹی اور بیٹے میں کوئی تفریق یا امتیاز نہیں رکھتے، میں عورتیں کل آبادی کا 51 سے 52 فیصد ہوتی ہیں‘ مگر پاکستان سمیت دنیا کے دیگر ترقی پذیر ممالک میں خواتین کل آبادی کا 47 سے 48 فیصد ہیں۔

ابتدائی نتائج کے مطابق سب سے کم شرح سے اضافہ صوبہ پنجاب میں ہوا‘ لہٰذا کل آبادی میں پنجاب کی شرح بھی کم ہو گئی ہے‘ اس کے باوجود بعض پارٹیاں عادت سے مجبور یا احتیاطی طور پر احتجاج کئے جا رہی ہیں۔ اس سلسلے میں سب سے آگے پیپلز پارٹی اور ایم کیو ایم ہیں۔ ایک جواز‘ جو نمایاں طور پر پیش کیا جا ر ہا ہے‘ کراچی اور لاہور کی آبادی میں اضافہ ہے۔ نتائج کے مطابق کراچی کی آبادی ایک کروڑ پچاس لاکھ‘ جبکہ لاہور کی آبادی ایک کروڑ گیارہ لاکھ بتائی گئی ہے۔ ایم کیو ایم دعویٰ کرتی ہے کہ کراچی کی آبادی کم از کم دو کروڑ ہے‘ اور اس کے ایک دعوے کے مطابق یہ تین کروڑ کے قریب ہے۔ یہ دونوں دعوے صرف سیاسی ہیں کیونکہ تین کروڑ کے ساتھ تو کراچی دنیا کا سب سے بڑا شہر بن جائے گا‘ لہٰذا ہاتھ ہلکا رکھنا چاہئے۔ امن و امان کی بگڑتی صورتحال، گوادر کا متبادل بندرگاہ

کے طور پر سامنے آنا، اور سب سے بڑھ کر پانی کی کمی میں خطرناک حد تک اضافہ‘ وہ عوامل ہیں‘ جنہوں نے کراچی کی کشش کو کم کر دیا ہے۔ اسی وجہ سے کراچی کی طرف ہجرت کرنے والوں کی تعداد میںکمی آئی ہے۔ کراچی کے ایک طرف سمندر اور دوسری طرف پہاڑی علاقہ ہونے کی وجہ سے شہر کے پھیلائو میں اضافہ دشوار ہو چکا ہے۔ اگر انٹرنیٹ پر بین الاقوامی سائٹس پر چیک کیا جائے‘ تو کراچی کی آبادی ملکی مردم شماری کے نتائج کے قریب ہی بتائی جاتی ہے۔ اس لئے بلاجواز احتجاج کی بجائے زیادہ ضرورت کراچی کے حالات بہتر کرنے کی ہے‘ کیونکہ کراچی شہر میں کوڑے کے ڈھیر تو ناقابل عبور پہاڑ بنے ہی ہوئے تھے‘ حالیہ بارشوں نے نکاسیء آب کی ناکامی کی وجہ سے گلیوں اور سڑکوں پر بہتے دریائوں کا جو منظر پیش کیا‘ وہ جمہوری حکمرانوں کی بچی کھچی ساکھ بھی بہا لے گیا ہے۔ ایک اہم نکتہ ذہن میں رہنا چاہئے کہ یہ مردم شماری فوج کے تعاون سے ممکن ہو سکی ہے‘ جو جمہوری اداروں اور خود غرض حکمرانوں کے لئے لمحہ فکریہ ہے‘ کیونکہ ایک فقرہ بہت کثرت سے بولا جاتا ہے کہ جو، جمہوریت والے، گن نہیں سکتے وہ پلاننگ کیا کریں گے اور جو پلاننگ نہیں کریں گے ملک کیسے چلائیں گے؟

آخر میں ایک گزارش: مردم شماری کے تواتر کو بحال کرنے کی ضرورت ہے۔ بین الاقوامی سطح پر ملک کا تشخص جن چیزوں سے بنتا اور حکومتی رٹ کا اندازہ لگایا جاتا ہے‘ مردم شماری ان میں سے ایک ہے۔ جنوبی ایشیا کے تمام ممالک میں تواتر سے ہر دہائی کے پہلے سال اس کا انعقاد کیا جاتا ہے‘ جیسا کہ 2021ء میں تمام ممالک میں مردم شماری کا انعقاد کیا جائے گا۔ بہتر یہی ہے کہ اپنے ملک میں بھی اسی کو اپنایا جائے‘ اور سب سے بڑھ کر آبادی کنٹرول کرنے پر بھی ہنگامی بنیادوں پر توجہ دی جانی چاہئے۔