چنیوٹ :فوڈ اتھارٹی کا ملاوٹ مافیا کیخلاف کریک ڈاؤن جاری
چنیوٹ(ڈسٹرکٹ رپورٹر )پنجاب فوڈ اتھارٹی کا چنیوٹ میں ملاوٹ مافیا کے خلاف کریک ڈاؤن جاری ہے ،قوانین کی مسلسل خلاف ورزی اور صفائی کے انتہائی ناقص انتظامات پر ڈیری یونٹ سیل۔
تفصیلات کے مطابق ڈی جی پنجاب فوڈ اتھارٹی محمد عاصم جاوید کے حکم پرچنیوٹ میں فوڈ سیفٹی ٹیموں نے ملاوٹ مافیا کے خلاف کریک ڈاؤن کے دوران متعدد ملک شاپس اور ملک کولیکشن سنٹرز پر چھاپے مارے اور اس دوران ملک شاپس اور دودھ بردار گاڑیوں میں موجود 12ہزار 300 لٹر دودھ کی جدید لیکٹو سکین مشین سے چیکنگ کی گئی۔دودھ کی ناقص کوالٹی پر 26ہزار 500 روپے کے جرمانے عائد کر دیئے گئے ، علاوہ ازیں فوڈ پوائنٹس اور ہوٹلز پر دوران معائنہ صفائی کے ناقص انتظامات پائے گئے ۔ڈپٹی ڈائریکٹر آپریشنز ڈاکٹر محمد قاسم رضا نے بتایا کہ فوڈ ہینڈلرزکے میڈیکل سکریننگ سرٹیفکیٹس بھی موجود نہیں تھے ،حشرات کے تدارک کے انتظامات بھی صفر تھے جس پر 25ہزار روپے کے جرمانے عائد کئے گئے ۔کریانہ سٹورز سے دوران معائنہ ایکسپائرڈ مصنوعات برآمدہوئیں ،3کلو سے زائد ایکسپائرڈ مصنوعات اور 30 لٹر زائد المیعاد کولڈ ڈرنکس ضائع کر دیں اور ملوث افراد کو 16ہزار روپے کے جرمانے عائدکر دیئے ۔اسی طرح ٹریڈرز شاپ کو پانی کے نمونہ جات فیل ہونے پربھی 20ہزار روپے کے جرمانے کئے گئے ۔
