سٹاک مارکیٹ میں شدید مندی، انڈیکس ایک لاکھ 69 ہزار پوائنٹس کی حد بھی کھو بیٹھا
کراچی: (دنیا نیوز) ایران اسرائیل کشیدگی کے باعث پاکستان سٹاک مارکیٹ میں کاروباری ہفتے کے پہلے روز شدید مندی ریکارڈ کی گئی ہے۔
کاروباری ہفتے کے پہلے روز کاروبار کے آغاز پر ہی سٹاک ایکسچینج میں منفی رجحان دیکھنے میں آیا ہے، 1500 سے زائد پوائنٹس کی کمی کے ساتھ پاکستان سٹاک مارکیٹ میں انڈیکس ایک لاکھ 68 ہزار 432 پوائنٹس کی سطح پر آ گیا ہے۔
ٹریڈنگ کے دوران سٹاک مارکیٹ میں مندی کا رجحان برقرار رہا جس کے باعث کاروباری روز کے اختتام پر ہنڈرڈ انڈیکس 1525 پوائنٹس کی کمی کیساتھ ایک لاکھ 68 ہزار 953 پوائنٹس کی سطح پر بند ہوا۔
سٹاک مارکیٹ میں آج 12 ارب 81 کروڑ 40 لاکھ 19 ہزار 788 روپے مالیت کے 13 کروڑ 78 لاکھ 51 ہزار 443 شیئرز کا لین دین ہوا۔
واضح رہے کہ گزشتہ کاروباری ہفتے کے آخری روز سٹاک ایکسچینج میں ہنڈرڈ انڈیکس ایک لاکھ 70 ہزار 478 پوائنٹس کی سطح پر بند ہوا تھا۔
