گووندا کے مبینہ معاشقے پڑھنے کیلئے فلمی رسالے خریدتی تھی، سنیتا آہوجا
ممبئی: (ویب ڈیسک) سٹار بالی وڈ اداکار گووندا کی اہلیہ سنیتا آہوجا نے اعتراف کیا ہے کہ وہ ماضی میں اپنے شوہر کے مبینہ معاشقے پڑھنے کیلئے فلمی رسالے خریدتی رہی ہیں۔
بالی وڈ سٹار گووندا اور ان کی اہلیہ سنیتا آہوجا حالیہ دنوں میں اُس وقت خبروں کی زینت بنے جب اداکار کی اہلیہ نے اُن پر بے وفائی کا الزام عائد کیا تھا، اگرچہ گووندا نے اہلیہ کے اس الزام کو سختی سے مسترد کر دیا تھا، تاہم اسی تناظر میں ماضی کی ویڈیو کا کلپ ایک بار پھر منظر عام پر آیا ہے۔
اس ویڈیو کلپ میں دونوں میاں بیوی موجود ہیں اور مختلف اداکاروں کے ساتھ گووندا کا نام جڑنے پر مزاحیہ انداز میں گفتگو کر رہے ہیں، اس دوران سنیتا آہوجا نے ہنستے ہوئے کہا کہ وہ گووندا کے مبینہ معاشقوں کے بارے میں پڑھنے کیلئے فلمی رسالے خریدتی ہیں اور اگر کوئی نئی خبر نہ ملے تو انہیں افسوس ہوتا ہے۔
اس وقت گووندا نے بیوی کے ردعمل کے مختلف مراحل کو مزاحیہ انداز میں بیان کیا اور کہا کہ وقت کے ساتھ بیوی ایسی خبروں کو سنجیدگی سے لینا چھوڑ دیتی ہے، دوران گفتگو اداکار نے مذاق میں خود کو اچھا اداکار قرار دیا، جو اپنے معاشقے بہت اچھے انداز سے چھپانا جانتا ہے۔
اسی انٹرویو میں سنیتا آہوجا نے گووندا کو ایک ذمے دار اور وفادار خاندانی شخص بھی قرار دیا اور اُن پر اپنے مکمل اعتماد کا اظہار کیا تھا۔
