پاکستان سے شکست پر سی ای او کرکٹ آسٹریلیا نک ہوکلے مایوس
میلبرن: (ویب ڈیسک) کرکٹ آسٹریلیا کے چیف ایگزیکٹو نک ہوکلے پاکستان سے ون ڈے سیریز میں شکست پر مایوس ہوگئے۔
انہوں نے کہا ہے کہ پاکستان کے خلاف سیریز کا نتیجہ بہت مایوس کن ہے، ٹیلنٹ کو انٹرنیشنل کرکٹ کا تجربہ دینے کا یہ ایک بہت اچھا موقع ہے۔
نک ہوکلے نے مزید کہا ہے کہ ماضی میں نئے کھلاڑیوں کو موقع نہ دینے کی وجہ سے تنقید کی جاتی رہی، پلان یہی بنایا گیا تھا کہ تمام فارمیٹ کھیلنے والے کھلاڑی بارڈر گواسکر ٹرافی میں اچھی کنڈیشن میں ہوں۔
واضح رہے کہ اس سے قبل پاکستان سے شکست پر سابق کپتان مائیکل کلارک سمیت کئی آسٹریلوی کرکٹرز نے کرکٹ آسٹریلیا کو تنقید کا نشانہ بنایا تھا، سابق کرکٹرز نے پاکستان کے خلاف فیصلہ کن میچ میں 5 سینئر کرکٹرز کو آرام دینے پر کڑی تنقید کی تھی۔
یاد رہے کہ پاکستان نے آسٹریلیا کے خلاف 3 ون ڈے میچز کی سیریز 1-2 سے جیتی ہے۔
