گوجرانوالہ: ایف آئی اے کا انسانی سمگلرز کے خلاف کریک ڈاؤن، 9 ملزمان گرفتار
گوجرانوالہ: (دنیا نیوز) گوجرانوالہ میں ایف آئی اے نے انسانی سمگلنگ اور ویزا فراڈ میں ملوث عناصر کے خلاف کریک ڈاؤن کرتے ہوئے 2 اشتہاریوں سمیت 9 ملزمان کو گرفتار کر لیا۔
ترجمان ایف آئی اے کے مطابق گرفتار ملزمان میں اشتہاری ناصر اقبال، محمد اقبال، منیر احمد، ظہیر الدین بابر، سید محمد حسن بخاری، محمد اشرف قیصر، عمران اشرف، محمد یونس اور محمد اکرم شامل ہیں۔
ترجمان کا کہنا ہے کہ ملزمان کو گوجرانوالہ، گجرات، نارووال، سیالکوٹ اور منڈی بہاؤالدین کے مختلف علاقوں میں کارروائیوں کے دوران گرفتار کیا گیا، ملزمان شہریوں کو بیرون ملک بھجوانے میں ناکام رہے اور بھاری رقوم وصول کرنے کے بعد روپوش ہو گئے تھے۔
ایف آئی اے کے مطابق گرفتار ملزمان کو حراست میں لے کر مزید تفتیش کا آغاز کر دیا گیا ہے جبکہ نیٹ ورک کے دیگر سہولت کاروں کی گرفتاری کے لیے بھی کارروائیاں جاری ہیں۔
