برازیل کے عالمی شہرت یافتہ لیجنڈری فٹبالر روبرٹو کارلوس ہسپتال میں داخل
برازیلیا: (دنیا نیوز) برازیلین فٹبال کے لیجنڈ اور ریال میڈرڈ کے سابق دفاعی ستون روبرٹو کارلوس کو صحت کی خرابی کے باعث ہسپتال منتقل کر دیا گیا جس سے ان کے مداح تشویش میں مبتلا ہو گئے۔
خبر ایجنسی کے مطابق 52 سالہ روبرٹو کارلوس ان دنوں چھٹیاں گزارنے کیلئے برازیل میں موجود تھے کہ معمول کے طبی معائنے کے دوران ان کی صحت سے متعلق تشویش ناک علامات سامنے آئیں، ابتدا میں وہ ٹانگ میں خون کے ایک معمولی لوتھڑے کی جانچ کیلئے ہسپتال پہنچے تھے تاہم مزید ٹیسٹ اور ایم آر آئی اسکین کے بعد ڈاکٹروں نے دل کی کارکردگی میں خرابی کی نشاندہی کی۔
فٹبالر کے طبی ماہرین کے مشورے پر فوری طور پر سرجری کا فیصلہ کیا گیا جو کامیابی سے مکمل کر لیا گیا، روبرٹو کارلوس کی حالت اب مستحکم ہے اور وہ خطرے سے باہر ہیں، تاہم احتیاطی تدابیر کے تحت انہیں مزید 2 دن تک ہسپتال میں ڈاکٹرز کے زیر نگرانی رکھا جائے گا۔
یاد رہے کہ روبرٹو کارلوس کا شمار فٹبال کی تاریخ کے لیجنڈ لیفٹ بیکس میں ہوتا ہے جنہوں نے اپنی تیز رفتاری، شاندار فری ککس اور یادگار گولز سے دنیا بھر کے شائقین کو متاثر کیا، انہوں نے برازیل کی قومی ٹیم کی نمائندگی کرتے ہوئے 125 بین الاقوامی میچز کھیلے جبکہ 1998ء اور 2002ء کے ورلڈ کپ فائنلز میں ٹیم کا حصہ تھے۔
علاوہ ازیں وہ 2002ء میں عالمی کپ جیتنے والی ٹیم کا بھی اہم حصہ بھی رہے، کلب فٹبال میں بھی ان کا سفر شاندار رہا جہاں وہ ریال میڈرڈ کے ساتھ 3 مرتبہ یوئیفا چیمپئنز لیگ جیتنے میں کامیاب ہوئے، ریٹائرمنٹ کے بعد بھی وہ ریال میڈرڈ کے سفیر کے طور پر فٹبال سے وابستہ ہیں۔
