روس نے تائیوان کی چین سے علیحدگی کے تمام اقدامات کی مخالفت کردی
ماسکو: (ویب ڈیسک) روس نے تائیون کی چین سے علیحدگی کے تمام اقدامات کی مخالفت کردی۔
عالمی میڈیا کی رپورٹ کے مطابق روسی وزارت خارجہ نے کہا ہے کہ روس تائیوان کی چین سے علیحدگی کے ہر طرح کے اقدامات کی مخالفت کرتا ہے، تائیوان کا معاملہ درحقیقت کچھ ممالک کے لیے چین کو محدود کرنے کا ایک فوجی سٹریٹجک اقدام بن چکا ہے۔
ترجمان روسی وزارت خارجہ نے اس بات پر دوبارہ زور دیا کہ تائیوان کے معاملے پر روس کا اصولی مؤقف واضح اور مستقل ہے اور اعلیٰ قیادت کی جانب سے کئی بار اس کی توثیق کی گئی ہے۔
ان کا کہنا تھا کہ روس کا واضح مؤقف ہے کہ تائیوان چین کا اٹوٹ حصہ ہے اور روس تائیوان کی علیحدگی کی تمام تر کارروائیوں کی مخالفت کرتا ہے، روس کا خیال ہے کہ تائیوان کا معاملہ چین کا داخلی معاملہ ہے اور چین کو ملکی اقتدار اعلیٰ اور علاقائی سالمیت کا دفاع کرنے کا بھرپور قانونی حق حاصل ہے۔
