گورنر ہاؤس کراچی میں سال نو پر 47 منٹ آتش بازی
کراچی: (ویب ڈیسک) گورنر سندھ کامران خان ٹیسوری کی جانب سے نئے سال کی آمد پر گورنر ہاؤس میں شاندار آتش بازی کا انعقاد کیا گیا جو کہ 47 منٹ تک جاری رہی۔
گورنر ہاؤس میں آتش بازی کے دلکش مظاہرے نے آسمان کو رنگوں سے سجا دیا، اس موقع پر موجود ہزاروں شہریوں نے اس شاندار جشن کو دیکھ کر خوشی اور مسرت کا بھرپور اظہار کیا۔
گورنر سندھ کامران خان ٹیسوری نے کہا کہ 2025ء پاکستان میں عسکری، سفارتی اور معاشی بالادستی کا سال رہا، 2025ء پاکستان میں ایس آئی ایف سی کی بالادستی کا سال رہا جس کے مرکزی کردار چیف آف ڈیفنس فورسز فیلڈ مارشل عاصم منیر قرار پائے۔
انہوں نے کہا کہ سال 2025ء میں پاکستان پوری دنیا میں مرکز نگاہ بنا رہا، سال کے آخر میں ینگ کرکٹ ٹیم نے بھارت کو شکست دے کر خوشیاں دوبالا کیں، پاکستان نے انڈیا کو ہرا کر 2025ء میں قوم کو جو تحفہ دیا ہے اسے قوم ساری زندگی یاد رکھے گی۔
کامران ٹیسوری نے کہا کہ پوری قوم اپنی افواج کی شکر گزار ہے، 2026ء کیلئے دعا گو ہوں کہ سازشیوں اور ملک دشمن عناصر کو شکست ہوگی، سازشی 2026ء میں اپنے منطقی انجام تک پہنچے گے اور عبرت کا نشان بنیں گے۔
ان کا کہنا تھا کہ 2025ء کے اختتام پر میں کراچی سمیت پورے سندھ کے عوام کا شکریہ ادا کرنا چاہتا ہوں جنہوں نے گورنر ہاؤس کے ہر چھوٹے بڑے پروگرام میں شرکت کرکے میرا حوصلہ بڑھایا، 2026ء میں ہم اس سے بھی بڑے پرگرامز کریں گے جس میں عوامی خدمت اور ویلفیئر کے بہترین انتظامات کیے جائیں گے۔
