ایران کا انٹرنیٹ کمپنی سٹار لنک کے خلاف کریک ڈاؤن، متعدد ڈیوائسز قبضے میں لے لیں
تہران :(دنیا نیوز) ایران نے انٹرنیٹ فراہم کرنے والی امریکی کمپنی سٹار لنک کے خلاف کریک ڈاؤن کرتے ہوئے ڈیوائسز بڑی تعداد میں قبضے میں لے لیں۔
گزشتہ ہفتے ایرانی حکومت نے پُرتشدد مظاہروں پر قابو پانے کے لیے ملک میں زیادہ تر انٹرنیٹ کنکشن بند کر دیے تھے جب کہ فون کالز اور ٹیکسٹ پیغامات بھیجنے کی سہولت بھی محدود کردی گئی تھی۔
امریکی جریدے کے مطابق انٹرنیٹ تک بلا تعطل رسائی صرف حکومت، اس کے میڈیا اداروں اور حکومت کے حامیوں کو حاصل ہے، انٹرنیٹ کی بندش کے بعد سٹار لنک کے مالک ایلون مسک نے ایران میں مفت انٹرنیٹ فراہم کرنے کا اعلان کیا تھا، تاہم ایران میں سیٹلائیٹ انٹرنیٹ سروس سٹار لنک کے خلاف کریک ڈاؤن شروع کیا گیا۔
امریکی میڈیا رپورٹس میں مزید بتایا گیا کہ ایران نے انٹرنیٹ فراہم کرنے والی امریکی کمپنی سٹار لنک کی ڈیوائسز بڑی تعداد میں قبضے میں لے لی ہیں۔
واضح رہے کہ ایران میں سٹارلنک ٹرمینلز غیر قانونی ہیں اور انہیں خفیہ طور پر ملک میں لایا جاتا ہے، یہ ٹرمینلز 2022 کے احتجاجی مظاہروں کے بعد بڑی تعداد میں سامنے آئے تھے۔
