جعلی ویڈیو کیس: عظمیٰ بخاری ذاتی حیثیت میں عدالت طلب
لاہور: (دنیا نیوز) صوبائی وزیر عظمیٰ بخاری کی جعلی ویڈیو سوشل میڈیا پر وائرل کرنے کا مقدمہ، جوڈیشل مجسٹریٹ نے 21 جنوری کو صوبائی وزیر عظمیٰ بخاری کو ذاتی حیثیت میں طلب کر لیا۔
عدالت نے عظمیٰ بخاری کے مقدمے کی گزشتہ سماعت کا تحریری حکم جاری کیا اور کہا کہ مدعیہ عظمی بخاری کی ٹرائل کے آخر میں گواہی ریکارڈ کی درخواست مسترد کی جاتی ہے۔
تحریری حکم نامے کے مطابق اگر مدعیہ عظمیٰ بخاری عدالت پیش نہ ہوئیں تو قانون کے مطابق وارنٹ یا کاروائی کی جائے گی۔
لاہور ہائی کورٹ اس مقدمے کا دو ماہ میں ٹرائل مکمل کرنے کا حکم دے چکی ہے، مدعیہ ہر صورت آئندہ سماعت پر عدالت میں پیشی کو یقینی بنائے۔
ملزمہ فلک جاوید کی جانب سے بیرسٹر میاں علی اشفاق عدالت میں پیش ہوئے، فلک جاوید کے وکیل میاں علی اشفاق نے عظمیٰ بخاری کے آخر میں گواہی ریکارڈ کرانے کی درخواست کی مخالفت کی تھی۔
