سٹاک مارکیٹ میں اتار چڑھاؤ، ہنڈرڈ انڈیکس منفی زون میں بند ہوا
کراچی: (دنیا نیوز) پاکستان سٹاک مارکیٹ میں آج کاروبار کے اتار چڑھاؤ کے بعد ہنڈرڈ انڈیکس منفی زون میں بند ہوا ۔
کاروباری ہفتے کے دوسرے روز کاروبار کے آغاز پر سٹاک ایکسچینج میں تیزی ریکارڈ کی گئی ہے، 1000 سے زائد پوائنٹس کے اضافے کے ساتھ پاکستان سٹاک مارکیٹ میں ہنڈرڈ انڈیکس ایک لاکھ 71 ہزار 571 پوائنٹس کی سطح پر پہنچ گیا۔
تاہم ٹریڈنگ کے دوران سٹاک مارکیٹ میں اچانک مندی چھاگئی جو کاروباری روز کے اختتام تک برقرار رہی، جس کے باعث ہنڈرڈ انڈیکس 1590 پوائنٹس کی کمی کیساتھ ایک لاکھ 68 ہزار 916 پوائنٹس کی سطح پر بند ہوا۔
واضح رہے کہ گزشتہ کاروباری روز کے اختتام پر ہنڈرڈ انڈیکس 609 پوائنٹس کی کمی کیساتھ ایک لاکھ 70 ہزار 506 پوائنٹس کی سطح پر بند ہوا تھا۔
دوسری جانب ایشیائی سٹاک مارکیٹوں میں ملا جلا رجحان برقرار ہے۔
خبر ایجنسی کے مطابق جاپان کے نکی انڈیکس میں تقریباً ایک فیصد کا اضافہ ہوا، تھائی لینڈ سیٹ انڈیکس میں بھی 0.40 فیصد کی تیزی دیکھنے میں آئی، جبکہ ہانگ کانگ کے ہینگ سینگ انڈیکس میں بھی معمولی اضافہ ریکارڈ کیا گیا۔
اس کے علاوہ جنوبی کوریا کے کوسپی انڈیکس میں 1.72 فیصد کی مندی، انڈونیشیا کے جکارتہ کمپوزٹ انڈیکس میں ایک فیصد کی کمی جبکہ چین کے شنگھائی کمپوزٹ انڈیکس میں 0.40 فیصد گراوٹ دیکھی گئی۔
